ଓ୍ବାଶିଂଟନ,୧୯।୧୦: ସାଉଦି ଆରବ ନେତୃତ୍ୱାଧୀନ ତୈଳ ଉତ୍ପାଦନକାରୀ ଓପେକ ପ୍ଲସ୍ ଦେଶଗୁଡ଼ିକ ପକ୍ଷରୁ ତୈଳ ଉତ୍ପାଦନ ହ୍ରାସ ଘୋଷଣା କରିବା ପରେ ଏହାକୁ ନେଇ ଆମେରିକା କ୍ରୋଧିତ ହୋଇଛି। ଆମେରିକା କହିଛି ଯେ ଏହି ସବୁ ଦେଶର ନିଷ୍ପତ୍ତି ପଛରେ ରୁଷିଆର ସମର୍ଥନ ରହିଛି। ଏହା ଯୋଗୁ ଭବିଷ୍ୟତରେ ଅସୁବିଧା ସୃଷ୍ଟି ହେବ ବୋଲି ଆମେରିକା କହିଛି।
ଓପେକ୍ ପ୍ଲସ୍ ଦେଶଗୁଡ଼ିକ ନିକଟରେ ତୈଳ ଉତ୍ପାଦନ ଦିନକୁ ୨୦ ଲକ୍ଷ ବ୍ୟାରେଲ ହ୍ରାସ କରିବାକୁ ନିଷ୍ପତ୍ତି ଗ୍ରହଣ କରିଛନ୍ତି। ଏହା ରାଷ୍ଟ୍ରପତି ଜୋ ବାଇଡେନଙ୍କ ଚିନ୍ତାକୁ ବଢ଼ାଇ ଦେଇଛି। ଏନେଇ ହ୍ବାଇଟ ହାଉସର ପ୍ରେସ ସଚିବ କରାଇନ ଜିନ-ପିୟରେ ଖବରଦାତାମାନଙ୍କୁ ସମ୍ବୋଧିତ କରି କହିଛନ୍ତି ଯେ ଗତ ସପ୍ତାହରେ ଓପେକ୍ ଦେଶଗୁଡ଼ିକର ନିଷ୍ପତ୍ତି ରୁଷିଆ ସପକ୍ଷରେ ଏବଂ ଆମେରିକାର ସ୍ବାର୍ଥ ବିରୁଦ୍ଧରେ ଥିଲା। ଆମେ ବିଶ୍ୱାସ କରୁ ଏହି ନିଷ୍ପତ୍ତି ନିମ୍ନ ଆୟକାରୀ ଅର୍ଥନୀତିକୁ କ୍ଷତି ପହଞ୍ଚାଇବାକୁ ଯାଉଛି। ଏକ ପ୍ରଶ୍ନର ଉତ୍ତରରେ ସେ କହିଛନ୍ତି ଯେ ଏହା ବିଭ୍ରାନ୍ତିକର ଏବଂ ଏହା ଏକ ଭୁଲ ଏବଂ ଅଦୂରଦୃଷ୍ଟିପୂର୍ଣ୍ଣ ନିଷ୍ପତ୍ତି।
