ଫତେହାବାଦ (ହରିୟାଣା), ୨୬।୯ (ପି.ଟି.): ୨୦୨୪ରେ ସରକାର ବଦଳାଇବାକୁ ହେଲେ ସବୁ ବିରୋଧୀ ଦଳ ଏକାଠି କାମ କରିବା ସମୟ ଆସିଛି ବୋଲି ଏନ୍ସିପି ଅଧ୍ୟକ୍ଷ ଶରଦ ପାଓ୍ବାର ରବିବାର କହିଛନ୍ତି। ହରିୟାଣାର ଫତେହାବାଦରେ ଇଣ୍ଡିଆନ୍ ନ୍ୟାଶନାଲ ଲୋକ ଦଳ (ଆଇଏନ୍ଏଲ୍ଡି) ପକ୍ଷରୁ ଆୟୋଜିତ ବିଶାଳ ରାଲିକୁ ଉଦ୍ବୋଧନ ଦେଇ ପାଓ୍ବାର କହିଥିଲେ, କୃଷି ଆଇନକୁ ବିରୋଧ କରି ଚାଷୀ ଆତ୍ମହତ୍ୟା କରିବା ସମାଧାନ ନୁହେଁ, ସରକାର ବଦଳାଇବା ଦ୍ୱାରା ପ୍ରକୃତ ସମାଧାନ ଆସିପାରିବ। ରାଲିରେ ବିହାର ମୁଖ୍ୟମନ୍ତ୍ରୀ ନୀତୀଶ କୁମାର, ଶିରୋମଣି ଅକାଳୀ ଦଳ ନେତା ସୁଖବୀର ସିଂ ବାଦଲ, ଆର୍ଜେଡି ନେତା ତଥା ବିହାର ଉପମୁଖ୍ୟମନ୍ତ୍ରୀ ତେଜସ୍ବୀ ଯାଦବ ଓ ଅନ୍ୟ ନେତାମାନେ ଯୋଗ ଦେଇଥିଲେ।
କଂଗ୍ରେସ ଓ ବାମଦଳ ସମେତ ସମସ୍ତ ଅଣଭାଜପା ଦଳ ଏକାଠି ହେବା ଲାଗି ରାଲିରେ ନୀତୀଶ ଆହ୍ବାନ ଦେଇଥିଲେ। ସବୁ ବିରୋଧୀ ଦଳକୁ ନେଇ ଗୋଟିଏ ସାମ୍ମୁଖ୍ୟ ଗଢ଼ାଗଲେ ୨୦୨୪ ସାଧାରଣ ନିର୍ବାଚନରେ ଗୈରିକ ଦଳକୁ ନିଶ୍ଚୟ ହରାଇପାରିବା ବୋଲି ସେ କହିଥିଲେ। ତୃତୀୟ ସାମ୍ମୁଖ୍ୟର ପ୍ରଶ୍ନ ଉଠୁନାହିଁ। କଂଗ୍ରେସ ସମେତ ସବୁ ଦଳକୁ ନେଇ ଗୋଟିଏ ଫ୍ରଣ୍ଟ ହେବା ସମୟର ଆବଶ୍ୟକତା ବୋଲି ବିହାର ମୁଖ୍ୟମନ୍ତ୍ରୀ ତଥା ଜେଡିୟୁ ନେତା କହିଛନ୍ତି। ସେ ପ୍ରଧାନମନ୍ତ୍ରୀ ପ୍ରାର୍ଥୀ ନୁହନ୍ତି ବୋଲି ଏହି ଅବସରରେ ନୀତୀଶ ସ୍ପଷ୍ଟ କରିଛନ୍ତି। ରାଲିରେ ତେଜସ୍ବୀ କହିଥିଲେ, ସମ୍ବିଧାନ ଓ ଗଣତନ୍ତ୍ରର ରକ୍ଷା ଲାଗି ଭାଜପା ନେତୃତ୍ୱାଧୀନ ଏନ୍ଡିଏରୁ ଜେଡିୟୁ,ଅକାଳୀ ଦଳ ଏବଂ ଶିବସେନା ବାହାରି ଆସିଛନ୍ତି। ଭାଜପା ଦେଶବାସୀଙ୍କୁ ମିଥ୍ୟା ପ୍ରତିଶ୍ରୁତି ଦେଇଆସୁଛି। ଏହା ସବୁଠୁ ମିଛୁଆ ଦଳ ବୋଲି ତେଜସ୍ବୀ କହିଛନ୍ତି।
