ରାଜକନିକା, ୧୯ା୫ (ଡି.ଏନ୍.ଏ.): କେନ୍ଦ୍ରାପଡ଼ା ଜିଲାର ଉପାନ୍ତ ଅଞ୍ଚଳ ରାଜକନିକା ବ୍ଲକର ବାରାହାଦୋମଣ୍ଡା ପଞ୍ଚାୟତ। ଏହି ପଞ୍ଚାୟତର ମାନପୁର, ବାରାହା ଦୋମଣ୍ଡା, କାଏମା ଦୋମଣ୍ଡା, ବାରାହା କନପୁର, କାଏମା କନପୁର ଓ ଗୁଣ୍ଠଳ ଆଦି ୬ଟି ଗଁା ରହିଛି। ତେବେ ଦୈନିକ ଏହି ଅଞ୍ଚଳର ଲୋକେ ବୈତରଣୀ ନଦୀର ମାନପୁର ଘାଟ ପାର ହୋଇ ଭଦ୍ରକ ଜିଲାର ଆରଡ଼ିକୁ ଯିବା ଆସିବା କରିଥାନ୍ତି। ଓଡ଼ିଶାର ବିଭିନ୍ନ ଅଞ୍ଚଳରୁ ଦୈନିକ ଶହ ଶହ ଭକ୍ତ ଭଦ୍ରକ ଜିଲା ଆରଡ଼ିରେ ଥିବା ଆଖଣ୍ଡଳମଣି ଠାକୁରଙ୍କ ଦର୍ଶନ ପାଇଁ ଆସିଥାନ୍ତି। ସେହିପରି ବର୍ଷାଦିନେ ଓଡ଼ିଶାର ବିଭିନ୍ନ ଅଞ୍ଚଳରୁ ହଜାର ହଜାର କାଉଡିଆ ଗାଡ଼ିରେ ଆସି ମାନପୁର ଘାଟ ପାର ହେବା ପାଇଁ ଭିଡ଼ ଜମାଇଥାନ୍ତି। ତେବେ ମାନପୁର ଘାଟରେ ହୁଲିଡଙ୍ଗା ହିଁ ଏକମାତ୍ର ସାହା ଭରସା। ପୁଣି ସେହି ଡଙ୍ଗାରେ ଜ୍ୟାକେଟ ବ୍ୟବସ୍ଥା ନାହିଁ। ପ୍ରଶାସନର ଏଥିପ୍ରତି ମଧ୍ୟ ଦୃଷ୍ଟି ନାହିଁ। ଏଠାରେ ଭିତରକନିକାରୁ ଶତାଧିକ କୁମ୍ଭୀର ଆସି ଯାତାୟାତ କରିଥାନ୍ତି। ଏହି ନଦୀ ଜୁଆରିଆ, ପଙ୍କୁଆ ସହ ଅତି ଗଭୀର। ଯଦି ଏଠାରେ ଡଙ୍ଗା ବୁଡିଯାଏ ତେବେ ଲୋକେ କୁମ୍ଭୀର ହାବୁଡ଼ରେ ପଡ଼ିଥାନ୍ତି। ଏଠାରେ ବୈତରଣୀ ନଦୀରେ ପୋଲ ନିର୍ମାଣ ପାଇଁ ଆଜକୁ ୫୦ ବର୍ଷ ହେଲା ବହୁ ବିଧାୟକ ଓ ସାଂସଦଙ୍କ ନିକଟରେ ସ୍ଥାନୀୟ ଲୋକେ ଦାବିକରି ଆସୁଛନ୍ତି। ଭୋଟ ସମୟରେ ରାଜନେତାମାନେ ଲୋକଙ୍କୁ ପ୍ରଭାବିତ କରି ଭୋଟ ନିଅନ୍ତି। ପ୍ରତିଶ୍ରୁତି ମଧ୍ୟ ଦିଅନ୍ତି। ପରେ ସବୁ ଭୁଲିଯାଆନ୍ତି। ଆଖଣ୍ଡଳମଣି ମନ୍ଦିର ପରିସର ହେଉଛି କନିକା ରାଜାଙ୍କ ସମ୍ପତ୍ତି। ତାଙ୍କ ପୂର୍ବପୁରୁଷ ଏହି ମନ୍ଦିର ନିର୍ମାଣ କରାଇ ଥିଲେ। ପଣ୍ଡାମାନଙ୍କୁ ଏଠାରେ ସମ୍ପତ୍ତିବାଡ଼ି ଦେଇଥିଲେ। ପୁରୁଷ ପୁରୁଷ ଧରି ପଣ୍ଡାମାନେ ଏହି ସମ୍ପତ୍ତିବାଡ଼ି ଭୋଗ ଦଖଲ କରିଆସୁଛନ୍ତି। ୨୦୨୧ ଡିସେମ୍ବରରେ ଆଇନ ମନ୍ତ୍ରୀ ପ୍ରତାପ ଜେନା ଓ ଆଳି ବିଧାୟକ ପ୍ରତାପ କେଶରୀ ଦେବ ଓଳାଭରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମାନପୁର ପୋଲ ପାଇଁ ୭୯ କୋଟି ଓ ବଳିତରଘାଟ ପୋଲ ଲାଗି ୧୦୮ କୋଟି ମଞ୍ଜୁର କରିଛନ୍ତି ବୋଲି କହିଥିଲେ। ତେବେ ଆଜକୁ ୪୦ ବର୍ଷ ତଳେ ଏହି ପୋଲ ପାଇଁ ୧୦ କୋଟି ଅଟକଳ ହୋଇଥିଲା। ପରବର୍ତ୍ତୀ ଅବସ୍ଥାରେ ୨୦ କୋଟି ହୋଇଥିଲା। ପୋଲ ଆରମ୍ଭ ହେବାକୁ ଯାଉଥିବା ବେଳେ କେନ୍ଦ୍ର ସରକାର ଯାଜପୁର ରୋଡ୍ରୁ ନଦୀରେ ଧାମରା ବନ୍ଦରକୁ କଞ୍ଚାମାଲ ପରିବହନ ପାଇଁ ସ୍ଥିର କଲେ। ଓଡ଼ିଶା ସରକାର କେନ୍ଦ୍ରୀୟ ପରିବହନ ମନ୍ତ୍ରଣାଳୟକୁ ପୋଲ ନିର୍ମାଣ ନିମନ୍ତେ ମଞ୍ଜୁର ପାଇଁ ୨ ବର୍ଷ ହେବ ପଠାଇଛନ୍ତି। ହେଲେ ଏହାକୁ ଏପର୍ଯ୍ୟନ୍ତ ମଞ୍ଜୁରୀ ମିଳିନାହିଁ। ତେବେ ବର୍ତ୍ତମାନ ଏହି ପୋଲର ଅଟକଳ ୧୦ କୋଟିରୁ ୭୯ କୋଟିରେ ପହଞ୍ଚତ୍ଛି। ହେଲେ ଏପର୍ଯ୍ୟନ୍ତ କାମ ଆରମ୍ଭ ହୋଇନାହିଁ। କେବେ କାମ ଆରମ୍ଭ ହୋଇ ସରିବ ଏହାକୁ ନେଇ ସ୍ଥାନୀୟ ଲୋକେ ସନ୍ଦେହଘେରରେ ରହିଛନ୍ତି। ତେଣୁ ତୁରନ୍ତ ଏହି ପୋଲ ନିର୍ମାଣ ଆରମ୍ଭ କରିବାକୁ ବାରାହା ଦୋମଣ୍ଡା ସରପଞ୍ଚ ପ୍ରସନ୍ନ ମଳିକ, ପୂର୍ବତନ ସରପଞ୍ଚ ପ୍ରଦୀପ୍ତ ବେଉରିଆ, ଦାମୋଦର ନାୟକ, ପ୍ରାକ୍ତନ ସରପଞ୍ଚ ବୀରସେନ ବାରିକ, ପୂର୍ବତନ ସରପଞ୍ଚ ବୀରଭଦ୍ର ମଳିକ ଓ ସାମାଜିକ କର୍ମୀ ନିରଞ୍ଜନ ମଳିକ ପ୍ରମୁଖ ଆଳି ବିଧାୟକ ଦେବଙ୍କ ସମେତ ରାଜ୍ୟ ସରକାରଙ୍କ ନିକଟରେ ଦାବି କରିଛନ୍ତି। ଏହି ପୋଲ ସମ୍ପୂର୍ଣ୍ଣ ହେଲେ ଓଡ଼ିଶାର ବିଭିନ୍ନ ଜିଲାର ପର୍ଯ୍ୟଟକ ଆଖଣ୍ଡଳମଣିଙ୍କୁ ଦର୍ଶନ ସହ କେନ୍ଦ୍ରାପଡ଼ା, ଭଦ୍ରକ, ବାଲେଶ୍ୱର ଓ ଯାଜପୁର ଜିଲା ମଧ୍ୟରେ ଯୋଗାଯୋଗ ସମ୍ଭବ ହେବ ବୋଲି ଜଣାପଡ଼ିଛି।
