ମୁମ୍ବାଇ,୧୧ ।୩: ମହାରାଷ୍ଟ୍ରରେ ବେଳକୁ ବେଳ କରୋନା ସଂକ୍ରମଣ ବେକାବୁ ହେବାରେ ଲାଗିଥିବା ବେଳେ କେତେକ ଅଞ୍ଚଳରେ ଖୁବ୍ଶୀଘ୍ର ଲକଡାଉନ୍ ଲାଗିପାରେ ବୋଲି ସୂଚନା ଦେଇଛନ୍ତି ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେ । ନାଗପୁରରେ ଏକ ସପ୍ତାହ ପାଇଁ ଲକଡାଉନ୍ ଘୋଷଣା କରାଯାଇଥିବା ବେଳେ ଏବେ କିଛି ଅଞ୍ଚଳରେ ନାଇଟ୍ କର୍ଫ୍ୟୁ ବି ଜାରି କରାଯାଇଛି । ଗୁରୁବାର ଏକ ସମାଚାର ଏଜେନ୍ସି ସହ ଚର୍ଚ୍ଚା କରିବା ସମୟରେ ଠାକରେ କହିଛନ୍ତି ମହାରାଷ୍ଟ୍ରର ଆଉ କିଛି ଅଞ୍ଚଳରେ ଖୁବଶୀଘ୍ର ଲକଡାଉନ୍ ଘୋଷଣା କରାଯାଇପାରେ । ଏ ସମ୍ପର୍କରେ ନିଷ୍ପତ୍ତି ଖୁବ୍ଶୀଘ୍ର ନିଆଯିବ । ଏବେବି ରାଜ୍ୟରେ କରୋନା ସଂକ୍ରମଣ ନିୟନ୍ତ୍ରଣରେ ଥିବା ମୁଖ୍ୟମନ୍ତ୍ରୀ କହିଛନ୍ତି । ଅନ୍ୟପଟେ କରୋନା ମହାମାରୀକୁ ଦୂରେଇବା ପାଇଁ ସାରା ଦେଶରେ ଟିକାକରଣ କାର୍ଯ୍ୟକ୍ରମ ଆରମ୍ଭ ହୋଇଥିବା ବେଳେ ଠାକରେ ମଧ୍ୟ ତାଙ୍କର ପ୍ରଥମ ଡୋଜ୍ ଟିକା ନେଇ ସାରିଛନ୍ତି ।
