କ୍ୱିଭ,୬ ।୫: ରୁଷିଆ-ୟୁକ୍ରେନ୍ ଯୁଦ୍ଧ କିଛିଦିନ ମଧ୍ୟରେ ଶେଷ ହେବ ବୋଲି ଆଶା କରାଯାଉଛି । ହେଲେ ଏହାରି ଭିତରେ ଉଭୟ ଦେଶର ବହୁ କ୍ଷତି ହାଇଥିଲେ ବି କେହି ମୁଣ୍ଡ ନୁଆଇଁବାକୁ ରାଜି ନୁହେଁ । ରୁଷିଆ ଦ୍ୱାରା ୟୁକ୍ରେନ ଉପରେ ହୋଇଥିବା ଆକ୍ରମଣକୁ ସାରା ବିଶ୍ୱ ନିନ୍ଦା କରିଥିବା ବେଳେ ବୁଚା ନରସଂହାର ବି ଆସିଥିଲା ଚର୍ଚ୍ଚାକୁ । ନିକଟରେ ମିଳିତ ଜାତିସଂଘର ମହାସଚିବ ଆଣ୍ଟୋନିଓ ଗୁଟେରସ ୟକ୍ରେନର ବନ୍ଦର ସହରରେ ଫସି ରହିଥିବା ନାଗରିକଙ୍କୁ ଉଦ୍ଧାର କରିବା ପାଇଁ ଓକିଲାତି କରିବାକୁ ମସ୍କୋ ଓ କ୍ୱିଭ ଯାତ୍ରା କରିଥିଲେ । ଏହାପରେ ଶହ ଶହ ଲୋକଙ୍କୁ ଉଦ୍ଧାର କରାଯାଇଥିଲା । ଏହି ଯୁଦ୍ଧରେ ଲଗାତାର ଭାବେ ସାଧାରଣ ନାଗରିକ ଟାର୍ଗେଟକୁ ଆସୁଥିବା ବେଳେ ହଜାର ହଜାର ନିର୍ଦ୍ଦୋଷଙ୍କର ମୃତ୍ୟୁ ହେଉଛି । ଆଉ ଅନ୍ୟପଟେ ଲକ୍ଷ ଲକ୍ଷ ଲୋକ ଘରଛାଡି ବାହାର ଦେଶରେ ଶରଣ ନେଇଛନ୍ତି । ଇତିମଧ୍ୟରେ ୟୁକ୍ରେନ୍ ଏବେ ରୁଷିଆ ଉପରେ ବଡ ଅଭିଯୋଗ ଆଣିଛି । ୟୁକ୍ରେନ୍ କହିଛି ମସ୍କୋର ସେନା ପାଖାପାଖି ୨ ଲକ୍ଷ ୟୁକ୍ରେନ୍ ଶିଶୁଙ୍କୁ ଜବରଦସ୍ତ ରୁଷିଆ ନେଇଯାଇଛନ୍ତି । ହେଲେ ରୁଷିଆ କହିଛି, ସେ ବହୁ ସଂଖ୍ୟାରେ ୟୁକ୍ରେନବାସୀଙ୍କୁ ଉଦ୍ଧାର କରି ପରେ ରୁଷିଆ ନେଇ ଆସିଛି ।
