ଲଣ୍ଡନ/ନୂଆଦିଲ୍ଲୀ,୭।୧୧: ଅସ୍ତ୍ରଶସ୍ତ୍ର ଡିଲର ତଥା ପଳାତକ ସଞ୍ଜୟ ଭଣ୍ଡାରୀଙ୍କ ପ୍ରତ୍ୟର୍ପଣ କ୍ଷେତ୍ରରେ ଭାରତକୁ ଏକ ସଫଳତା ମିଳିଛି। ବ୍ରିଟେନର ଓ୍ବେଷ୍ଟମିନ୍ଷ୍ଟର କୋର୍ଟ ସଞ୍ଜୟଙ୍କ ଭାରତ ପ୍ରତ୍ୟର୍ପଣ ନେଇ ସୋମବାର ମଞ୍ଜୁରି ପ୍ରଦାନ କରିଛନ୍ତି। ଖୁବ୍ଶୀଘ୍ର ତାଙ୍କୁ ଭାରତ ଅଣାଯିବ। ସଞ୍ଜୟଙ୍କ ବିରୋଧରେ ଟ୍ୟାକ୍ସ ଫାଙ୍କିବା ଓ ମନି ଲଣ୍ଡରିଂ କରିବା ଅଭିଯୋଗ ହୋଇଛି। ଏଥିସହ ସେ ପ୍ରତିରକ୍ଷା କାରବାରରେ ମଧ୍ୟ ଲାଞ୍ଚ ନେଇଥିବା ଜଣାପଡ଼ିଛି। ୟୁପିଏ ସରକାର ସମୟରେ ହୋଇଥିବା ଅସ୍ତ୍ରଶସ୍ତ କାରବାର ସମ୍ପର୍କରେ ସେ ବିଦେଶୀ କମ୍ପାନୀମାନଙ୍କଠାରୁ ୪ଶହ କୋଟିରୁ ଅଧିକ ଟଙ୍କା ଗ୍ରହଣ କରିଥିବା ଅଭିଯୋଗ ହୋଇଥିଲା। ସିବିଆଇ ଓ ଇଡି ଉଭୟ ମନି ଲଣ୍ଡରିଂ ମାମଲାରେ ୨୦୨୦ରେ ତାଙ୍କୁ ଗିରଫ କରି ତଦନ୍ତ ଚଳାଇଥିଲେ। ତାଙ୍କ ବିରୋଧରେ ମାମଲା ଚାଲିଥିବା ବେଳେ ସେ ବ୍ରିଟେନକୁ ପଳାଇଥିଲେ। ଏହାପରେ ଭାରତ ସରକାର ତାଙ୍କୁ ପଳାତକ ଘୋଷିତ କରିଥିଲେ। ସୂଚନା ମୁତାବକ, ୬୦ ବର୍ଷୀୟ ଭଣ୍ଡାରୀଙ୍କୁ ଫେରାଇ ଆଣିବା ଲାଗି ଭାରତ ସରକାର ଦୁଇଥର ବ୍ରିଟେନକୁ ଅନୁରୋଧ କରିଥିଲେ। ପୂର୍ବରୁ ଲଣ୍ଡନର ଓ୍ବେଷ୍ଟମିନିଷ୍ଟର ମାଜିଷ୍ଟ୍ରେଟ୍ କୋର୍ଟରେ ଶୁଣାଣି ବେଳେ ଭଣ୍ଡାରୀଙ୍କୁ ପ୍ରତ୍ୟର୍ପଣ କରିବାରେ କୌଣସି ପ୍ରତିବନ୍ଧକ ନାହିଁ ବୋଲି ଜିଲା ଜଜ୍ ମିଚେଲ ସ୍ନୋ କହିଥିଲେ। ପ୍ରତ୍ୟର୍ପଣ ଉପରେ ନିଷ୍ପତ୍ତି ନେବା ଲାଗି ମାମଲାକୁ ବ୍ରିଟେନ ଗୃହମନ୍ତ୍ରୀ ସୁଏଲା ବ୍ରେଭରମ୍ୟାନ୍ଙ୍କ ପାଖକୁ ପଠାଯାଇଥିଲା।
