ବୁଗୁଡ଼ା,୧୯ ।୬(ଡି.ଏନ.ଏ.) ସ୍ତ୍ରୀ ଫରେଷ୍ଟର ହେଲେ ସ୍ବାମୀ ଚଳାଇଛନ୍ତି ଦୌରାତ୍ମ୍ୟ। ଗତ ଶୁକ୍ରବାର ବଣରୁ ବାଉଁଶ ଆଣୁଥିବା ବେଳେ ୨ ଜଣଙ୍କ ହାତ ଭାଙ୍ଗି ଦେଇଥିବା ଜଣେ ଫରେଷ୍ଟରଙ୍କ ସ୍ବାମୀଙ୍କ ନଁାରେ ଅଭିଯୋଗ ହୋଇଛି। ବୁଗୁଡ଼ା ଥାନା ମାଣିତରା ପଞ୍ଚାୟତ ଅନ୍ତର୍ଗତ ତାମ୍ବିରି ଗ୍ରାମର ବାଉଁଶରେ ବିଭିନ୍ନ ସାମଗ୍ରୀ କରି ପରିବାର ପ୍ରତିପୋଷଣ କରୁଥିବା ଚୈତନ୍ୟ ନାୟକ ଓ ପ୍ରତାପ ନାୟକ ନଗୁଡୁ ପାହାଡ଼ରୁ କୁଲା, ଡାଲା ଓ ବାଉଁଶ ତାଟ ପାଇଁ ବାଉଁଶ ନେଇ ଆସୁଥିବା ବେଳେ ନଗୁଡୁ-ଭୋଗଡ଼ା ରାସ୍ତାରେ ସମ୍ପୃକ୍ତ ଫରେଷ୍ଟରଙ୍କ ସ୍ବାମୀ ସେମାନଙ୍କୁ ଧରି ନେଇ ଫରେଷ୍ଟ ବଙ୍ଗଳାର ଗୋଟିଏ ଘରେ ତାଲା ପକାଇ ରଖି ପ୍ରବଳ ମାଡ଼ ମାରିଥିଲେ। ସେମାନେ ଘରକୁ ଫେରିବା ଡେରି ହେବାରୁ ଚୈତନ୍ୟଙ୍କ ସ୍ତ୍ରୀ ଜୟନ୍ତୀ ଓ ପ୍ରତାପର ସ୍ତ୍ରୀ ଝୁନୁ ନାୟକ ଖୋଜି ଖୋଜି କରି ଅପରାହ୍ନରେ ମାଣିତରା ଫରେଷ୍ଟ ବଙ୍ଗଳାରେ ଭେଟିଥିଲେ। ସେମାନଙ୍କୁ ଖାଇବାକୁ ନ ଦେଇ ପ୍ରବଳ ମାଡ଼ ମରାଯାଇଥିବାରୁ ହାତ ଗୋଡ଼ ଫୁଲି ଯାଇଥିବା ଦେଖିଥିଲେ ଏବଂ ଉଭୟଙ୍କୁ ଛାଡି ଦେବାକୁ ଫରେଷ୍ଟରଙ୍କ ଆଗରେ ଜୟନ୍ତୀ ଓ ଝୁନୁ ନେହୁରା ହୋଇଥିଲେ। କିନ୍ତୁ ୫ ହଜାର ଟଙ୍କା ଓ ଗାଁର ୫ ଜଣକୁ ଧରିକି ଆସିଲେ ସେମାନଙ୍କୁ ଛଡା ଯିବ ବୋଲି ଫରେଷ୍ଟରଙ୍କ ସ୍ବାମୀ କହିଥିଲେ। ଦୁଇ ମହିଳା ଫେରି ଯାଇ ଗାଁ ଲୋକଙ୍କୁ ସବୁ ବିଷୟ କହିବା ପରେ ଫରେଷ୍ଟରଙ୍କ ସ୍ବାମୀଙ୍କ ବିରୋଧରେ ଥାନାରେ ଅଭିଯୋଗ କରିଥିଲେ। ଖବର ଲେଖା ହେବା ସୁଦ୍ଧା ଥାନାରେ କୌଣସି ମାମଲା ପଞ୍ଜିକରଣ ହୋଇ ନ ଥିବା ବେଳେ ଘଟଣାର ତଦନ୍ତ ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଆଇଆଇସି ଚିତ୍ତରଞ୍ଜନ ବେହେରା କହିଛନ୍ତି।
