ଭୁବନେଶ୍ବର,୧୫ା୮(ବ୍ୟୁରୋ): ମହାନଦୀକୁ ନେଇ ଏବେ ପୁଣି ଛତିଶଗଡ଼ ଏବଂ ଓଡ଼ିଶା ମଧ୍ୟରେ ଲଢ଼େଇ ଆରମ୍ଭ ହୋଇଛି। ମହାନଦୀରେ ଜଳସ୍ତର ବଢ଼ିବା କାରଣରୁ ଛତିଶଗଡ଼ ପଟେ ବନ୍ୟା ସ୍ଥିତି ସୃଷ୍ଟି ହୋଇଥିବା ବେଳେ ହୀରାକୁଦର ଅଧିକ ଫାଟକ ଖୋଲିବା ଲାଗି ଛତିଶଗଡ଼ ସରକାର ଅନୁରୋଧ କରିଛନ୍ତି। ହେଲେ ଖୋଦ୍ ରାଜ୍ୟ ସରକାରଙ୍କ ଜଳସମ୍ପଦ ମନ୍ତ୍ରୀ ଟୁକୁନି ସାହୁ ଏ କଥାକୁ ଅଗ୍ରାହ୍ୟ କରିଦେଇଛନ୍ତି। ଛତିଶଗଡ଼ କଥାରେ ଅଧିକ ଫାଟକ ଖୋଲାଯାଇପାରିବ ନାହିଁ ବୋଲି ମନ୍ତ୍ରୀ ସାହୁ ସିଧାସଳଖ ଶୁଣାଇ ଦେଇଛନ୍ତି। ତେବେ ସରକାରଙ୍କ ଏଭଳି ଆଭିମୁଖ୍ୟ ପରେ ମହାନଦୀକୁ ନେଇ ଆଗକୁ ଓଡ଼ିଶା ଏବଂ ଛତିଶଗଡ ମଧ୍ୟରେ ରାଜନୈତିକ ଲଢ଼େଇ ବଢ଼ିପାରେ ବୋଲି ଆକଳନ ଆରମ୍ଭ ହୋଇଛି।
ମନ୍ତ୍ରୀ ସାହୁ କହିଛନ୍ତି, ଓଡ଼ିଶା ତାହାର ଆବଶ୍ୟକତା ଅନୁଯାୟୀ ହୀରାକୁଦର ଫାଟକ ଖୋଲିବ। ଏବେ ୩୪ଟି ଫାଟକ ଖୋଲାଯାଇଛି। ଛତିଶଗଡ଼ କଥାରେ ଅଧିକ ଫାଟକ ଖୋଲାଯାଇପାରିବ ନାହିଁ। ସେଠାରେ ବନ୍ୟା ସ୍ଥିତି ସୃଷ୍ଟି ହେବା ପରେ ଛତିଶଗଡ଼ ସରକାର ଏଥିରୁ ନିସ୍ତାର ପାଇବାକୁ ଓଡ଼ିଶା ସରକାରଙ୍କୁ ମହାନଦୀ ଫାଟକ ଖୋଲିବାକୁ ଅନୁରୋଧ କରିଛନ୍ତି। ଅନ୍ୟପକ୍ଷରେ ରାଜ୍ୟରେ ନଦୀଗୁଡ଼ିକରେ ବନ୍ୟା ପାଣି ପଶିବା ପରେ ଏଥିପାଇଁ ଛତିଶଗଡ଼ ସରକାରଙ୍କୁ କଂଗ୍ରେସ ବିଧାୟକ ସୁରେଶ କୁମାର ରାଉତରାୟ ଦାୟୀ କରିବା ଆଉ ଏକ ଚର୍ଚ୍ଚାର ବିଷୟ ପାଲଟିଛି। ଛତିଶଗଡ଼ରେ ଏବେ କଂଗ୍ରେସ ସରକାର ଥିବାବେଳେ ସୁରେଶ ରାଉତରାୟଙ୍କ ମନ୍ତବ୍ୟ ଆଗକୁ ଦଳକୁ ମହଙ୍ଗା ସାବ୍ୟସ୍ତ ହୋଇପାରେ ବୋଲି ରାଜନୈତିକ ମହଲରେ ଚର୍ଚ୍ଚା ହେଉଛି। ସୁରେଶ ରାଉତରାୟ କହିଛନ୍ତି, ନୂଆ ବନ୍ୟା ପାଣି ଦେଖି ଖୁସି ଲାଗୁଛି। କିନ୍ତୁ ଯେଉଁ ପାଣି ବଢ଼ିଛି ସେଥିଲାଗି ଛତିଶଗଡ଼ ଦାୟୀ। କାହିଁକି ଛତିଶଗଡ଼ ମହାନଦୀ ଉପରେ ୧୧ଟି ବ୍ୟାରେଜ ନିର୍ମାଣ କଲା, ଯେଉଁଥିଲାଗି ବନ୍ୟାରେ ଏବେ ଉବୁଟୁବୁ ହେଉଛି। ଏବେ ଓଡ଼ିଶା ସରକାରଙ୍କୁ ଅନୁରୋଧ କରୁଛି ମହାନଦୀ ପାଣି ଛାଡ଼ିଦିଅ। ସେମାନେ ମନଇଚ୍ଛା ବ୍ୟାରେଜ କରି ମହାନଦୀକୁ ଓଡ଼ିଶାରେ ଶୁଖିଲା କରିଦେଲେ। ଏବେ ପାଣି ବଢ଼ିଲାରୁ ଦେଖିବାକୁ ଆସିଛୁ। ମୁଖ୍ୟମନ୍ତ୍ରୀ କୌଣସି ମତେ ଛତିଶଗଡ଼ କଥା ଶୁଣିବା ଠିକ୍ ହେବନାହିଁ। ଓଡ଼ିଶା ପାଣି ଯେପରି ଭବିଷ୍ୟତରେ ବନ୍ଧ ଦ୍ୱାରା ରହିପାରିବ ସେଥିଲାଗି ବ୍ୟବସ୍ଥା ତୁରନ୍ତ ହେବା ଜରୁରୀ। ମୁଖ୍ୟମନ୍ତ୍ରୀ ନିଜେ ପ୍ରତିଶ୍ରୁତି ଦେଇଥିଲେ ଯେ ୧୫ ହଜାର କୋଟି ଟଙ୍କା ଖର୍ଚ୍ଚ କରି ତଳମୁଣ୍ଡରେ ବନ୍ଧ କରି ପାଣି ରଖାଯିବ, ଯେଉଁଥିରେ ଓଡ଼ିଶା ଲୋକ ପିଇବା ପାଣି ପାଇପାରିବେ। ତୁରନ୍ତ ସରକାର ଏହି କାମ ନ କଲେ ଜନଆନ୍ଦୋଳନ ହେବ ବୋଲି ସୁରେଶ କହିଛନ୍ତି।
