ଓ୍ବାଶିଂଟନ,୩୧ା୭: ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସରକାର ଏକ ନୂଆ ପ୍ରସ୍ତାବ ଉପରେ ବିଚାର କରୁଛନ୍ତି। ଏହି ପ୍ରସ୍ତାବ କାର୍ଯ୍ୟକାରୀ ହେଲେ, ଆମେରିକାର ବିଶ୍ୱବିଦ୍ୟାଳୟରୁ ପାଠପଢ଼ା ଶେଷ କରିଥିବା ବିଦେଶୀ ଛାତ୍ରୀଛାତ୍ରଙ୍କୁ ସେଠାରେ ଚାକିରି କରିବା ପାଇଁ ୧ ଲକ୍ଷ ଆମେରିକୀୟ ଡଲାର (ପ୍ରାୟ ୯୬ ଲକ୍ଷ ଟଙ୍କା) ଦେବାକୁ ପଡ଼ିପାରେ । ୱାଲ୍ ଷ୍ଟ୍ରିଟ୍ ଜର୍ନାଲ୍ର ଏକ ରିପୋର୍ଟରେ ଏହି ଦାବି କରାଯାଇଛି।
ଏହି ଖବର ସାମ୍ନାକୁ ଆସିବା ପରେ ସୋସିଆଲ ମିଡିଆରେ ଏହାକୁ ନେଇ ତୀବ୍ର ପ୍ରତିକ୍ରିୟା ଦେଖାଦେଇଛି। ଅନେକ ଲୋକ ଏହାକୁ ଅବ୍ୟବହାରିକ ଓ ଅଯୁକ୍ତିକ ପ୍ରସ୍ତାବ ବୋଲି କହିବା ସହ ଏହା ଯୋଗୁଁ ବିଶ୍ୱର ମେଧାବୀ ଛାତ୍ରୀଛାତ୍ର ଆମେରିକାରେ ପଢ଼ିବାକୁ ଆସିବାରୁ ବିରତ ରହିପାରନ୍ତି ବୋଲି ମତ ଦେଇଛନ୍ତି। ରିପୋର୍ଟ ଅନୁସାରେ, ଏହି ନୂଆ ଶୁଳ୍କ ଅପ୍ସନାଲ ପ୍ରାକ୍ଟିକାଲ ଟ୍ରେନିଂ (OPT) ଯୋଜନା ସହ ଜଡ଼ିତ ହୋଇପାରେ। OPT ହେଉଛି ଏମିତି ଏକ ବ୍ୟବସ୍ଥା, ଯାହା ଅଧୀନରେ ବିଦେଶୀ ଛାତ୍ରୀଛାତ୍ର ପାଠପଢ଼ା ଶେଷ କରିବା ପରେ ସର୍ବାଧିକ ତିନି ବର୍ଷ ପର୍ଯ୍ୟନ୍ତ ଆମେରିକାରେ କାମ କରିପାରନ୍ତି। ସେମାନଙ୍କ ପାଠ୍ୟକ୍ରମ ଅନୁଯାୟୀ ଏହି ସମୟସୀମା ନିର୍ଦ୍ଧାରଣ କରାଯାଏ। ତେବେ ଟ୍ରମ୍ପ ପ୍ରଶାସନ ପକ୍ଷରୁ ଏପର୍ଯ୍ୟନ୍ତ ଏହି ପ୍ରସ୍ତାବ ସମ୍ପର୍କରେ କୌଣସି ଆଧିକାରିକ ଘୋଷଣା କରାଯାଇନାହିଁ।
