ଦକ୍ଷିଣ ଗୋଆର ଏକ ସୁନ୍ଦର ବେଳାଭୂମି ହେଉଛି ଉଟୋର୍ଡା ବିଚ୍। କୋଳାହଳମୟ ପରିବେଶରୁ ଦୂରରେ ଥିବା ଏହି ସ୍ଥାନରେ ଟିକେ ଶାନ୍ତିରେ ସମୟ ବିତାଇବା ପାଇଁ ପର୍ଯ୍ୟଟକଙ୍କର ବହୁ ଇଚ୍ଛା ଥାଏ। ସେଥିପାଇଁ ଅକ୍ଟୋବରରୁ ଫେବୃୟାରୀ ମାସ ଭିତରେ ଏଠାକୁ ବିଭିନ୍ନ ସ୍ଥାନରୁ ପର୍ଯ୍ୟଟକ ଆସୁଥିବା ଦେଖିବାକୁ ମିଳେ…
ବେଳାଭୂମିରେ ବସି ପ୍ରକୃତିର ଅପୂର୍ବ ଶୋଭାକୁ ଉପଭୋଗ କରିବାକୁ କାହାକୁ ବା ଭଲ ନ ଲାଗେ। ସେଥିପାଇଁ ତ କାମରୁ ଛୁଟି ମିଳିଲେ ଅନେକେ କେଉଁ ଏକ ବେଳାଭୂମିକୁ କିଛିଦିନ ପାଇଁ ବୁଲିଯିବାକୁ ପ୍ଲାନିଂ କରିଥାନ୍ତି। ଯଦି ଆପଣ ବି ସେମିତି କିଛି ଯୋଜନା କରୁଥାନ୍ତି, ତା’ହେଲେ ଦକ୍ଷିଣ ଗୋଆରେ ଥିବା ଉଟୋର୍ଡା ବିଚ୍ ବା ବେଳାଭୂମି ଆପଣଙ୍କ ପାଇଁ ଏକ ବେଷ୍ଟ ଡେଷ୍ଟିନେଶନ ହେବ। କାରଣ ଏହି ବେଳାଭୂମିର ପରିବେଶ ଆକର୍ଷଣୀୟ ହେବାସହ ବେଶ୍ ପରିଷ୍କାର,ପରିଚ୍ଛନ୍ନ ମଧ୍ୟ। ଏହାଛଡ଼ା ପର୍ଯ୍ୟଟକଙ୍କୁ ଆନନ୍ଦ ଦେବା ପାଇଁ ଏଠାରେ ବିଭିନ୍ନ ପ୍ରକାର ଜଳକ୍ରୀଡ଼ାର ମଧ୍ୟ ସୁବିଧା ଯୋଗାଇ ଦିଆଯାଇଥାଏ। ଖାସ୍ ସେଥିପାଇଁ ତ ଟୁରିଷ୍ଟ ସିଜନ୍ ଆସିଗଲେ ଏଠାରେ ପର୍ଯ୍ୟଟକଙ୍କର ଭିଡ଼ ବଢ଼ିବାକୁ ଲାଗେ।
ବିଚ୍ରେ ଜଳକ୍ରୀଡ଼ାର ଆନନ୍ଦ
ଉଟୋର୍ଡା ବିଚ୍ରେ ପର୍ଯ୍ୟଟକ ଚାହିଁଲେ ଡଲ୍ଫିନ୍ ବୋଟ୍ ଟ୍ରିପ୍, ଓ୍ବାଟର୍ ସ୍କିଂ, ଓ୍ବିଣ୍ଡ ସର୍ଫିଙ୍ଗ୍ ଭଳି ଆନନ୍ଦଦାୟକ ଜଳକ୍ରୀଡ଼ାର ଭରପୂର ମଜା ନେଇପାରିବେ। ଏଥିସହିତ ଉକ୍ତ ବେଳାଭୂମିରେ ସାଇକ୍ଲିଂ କରିବାର ନିଆରା ଅନୁଭୂତି ବି ପାଇପାରିବେ। ଫିଶିଂ ପାଇଁ ଏଠି ଯଥେଷ୍ଟ ସୁବିଧା ରହିଛି। ତା’ଛଡ଼ା ଏଠାରେ ପର୍ଯ୍ୟଟକଙ୍କ ଦେହ ଓ ମନକୁ ଫୂର୍ତ୍ତି କରିବା ପାଇଁ ବିଭିନ୍ନ ପ୍ରକାର ସ୍ପା’ର ବ୍ୟବସ୍ଥା ବି ଅଛି।
ନିକଟସ୍ଥ ପର୍ଯ୍ୟଟନସ୍ଥଳୀ
