ବଲାଙ୍ଗୀର ଅଫିସ/ଦେଓଗାଁ, ୨୩।୧: ବଲାଙ୍ଗୀର ଜିଲା ଦେଓଗାଁ ଥାନା ଅଧୀନ ଜରାସିଂହା ଗ୍ରାମରେ ଶନିବାର ଅପରାହ୍ନରେ ଗୋଷ୍ଠୀ ସଂଘର୍ଷ ଘଟିଛି। ଏଥିରେ ୨ଜଣଙ୍କ ମୃତ୍ୟୁ ଘଟିଥିବା ବେଳେ ୪ ଜଣ ଗୁରୁତର ଆହତ ହୋଇଛନ୍ତି। ମୃତକ ହେଲେ ଜରାସିଂହା ହରିଜନପଡ଼ାର ଶ୍ରୀପତି ଭେସ୍ରା ଓ ବାହାରପଡ଼ାର ଧନମତ ରାଉତ। ଏ ନେଇ ଜରାସିଂହା ଅଞ୍ଚଳରେ ଉତ୍ତେଜନା ପ୍ରକାଶ ପାଇଛି। ପରିସ୍ଥିତିକୁ ଦୃଷ୍ଟିରେ ରଖି ୧ ପ୍ଲାଟୁନ୍ ପୋଲିସ ଫୋର୍ସ ମୁତୟନ କରାଯାଇଛି ।
ସୂଚନା ଅନୁଯାୟୀ, ଶନିବାର ଅପରାହ୍ନରେ ଶ୍ରୀପତି ଭେସ୍ରା ଛେଳି ଚରାଉଥିବା ସମୟରେ ଧନମତ ରାଉତ ତାଙ୍କୁ ମାରଣାସ୍ତ୍ରରେ ଆକ୍ରମଣ କରିଥିଲେ। ତାଙ୍କୁ ଡାକ୍ତରଖାନା ନିଆଯାଇଥିବା ବେଳେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏହି ଘଟଣା ପରେ ପ୍ରତିହିଂସା ପରାୟଣ ହୋଇ କେତେଜଣ ଲୋକ ମାରଣାସ୍ତ୍ର ଧରି ଜରାସିଂହା ବାହାରପଡାକୁ ଆସି ଧନମତ ରାଉତଙ୍କ ଘରେ ପଶିଥିଲେ। ସଂଘବଦ୍ଧ ଆକ୍ରମଣରେ ଧନମତଙ୍କ ମୃତ୍ୟୁ ଘଟିଥିଲା। ଆକ୍ରମଣରେ ତାଙ୍କ ପରିବାରର ଅନ୍ୟ ସଦସ୍ୟ ଆହତ ହୋଇଛନ୍ତି। ଏପରିକି ପରିବାରର କେତେଜଣ ସଦସ୍ୟ ଘରୁ ବାହାରି ଅନ୍ୟତ୍ର ପଳାୟନ କରିଥିବା ସୂଚନା ମିଳିଛି। ଗୋଷ୍ଠୀ ସଂଘର୍ଷରେ ଆହତ ୪ଜଣଙ୍କ ମଧ୍ୟରୁ ବ୍ରହ୍ମ ସୁନା ଓ କର୍ମ ସୁନାଙ୍କ ଅବସ୍ଥା ସଙ୍କଟାପନ୍ନ ରହିଛି। ସେମାନଙ୍କୁ ବୁର୍ଲା ସ୍ଥାନାନ୍ତର କରାଯାଇଛି । ପ୍ରାରମ୍ଭିକ ସୂଚନାରୁ ରାଉତ ପରିବାର ଓ ଭେସ୍ରା ପରିବାର ମଧ୍ୟରେ ପୂର୍ବରୁ ବିବାଦ ଲାଗି ରହିଥିଲା ା ଜମିରେ ପାଣିମଡାକୁ ନେଇ କୁହୁଳୁ ଥିବା ଅସନ୍ତୋଷରୁ ଗୋଷ୍ଠୀ ସଂଘର୍ଷ ଓ ହତ୍ୟାକାଣ୍ଡ ଘଟିଥିବା କୁହାଯାଇଛି ।
