ନୂଆଦିଲ୍ଲୀ,୨୭।୫: ଦେଶରେ କରୋନା ପ୍ରକୋପ ଜାରି ରହିଛି। ଇତିମଧ୍ୟରେ ବର୍ଦ୍ଧିତ ବ୍ଲାକ୍ ଫଙ୍ଗସ୍ ସଂକ୍ରମଣ ଏବେ ସରକାରଙ୍କ ଚିନ୍ତା ବଢ଼ାଇଦେଇଛି। ଦେଶରେ ଏପର୍ଯ୍ୟନ୍ତ ପ୍ରାୟ ୧୧ହଜାରରୁ ଊର୍ଦ୍ଧ୍ୱ ବ୍ଲାକ୍ ଫଙ୍ଗସ୍ ରୋଗୀ ଚିହ୍ନଟ ହୋଇସାରିଛନ୍ତି। ଏଥିରେ ସବୁଠାରୁ ଅଧିକ ପ୍ରଭାବିତ ହୋଇଛି ଗୁଜରାଟ। ଗୁଜରାଟରେ ୨୮୦୦ମାମଲା ସାମ୍ନାକୁ ଆସିଥିବା ବେଳେ ମହାରାଷ୍ଟ୍ରରେ ୨୭୦୦, ଆନ୍ଧ୍ରପ୍ରଦେଶରେ ୭୦୦ ଓ ଦିଲ୍ଲୀରେ ୬୨୦ଜଣ ରୋଗୀ ଚିହ୍ନଟ ହୋଇଛନ୍ତି। ଗୋଟିଏ ପଟେ ବର୍ଦ୍ଧିତ ବ୍ଲାକ୍ ଫଙ୍ଗସ୍ ଆତଙ୍କ ଖେଳାଇଥିବା ବେଳେ ଅନ୍ୟପଟେ ଏହାର ଇଞ୍ଜେକ୍ସନ ଅଭାବ ଚିନ୍ତାର କାରଣ ବଢ଼ାଇଦେଇଛି। ଫଳରେ ବ୍ଲାକ୍ ଫଙ୍ଗସ୍ ଚିକିତ୍ସାରେ ଲାଗୁଥିବା ଆମ୍ଫୋଟେରିସିନ୍ ଇଞ୍ଜେକ୍ସନ ଶୀଘ୍ର ଉପଲବ୍ଧ କରାଇବାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସ୍ବାସ୍ଥ୍ୟବିଭାଗକୁ ନିର୍ଦ୍ଦେଶ ଦେଇଥିଲେ। ଏହାପରେ ସ୍ବାସ୍ଥ୍ୟବିଭାଗ ବିଭିନ୍ନ ବିଦେଶ କମ୍ପାନୀ ସହ ଯୋଗାଯୋଗ କରିଥିଲେ। ହେଲେ ଆମେରିକା ସ୍ଥିତ ଗିଲିୟଡ୍ ସାଇନ୍ସ ବୋର୍ଡ ଭାରତକୁ ଇଞ୍ଜେକ୍ସନ ଯୋଗାଇବାକୁ ରାଜି ହୋଇଯାଇଛି। ଆମେରିକାରୁ ଏପର୍ଯ୍ୟନ୍ତ ୧୨୧,୦୦୦ରୁ ଊର୍ଦ୍ଧ୍ୱ ଆମ୍ଫୋଟେରିସିନ୍ ଇଞ୍ଜେକ୍ସନ ଭାରତକୁ ଯୋଗାଇ ଦିଆଯାଇଛି। ଆଉ ବାକି ୮୫,୦୦୦ ଇଞ୍ଜେକ୍ସନ ଖୁବ୍ଶୀଘ୍ର ଭାରତରେ ପହଞ୍ଚିବ ବୋଲି ଜଣାପଡ଼ିଛି। କୁହାଯାଉଛି ଆମେରିକାର ଏହି କମ୍ପାନୀ ପ୍ରାୟ ୧ମିଲିୟନ ଡୋଜ ଭାରତକୁ ଯୋଗାଇଦେବ। ତେବେ ଏନେଇ ଅନ୍ୟ ଦେଶ ସହ ମଧ୍ୟ ଯୋଗାଯୋଗ କରାଯାଉଛି। ବ୍ଲାକ୍ ଫଙ୍ଗସ୍ ଲଢ଼େଇରେ ଯେପରି ଔଷଧ ଓ ଇଞ୍ଜେକ୍ସନ ଅଭାବ ନ ଦେଖାଯାଏ ସେଥିପ୍ରତି ସରକାର ପ୍ରଚେଷ୍ଟା ଚଳାଇଛନ୍ତି। ଅନ୍ୟପଟେ କେନ୍ଦ୍ରମନ୍ତ୍ରୀ ନୀତିନ ଗଡ଼କରୀଙ୍କ ଉଦ୍ୟମରେ ଜେନେଟେକ୍ ଲାଇଫ୍ ସାଇନ୍ସ ବୋର୍ଡ ବ୍ଲାକ୍ ଫଙ୍ଗସ୍ ଚିକିତ୍ସା ପାଇଁ ଆମ୍ଫୋଟେରିସିନ୍ ଇଞ୍ଜେକ୍ସନ ପ୍ରସ୍ତୁତ କରୁଛି। ବର୍ତ୍ତମାନ ପର୍ଯ୍ୟନ୍ତ ଭାରତରେ ଏହି ଗୋଟିଏ କମ୍ପାନୀ ଏମ୍ଫୋଟେରିସିନ୍ ଇଞ୍ଜେକ୍ସନ ଉତ୍ପାଦନ କରୁଛି। ଏହି ଇଞ୍ଜେକ୍ସନ ସୋମବାରଠାରୁ ବିତରଣ କାର୍ଯ୍ୟ ଆରମ୍ଭ ହେବ। ଏହାର ମୁଲ୍ୟ ୧୨୦୦ଟଙ୍କା ରହିବ ବୋଲି ଜଣାପଡ଼ିଛି। ବର୍ତ୍ତମାନ ଏହି ଇଞ୍ଜେକ୍ସନ ୭ହଜାର ଟଙ୍କାରେ ଉପଲବ୍ଧ ହେଉଛି।