ୱାଲ୍ ଷ୍ଟ୍ରିଟ୍ ଜର୍ନାଲ୍ର ରିପୋର୍ଟ ଅନୁସାରେ, ୨୦୨୪ ମସିହାରେ ପ୍ରାୟ ୪.୧୯ ଲକ୍ଷ ବିଦେଶୀ ଛାତ୍ରୀଛାତ୍ର OPT ମାଧ୍ୟମରେ ଆମେରିକାରେ କାମ କରୁଥିଲେ। ଏହି ଯୋଜନା ମାଧ୍ୟମରେ ବିଶେଷକରି ପ୍ରଯୁକ୍ତି (Technology) ଓ ଆର୍ଥିକ (Finance) କ୍ଷେତ୍ରର ବଡ଼ ବଡ଼ କମ୍ପାନୀ ବିଦେଶୀ ପ୍ରତିଭାଙ୍କୁ ନିଯୁକ୍ତି ଦେଇଥାନ୍ତି। ପରବର୍ତ୍ତୀ ସମୟରେ ସେମାନଙ୍କ ପାଇଁ H-1B ଭିସା ମଧ୍ୟ ବ୍ୟବସ୍ଥା କରାଯାଏ। ବିଦେଶୀ ଛାତ୍ରଛାତ୍ରୀଙ୍କ ଅପ୍ସନାଲ ପ୍ରାକ୍ଟିକାଲ ଟ୍ରେନିଂ (OPT) ଯୋଜନାରେ ୧ ଲକ୍ଷ ଡଲାର ଶୁଳ୍କ ଲାଗୁ କରିବା ନେଇ ଆଲୋଚନା ଏଭଳି ସମୟରେ ଆରମ୍ଭ ହୋଇଛି, ଯେତେବେଳେ H-1B ଭିସା ସମ୍ପର୍କିତ ଅନ୍ୟ ଏକ ପ୍ରସ୍ତାବରେ ଟ୍ରମ୍ପ ସରକାର ଆଇନଗତ ଝଟକା ଖାଇଛନ୍ତି। ଏହା ପୂର୍ବରୁ ଟ୍ରମ୍ପ ପ୍ରଶାସନ କିଛି H-1B ଭିସା ଆବେଦନକାରୀଙ୍କ ଉପରେ ମଧ୍ୟ ୧ ଲକ୍ଷ ଡଲାର ଶୁଳ୍କ ଲାଗୁ କରିବାକୁ ଚାହୁଁଥିଲେ। କିନ୍ତୁ ଗତ ସପ୍ତାହରେ ବୋଷ୍ଟନ୍ର ଏକ ଫେଡେରାଲ୍ ଅପିଲ୍ କୋର୍ଟ ଏହି ପ୍ରସ୍ତାବକୁ କାର୍ଯ୍ୟକାରୀ କରିବା ଉପରେ ରୋକ ଲଗାଇଥିଲେ। ଏହି ପ୍ରସ୍ତାବକୁ ଆମେରିକାର ବଡ଼ ବଡ଼ ପ୍ରଯୁକ୍ତି କମ୍ପାନୀ ତୀବ୍ର ବିରୋଧ କରିଥିଲେ। ସେମାନଙ୍କ ମତରେ, ଅତିରିକ୍ତ ଶୁଳ୍କ ଲାଗୁ ହେଲେ ବିଦେଶୀ ଦକ୍ଷ କର୍ମଚାରୀଙ୍କୁ ନିଯୁକ୍ତି ଦେବା ବହୁତ ମହଙ୍ଗା ଓ କଷ୍ଟସାଧ୍ୟ ହୋଇପଡ଼ିବ।
ଏହା ପରେ ଟ୍ରମ୍ପ ସରକାର H-1B ଶୁଳ୍କର ପରିସରକୁ ସୀମିତ କରି କେବଳ ସେହି ବିଦେଶୀ ବିଶେଷଜ୍ଞଙ୍କ ପାଇଁ ରଖିବାକୁ ନିଷ୍ପତ୍ତି ନେଇଥିଲେ, ଯେଉଁମାନେ ସିଧାସଳଖ H-1B ଭିସା ମାଧ୍ୟମରେ ଆମେରିକାକୁ ଯାଆନ୍ତି। କିନ୍ତୁ OPT ସମ୍ପର୍କିତ ନୂଆ ପ୍ରସ୍ତାବ ଯଦି କାର୍ଯ୍ୟକାରୀ ହୁଏ, ତେବେ ଏହାର ସିଧାସଳଖ ପ୍ରଭାବ ସେହି ବିଦେଶୀ ଛାତ୍ରୀଛାତ୍ରଙ୍କ ଉପରେ ପଡ଼ିବ, ଯେଉଁମାନେ ବର୍ତ୍ତମାନ ଆମେରିକାର ବିଶ୍ୱବିଦ୍ୟାଳୟଗୁଡ଼ିକରେ ପାଠପଢ଼ା କରୁଛନ୍ତି ଏବଂ ପଢ଼ା ଶେଷ ପରେ ସେଠାରେ ଚାକିରି କରିବାକୁ ଯୋଜନା କରୁଛନ୍ତି। ଆମେରିକାରେ ଉଚ୍ଚଶିକ୍ଷା ପାଇଁ ଯାଉଥିବା ବିଦେଶୀ ଛାତ୍ରୀଛାତ୍ରଙ୍କ ମଧ୍ୟରେ ଭାରତୀୟ ଛାତ୍ରମାନେ ବର୍ତ୍ତମାନ ସର୍ବାଧିକ ସଂଖ୍ୟାରେ ଅଛନ୍ତି। ଏହି କ୍ଷେତ୍ରରେ ଭାରତ ଚୀନ୍କୁ ପଛରେ ପକାଇ ଶୀର୍ଷ ସ୍ଥାନକୁ ଆସିଛି।
ଉପଲବ୍ଧ ତଥ୍ୟ ଅନୁଯାୟୀ, ଆମେରିକାର କଲେଜ ଓ ବିଶ୍ୱବିଦ୍ୟାଳୟରେ ପଢ଼ୁଥିବା ସମସ୍ତ ବିଦେଶୀ ଛାତ୍ରୀଛାତ୍ରଙ୍କ ମଧ୍ୟରୁ ପ୍ରାୟ ଏକ-ତୃତୀୟାଂଶ ଭାରତୀୟ। ସଂଖ୍ୟା ଦୃଷ୍ଟିରୁ ଏହା ପ୍ରାୟ ୩.୩ ଲକ୍ଷ।ଏଭଳି ପରିସ୍ଥିତିରେ, ଯଦି ଡୋନାଲ୍ଡ ଟ୍ରମ୍ପ ସରକାର ବିଦେଶୀ ଛାତ୍ରୀଛାତ୍ରଙ୍କୁ ଆମେରିକାରେ ଚାକିରି କରିବା ପାଇଁ ୧ ଲକ୍ଷ ଡଲାର (ପ୍ରାୟ ୯୬ ଲକ୍ଷ ଟଙ୍କା) ଶୁଳ୍କ ଦେବାକୁ ବାଧ୍ୟ କରୁଥିବା ପ୍ରସ୍ତାବକୁ କାର୍ଯ୍ୟକାରୀ କରନ୍ତି, ତେବେ ସବୁଠାରୁ ବଡ଼ ପ୍ରଭାବ ଭାରତୀୟ ଛାତ୍ରୀଛାତ୍ରଙ୍କ ଉପରେ ପଡ଼ିବ।ବିଶେଷଜ୍ଞମାନଙ୍କ ମତରେ, ଏହି ନିଷ୍ପତ୍ତି ଲାଗୁ ହେଲେ ଆମେରିକାରେ ପଢ଼ିବା ଏବଂ ପଢ଼ା ପରେ ଚାକିରି କରିବାର ଖର୍ଚ୍ଚ ଅନେକଗୁଣ ବଢ଼ିଯିବ । ଫଳରେ ହଜାର ହଜାର ଭାରତୀୟ ଛାତ୍ରଙ୍କ ବିଦେଶରେ କ୍ୟାରିୟର ଗଢ଼ିବାର ସ୍ୱପ୍ନ ପ୍ରଭାବିତ ହୋଇପାରେ।
