ନୂଆଦିଲ୍ଲୀ,୨୯ ।୧୨: ଆଗ୍ରା-ଲକ୍ଷ୍ନୌ ଏକ୍ସପ୍ରେସ ୱେରେ ସୋମବାର ଏକ ବଡ ଦୁର୍ଘଟଣା ହୋଇଛି । ଏଥିରେ ୮ ଜଣ ଗୁରୁତର ଆହତ ହୋଇଥିବା ବେଳେ ୩ ଜଣଙ୍କ ମୃତ୍ୟୁ ହୋଇଛି । କୁହୁଡି ଯୋଗୁ ୫ଟି ଗାଡି ପରସ୍ପର ମଧ୍ୟରେ ଧକ୍କା ହେବାରୁ ଏହି ଦୁର୍ଘଟଣା ହୋଇଛି । ଦୁର୍ଘଟଣା ସମ୍ପର୍କରେ ସୂଚନା ମିଳିବା ପରେ ଏକ୍ସପ୍ରେସୱେର ପାଟ୍ରୋଲିଂ ଟିମ ଓ ପୋଲିସ ଘଟଣାସ୍ଥଳରେ ପହଞ୍ଚିଥିଲେ । ଏହାପରେ ଉଦ୍ଧାର କାର୍ଯ୍ୟ ଆରମ୍ଭ ହୋଇଥିଲା । ଆହତଙ୍କୁ ଚିକିତ୍ସା ଲାଗି ତିର୍ବା ମେଡିକାଲ କଲେଜରେ ଭର୍ତ୍ତି କରାଯାଇଛି । ସୂଚନାଯୋଗ୍ୟ, ସୋମବାର କୁହୁଡି ଯୋଗୁ ଜିରୋ ଭିଜିବଲିଟି ହୋଇଥିବାରୁ ଏହି ଦୁର୍ଘଟଣା ହୋଇଛି । ସୂଚନାଯୋଗ୍ୟ, ଉମରୈନ ଗାଁ ନିକଟରେ ଏକ ଟ୍ରକକୁ ସ୍ଲିପର ବସ ଧକ୍କା ଦେଇଥିଲା । ଏହାପଛରେ ଥିବା ଏକ ଅଲଟୋ କାର ବସକୁ ଧକ୍କା ଦେଇଥିଲା । ଏପଟେ ଟ୍ରକଟି ଯାଇ ଡିଭାଇଡରରେ ପିଟି ହୋଇଯାଇଥିଲା । ଏତିକିରେ ସରି ନ ଥିଲା, ଏହି ସମୟରେ ପଛରୁ ଆସୁଥିବା ଏକ ସ୍ଲିପର ବସ ଡିଭାଇଡରରେ ପିଡି ହୋଇ ଠିଆ ହୋଇଥିବା ଟ୍ରକକୁ ଧକ୍କା ଦେଇଥିଲା । ଏହିଭଳି ଭାବରେ ଗୋଟିଏ ପରେ ଗୋଟିଏ ଗାଡି ପରସ୍ପର ମଧ୍ୟରେ ଧକ୍କା ଦେବାରୁ ସେଠାରେ ଥିବା ଲୋକେ ଏଣେତେଣେ ଦୌଡିବାକୁ ଲାଗିଥିଲେ ।