ଉଟୋର୍ଡା ବେଳାଭୂମିରେ ବୁଲିବା ସହ ପର୍ଯ୍ୟଟକ ଚାହିଁଲେ ନିକଟରେ ଥିବା କିଛି ଆକର୍ଷଣୀୟ ପର୍ଯ୍ୟଟନସ୍ଥଳୀ ବି ବୁଲି ଦେଖିପାରିବେ। ଯେମିତିକି-
* ମଜୋର୍ଡା ବିଚ୍: ଉଟୋର୍ଡା ବିଚ୍ଠାରୁ ମାତ୍ର ଅଳ୍ପ କିଛି କି.ମି. ଦୂରରେ ରହିଛି ଏହି ବିଚ୍। ଏହା ମଧ୍ୟ ଏକ ଆକର୍ଷଣୀୟ ବେଳାଭୂମି। ବିଶେଷକରି ଲଭର୍ସ ତଥା ଦମ୍ପତିମାନଙ୍କ ଗହଣରେ ଏହି ବିଚ୍ର ବେଶ୍ ଲୋକପ୍ରିୟତା ରହିଛି।
* କୋଲଭା ବିଚ୍: ଦକ୍ଷିଣ ଗୋଆର ଏହା ଏକ ସୁନ୍ଦର ବେଳାଭୂମି। ଉଟୋର୍ଡା ବିଚ୍ଠାରୁ ମାତ୍ର ଅଳ୍ପ କିଛି ଦୂରରେ ରହିଛି ଏହି ବେଳାଭୂମି। ପର୍ଯ୍ୟଟକ ଏଠାରେ ବି ଜଳକ୍ରୀଡ଼ାର ମଜା ନେବା ସହ ସି-ଫୁଡ୍ ଖାଇବାର ଅପୂର୍ବ ଆନନ୍ଦ ପାଇ ପାରିବେ।
* ଥ୍ରୀ କିଙ୍ଗ୍ସ ଚାପେଲ୍: ଏହା ହେଉଛି ଏକ ଚର୍ଚ୍ଚ। ଏହି ଚର୍ଚ୍ଚ ସହିତ ଅନେକ ଐତିହାସିକ କଥାର ସମ୍ପର୍କ ରହିଛି। ପର୍ଯ୍ୟଟକ ଏଠାକୁ ବୁଲିଯାଇ ସେସବୁକୁ ଜାଣିବାର ସୁଯୋଗ ପାଇପାରିବେ।
* ନାଭାଲ୍ ଆଭିଏଶନ ମ୍ୟୁଜିୟମ: ଉଟୋର୍ଡା ବିଚ୍ ନିକଟରେ ଥିବା ଏହି ମ୍ୟୁଜିୟମ୍ ଆଡ଼େ ମଧ୍ୟ ପର୍ଯ୍ୟଟକ ଚାହିଁଲେ ବୁଲିଯାଇପାରିବେ। ନାଭାଲ୍ ସମ୍ପର୍କିତ ଅନେକ ତଥ୍ୟ ଜାଣିବାର ସୁଯୋଗ ଏଠି ରହିଛି।
କେବେ ଓ କେମିତି ଯିବେ
ବର୍ଷର ସବୁ ସମୟରେ ଏଠାକୁ ଯିବାର ସୁବିଧା ଥିଲେ ହେଁ ଅକ୍ଟୋବରରୁ ଫେବୃୟାରୀ ହେଉଛି ଏଠାକୁ ବୁଲିଯିବାର ସବୁଠୁ ଭଲ ସମୟ। କାରଣ ଏହି ସମୟରେ ଗୋଆରେ ଟୁରିଷ୍ଟ ସିଜନ୍ ଆରମ୍ଭ ହୋଇଥାଏ। ତା’ଛଡ଼ା ଏହି ସମୟ ଭିତରେ ଏଠାକାର ଜଳବାୟୁ ବୁଲାବୁଲି କରିବାକୁ ସମ୍ପୂର୍ଣ୍ଣ ଅନୁକୂଳ ରହିଥାଏ। ସେହିପରି ଏଠାକୁ ଯିବା ପାଇଁ ସଡ଼କପଥ, ରେଳପଥ ତଥା ଆକାଶପଥର ମଧ୍ୟ ଭଲ ସୁବିଧା ରହିଛି। ନିଜ ବଜେଟକୁ ଦେଖି ପର୍ଯ୍ୟଟକ ଯେଉଁଥିରେ ସୁବିଧା ସେଥିରେ ଆରାମରେ ଯାଇ ଏହି ବିଚ୍ରେ ପହଞ୍ଚତ୍ପାରିବେ।
