ଗ୍ବାଲିଅର, ୧୭। ୩:ମଧ୍ୟପ୍ରଦେଶର ଗ୍ବାଲିଅରରେ ଜଣେ ସଫ୍ଟଓ୍ବେର ଇଞ୍ଜିନିୟର ନିଜ ୨ ସ୍ତ୍ରୀଙ୍କୁ ନେଇ ଏବେ ଚର୍ଚ୍ଚାକୁ ଆସିଛନ୍ତି। ସେ ୨୦୧୮ରେ ଗ୍ବାଲିଅରର ଜଣେ ଯୁବତୀଙ୍କୁ ବିବାହ କରିଥିଲେ। ଉଭୟେ ଦୁଇବର୍ଷ ଗୁରୁଗ୍ରାମରେ ଏକାଠି ରହିବା ପରେ ୨୦୨୦ରେ କୋଭିଡ୍ ଯୋଗୁ ଇଞ୍ଜିନିୟରଜଣକ ସ୍ତ୍ରୀଙ୍କୁ ଗ୍ବାଲିଅରସ୍ଥିତ ଶଶୁର ଘରକୁ ପଠାଇଦେଲେ। ବହୁଦିନ ପରେ ବି ସେ ପ୍ରଥମ ସ୍ତ୍ରୀଙ୍କ ନିକଟକୁ ଫେରି ନ ଥିଲେ। ପ୍ରଥମ ସ୍ତ୍ରୀ ଗୁରୁଗ୍ରାମସ୍ଥିତ ସ୍ବାମୀଙ୍କ ଅଫିସରେ ପହଞ୍ଚିଥିଲେ। ସ୍ବାମୀ ଜଣେ ସହକର୍ମୀଙ୍କୁ ବିବାହ କରିଥିବା ସେଠାରେ ସେ ଜାଣିବାକୁ ପାଇଥିଲେ । ସେ କିଛିଦିନ ଅଫିସ ସମ୍ମୁଖରେ ଧାରଣାରେ ବସିବା ପରେ ଏକ ଫାମିଲି କୋର୍ଟରେ ସ୍ବାମୀଙ୍କ ନାଁରେ ଅଭିଯୋଗ କରିଥିଲେ। କାଉନ୍ସେଲିଂରେ ବ୍ୟକ୍ତିଜଣକ ତାଙ୍କ ଦ୍ୱିତୀୟ ସ୍ତ୍ରୀଙ୍କୁ ଛଡ଼ିବାକୁ ଅରାଜି ହୋଇଥିଲେ। ତେବେ ଆପୋସ ବୁଝାମଣାରେ ଏକ ଏଗ୍ରିମେଣ୍ଟ କରାଯାଇଥିଲା। ସେ ଦୁଇ ସ୍ତ୍ରୀଙ୍କୁ ଗୋଟିଏ ଲେଖାଏ ଫ୍ଲାଟ୍ ଦେବେ। ଗୋଟିଏ ସପ୍ତାହରେ ପ୍ରଥମ ସ୍ତ୍ରୀଙ୍କ ସହ ୩ ଦିନ ଏବଂ ଦ୍ୱିତୀୟ ସ୍ତ୍ରୀଙ୍କ ସହ ଆଉ ୩ଦିନ ବିତାଇବେ ବୋଲି ଚୁକ୍ତିନାମାରେ ସର୍ତ୍ତ ରହିଥିଲା। ରବିବାର ସେ ନିଜ ଇଚ୍ଛା ମୁତାବକ ଦୁଇଜଣଙ୍କ ମଧ୍ୟରୁ ଜଣଙ୍କ ପାଖରେ ରହିବେ ବୋଲି ସ୍ଥିର କରାଯାଇଥିଲା। ହିନ୍ଦୁ ପରିବାର ଆଇନ ଅନୁସାରେ ଜଣେ ବ୍ୟକ୍ତି ପ୍ରଥମ ସ୍ତ୍ରୀଙ୍କୁ ଛାଡ଼ପତ୍ର ନ ଦେବା ପର୍ଯ୍ୟନ୍ତ ଦ୍ୱିତୀୟ ବିବାହ କରିପାରିବେ ନାହିଁ। କିନ୍ତୁ ଆପୋସ ବୁଝାମଣା ଅନୁସାରେ ଇଞ୍ଜିନିୟରଜଣକ ୨ ଜଣ ସ୍ତ୍ରୀଙ୍କ ସହ ରହିବା ନେଇ ଚୁକ୍ତି ସମ୍ପାଦନକାରୀ ଆଇନଜୀବୀ ହରିଶ ଦିଓ୍ବାନ କହିଛନ୍ତି।
