ଜଗତ୍ସିଂହପୁର ଅଫିସ, ୨୫ା୧୦: ଜଗତ୍ସିଂହପୁର ଜିଲାରେ ବିଦ୍ୟୁତ୍ କାଟ ଚିନ୍ତାର କାରଣ ପାଲଟିଛି। ପ୍ରତ୍ୟହ ଅଘୋଷିତ ବିଦ୍ୟୁତ୍ କାଟକୁ ନେଇ ଉପଭୋକ୍ତାଙ୍କ ମଧ୍ୟରେ ଅସନ୍ତୋଷ ବଢ଼ିବାରେ ଲାଗିଛି। ଏପରିକି ଜିଲା ମୁଖ୍ୟାଳୟରେ ବାରମ୍ବାର ଅଘୋଷିତ ବିଦ୍ୟୁତ କାଟକୁ ନେଇ ଚାପା ଉତ୍ତେଜନା ସୃଷ୍ଟି ହେଉଛି।
ବିଦ୍ୟୁତ୍ ବଣ୍ଟନ ପାଇଁ ଟାଟା ପାୱାର ଓ ଓଡ଼ିଶା ସରକାର ମଧ୍ୟରେ ଚୁକ୍ତି ହେବାପରେ ଏଥିରେ ସୁଧାର ଆସିବ ବୋଲି ଆଶା କରାଯାଉଥିଲା। ସେତେବେଳେ ଟିପିସିଓଡିଏଲ୍ (ଟାଟା ପାଓ୍ବାର ସେଣ୍ଟ୍ରାଲ ଓଡ଼ିଶା ଡିଷ୍ଟ୍ରିବ୍ୟୁଶନ ଲିମିଟେଡ୍) ପକ୍ଷରୁ ଭିତ୍ତିଭୂମି ଓ ଗ୍ରାହକ ସେବା ଉପରେ ଧ୍ୟାନ ଦିଆଯିବ ବୋଲି କୁହାଯାଇଥିଲା। କିନ୍ତୁ ଉପଭୋକ୍ତା ଉତ୍ତମ ସେବା ପାଇବା ପରିବର୍ତ୍ତେ ଅଧିକ ଅସୁବିଧାର ସମ୍ମୁଖୀନ ହେଉଥିବା ଅଭିଯୋଗ ହୋଇଛି। ଶନିବାର ସକାଳୁ ଅପରାହ୍ନ ୫ଟା ପର୍ଯ୍ୟନ୍ତ ଜଗତ୍ସିଂହପୁର ସହରରେ ଅଘୋଷିତ ବିଦ୍ୟୁତ କାଟ ହୋଇଥିଲା। ଫଳରେ ପାଣି ମୋଟରଗୁଡିକ ଚାଲି ନ ପାରିବାରୁ ସହରରେ ପାନୀୟ ଜଳ ଯୋଗାଣ ସମ୍ଭବ ହୋଇପାରି ନ ଥିଲା ବୋଲି ଜନସ୍ବାସ୍ଥ୍ୟ ବିଭାଗ ପକ୍ଷରୁ କୁହାଯାଇଥିଲା। ଏନେଇ ସହରରେ ତୀବ୍ର ଅସନ୍ତୋଷ ପାଇଥିଲା। ଅନେକ ପରିବାର ସଦସ୍ୟ ସ୍ନାନ ତ ଦୂରର କଥା ରୋଷେଇ କରିବା ପାଇଁ ମଧ୍ୟ ଆବଶ୍ୟକ ପାଣି ପାଇ ନ ଥିଲେ ବୋଲି କହିଛନ୍ତି। ଏଭଳି ଘଟଣା ବହୁ ସମୟରେ ଘଟୁଥିବା ବେଳେ ବିଦ୍ୟୁତ ସରବରାହ ସ୍ବାଭାବିକ ହେଉ ନ ଥିବାରୁ ଅନେକ ଲୋକଙ୍କ ଇଲେକ୍ଟ୍ରୋନିକ୍ ଉପକରଣ ଖରାପ ହେବାରେ ଲାଗିଛି। ଫଳରେ ଉପଭୋକ୍ତାମାନେ ଶୋଷଣର ଶିକାର ହେଉଛନ୍ତି।
ଏ ସମ୍ପର୍କରେ ବିଭାଗୀୟ ନିର୍ବାହୀ ଯନ୍ତ୍ରୀ ବିରଜା ପ୍ରସାଦ ପାଢୀ କହିଛନ୍ତି, ଜରୁର ଦୃଷ୍ଟିରୁ ଶନିବାର ସକାଳେ ଜଗତ୍ସିଂହପୁର ସହରରେ ବିଦ୍ୟୁତ୍ କାଟ କରାଯାଇଥିଲା। କାମ ପରେ ମଧ୍ୟାହ୍ନରେ ବିଦ୍ୟୁତ୍ ସରବରାହ ସ୍ବାଭାବିକ ହୋଇଯାଇଛି। କିନ୍ତୁ କଲେଜ ଛକ ନିକଟ ଟ୍ରାନ୍ସଫର୍ମରେ ଯାନ୍ତ୍ରିକ ତ୍ରୁଟି ଯୋଗୁ ପୁନଙ୍ଗଫିଡର ଅଞ୍ଚଳରେ ବିଦ୍ୟୁତ ସେବା ବିଚ୍ଛିନ୍ନ ହୋଇଯାଇଥିଲା। ଅପରାହ୍ନ ୫ଟାରେ ଏହା ସ୍ବାଭାବିକ ହୋଇଥିଲା। ଏହାଛଡା ଉପଭୋକ୍ତାଙ୍କ ଅନ୍ୟାନ୍ୟ ସମସ୍ୟାର ସମାଧାନ ପାଇଁ ଚେଷ୍ଟା ଚାଲିଛି ବୋଲି ନିର୍ବାହୀ ଯନ୍ତ୍ରୀ କହିଛନ୍ତି।
