ଶିକାଗୋ,୨୪ା୧୨: କରୋନା ସହିତ ବର୍ତ୍ତମାନ ଆମେରିକା ଶୀତଦିନିଆ ବାତ୍ୟା (ବମ୍ବ ସାଇକ୍ଲୋନ) ସହ ସଂଘର୍ଷ କରୁଛି। ବମ୍ବ ସାଇକ୍ଲୋନ ଯୋଗୁ ଯୁକ୍ତରାଷ୍ଟ୍ର ଆମେରିକାର ପଶ୍ଚିମ ମୋଣ୍ଟାନା ରାଜ୍ୟରେ ଶୁକ୍ରବାର ତାପମାତ୍ରା ମାଇନସ୍ ୪୫ ଡିଗ୍ରୀକୁ ତଳକୁ ଖସିଆସିଛି। ସେହିପରି ଡେସ ମୋଇନେସ୍, ଆଇୱା ଭଳି ସ୍ଥାନଗୁଡିକରେ ତାପମାତ୍ରା ମାଇନସ୍ ୩୭ ଥିବା ନେଇ ଜାତୀୟ ପାଣିପାଗ ବିଭାଗ ପକ୍ଷରୁ ସୂଚନା ଦିଆଯାଇଛି। ପ୍ରବଳ ତୁଷାର ଝଡ଼ ଯୋଗୁ ୩ହଜରରୁ ଊର୍ଦ୍ଧ୍ୱ ବିମାନ ବାତିଲ ହେବା ସହ ଅଧିକାଂଶ ରାଜପଥ ବନ୍ଦ ହୋଇଯାଇଛି। ଅନ୍ୟପଟେ କାଲୁଆ ପବନ ସାଙ୍ଗକୁ ପ୍ରବଳ ଶୀତ ଯୋଗୁ ଲକ୍ଷ ଲକ୍ଷ ଲୋକ ପ୍ରଭାବିତ ହେବା ସହ ଘରୁ ବାହାରକୁ ବାହାରି ପାରୁନାହାନ୍ତି।
ଫଳରେ ଅନେକ ବ୍ୟବସାୟ ପ୍ରଭାବିତ ହୋଇଥିବା ଜଣାପଡ଼ିଛି। ଏପରିକି ସହରରେ ବିଦ୍ୟୁତ୍ ସେବା ମଧ୍ୟ ବନ୍ଦ ହୋଇଯାଇଛି। ୧.୪ ମିଲିୟନ୍ରୁ ଊର୍ଦ୍ଧ୍ୱ ଲୋକ ବ୍ଲାକ୍ଆଉଟ୍ର ପରିସ୍ଥିତି ସାମ୍ନା କରୁଥିବା ବେଳେ ପାଣି ଯୋଗାଣ ମଧ୍ୟ ବନ୍ଦ ରହିଛି। ଅନ୍ୟପଟେ ଶୁକ୍ରବାର ବମ୍ ସାଇକ୍ଲୋନ୍ ଯୋଗୁ ମୃତ୍ୟୁ ସଂଖ୍ୟା ୧୩କୁ ବୃଦ୍ଧି ପାଇଛି। ପୂର୍ବରୁ ଖରାପ୍ ପାଣିପାଗ ଯୋଗୁ ୯ଜଣ ନିଜର ପ୍ରାଣ ହରାଇଥିବା ବେଳେ ବର୍ତ୍ତମାନ ଓହିୟୋରେ କାର ଦୁର୍ଘଟଣାରେ ଆଉ ୪ଜଣଙ୍କର ମୃତ୍ୟୁ ହୋଇଛି। ତେଣୁ ନୁୟର୍କ ଗଭର୍ନର ଦେଶରେ ଜରୁରୀକାଳୀନ ପରିସ୍ଥିତି ଘୋଷଣା କରିବା ସହ ଲୋକଙ୍କୁ ଘର ଭିତରେ ରହିବାକୁ ଏବଂ ସଜାଗ ରହିବାକୁ ଅନୁରୋଧ କରିଛନ୍ତି।
