କ୍ୱିଭ୍,୨୫।୨: ରୁଷିଆର ଆକ୍ରମଣ ପରେ ୟୁକ୍ରେନରେ ଏକ ଭୟଙ୍କର ଯୁଦ୍ଧ ଚାଲିଛି। ଚାରିଆଡେ ଭୟ ଏବଂ ବିନାଶର ଦୃଶ୍ୟ ଦେଖିବାକୁ ମିଳିଛି। ଏହି ସମୟରେ, ୟୁକ୍ରେନର ରାଷ୍ଟ୍ରପତି ଭ୍ଲୋଡିମିର୍ ଜେଲେନସ୍କି ଏକ ଭାବପ୍ରବଣ ବାର୍ତ୍ତା ଦେଇଛନ୍ତି। ସେ କହିଛନ୍ତି- ଯୁଦ୍ଧରେ ସମସ୍ତେ ଆମକୁ ଏକୁଟିଆ ଛାଡିଦେଇଛନ୍ତି। ଯେଉଁମାନେ ଏହି ଯୁଦ୍ଧରେ ପ୍ରାଣ ହରାଇଛନ୍ତି ସେମାନେ ୟୁକ୍ରେନର ହିରୋମାନଙ୍କଠାରୁ କମ ନୁହଁନ୍ତି। ସାଧାରଣ ନାଗରିକଙ୍କ ଉପରେ ରୁଷିଆର ଆକ୍ରମଣକୁ ସେ ନିନ୍ଦା କରିଛନ୍ତି। ୟୁକ୍ରେନରେ ଏପର୍ଯ୍ୟନ୍ତ ୧୩୭ ସୈନିକ ଏବଂ ସାଧାରଣ ନାଗରିକଙ୍କ ମୃତ୍ୟୁ ହୋଇଥିବା ସୂଚନା ମିଳିଛି। ଏହି ବିସ୍ଫୋରଣରେ ୩୧୬ଜଣ ଆହତ ହୋଇଛନ୍ତି।
ରାଷ୍ଟ୍ରପତି କହିଛନ୍ତି,ରୁଷିଆର ଏହି କାର୍ଯ୍ୟ ଭୁଲ ଅଟେ। ଏହା ପୂର୍ବରୁ ଦାବି କରିଛି ଯେ ଏହା କେବଳ ସାମରିକ ଟାର୍ଗେଟ ଉପରେ ଆକ୍ରମଣ କରିବ, କିନ୍ତୁ ରୁଷିଆ ସୈନ୍ୟବାହିନୀ ଏବଂ ଯୁଦ୍ଧ ଜାହାଜ ମଧ୍ୟ ସାଧାରଣ ଅଞ୍ଚଳକୁ ଟାର୍ଗେଟ କରୁଛନ୍ତି। ସେମାନେ ଲୋକଙ୍କୁ ହତ୍ୟା କରୁଛନ୍ତି। ଶାନ୍ତ ସହରଗୁଡ଼ିକ ସାମରିକ ବେସରେ ପରିଣତ ହେଉଛି। ଏହାକୁ କଦାପି କ୍ଷମା କରାଯିବ ନାହିଁ । ରୁଷିଆ ଓଡେସା ଦ୍ୱୀପ ଦଖଲ କରିଛି। ସେଠାରେ ଅବସ୍ଥାପିତ ସମସ୍ତ ୟୁକ୍ରେନ ସୀମା ସୁରକ୍ଷାକରୀଙ୍କୁ ହତ୍ୟା କରାଯାଇଛି।
ଅନ୍ୟପକ୍ଷରେ, ୟୁକ୍ରେନ ଉପରେ ରୁଷିଆର ଆକ୍ରମଣ ଜାରି ରହିଛି। ଦ୍ୱିତୀୟ ଦିନରେ ରୁଷିଆର ବିମାନ ମଧ୍ୟ ବୋମାମାଡ଼ କରିଥିଲା। ଶୁକ୍ରବାର ସକାଳେ ଯୁଦ୍ଧ ଆରମ୍ଭ ହେବାର ୨୪ ଘଣ୍ଟା ବିତିଗଲାଣି। ଆମେରିକାର ପ୍ରତିରକ୍ଷା ଅଧିକାରୀଙ୍କ ଅନୁଯାୟୀ ରୁଷିଆ ଆସନ୍ତା ୯୬ ଘଣ୍ଟା ମଧ୍ୟରେ ୟୁକ୍ରେନର ରାଜଧାନୀ କ୍ୱିଭ୍କୁ କବ୍ଜା କରିବ।
