କଣାସ, ୧୩।୧୦(ସ୍ବ.ପ୍ର.): ଯୁବ ବୟସରେ ଦୁଇ କିଡ୍ନୀ ନଷ୍ଟ ହୋଇଯାଇଛି। ଫଳରେ ଏବେ ବଞ୍ଚିବା ପାଇଁ ଜୀବନ ସହିତ ସଂଗ୍ରାମ କରୁଛନ୍ତି କଣାସ ବ୍ଲକ ଅନ୍ତର୍ଗତ ବଡଓରା ଗ୍ରାମର ୨୯ ବର୍ଷୀୟ ପ୍ରସନ୍ନ କୁମାର ସାହୁ। ନିରଞ୍ଜନ ସାହୁଙ୍କ ବଡ଼ପୁଅ ହେଉଛନ୍ତି ପ୍ରସନ୍ନ। ଏକ ବର୍ଷ ତଳେ ପ୍ରସନ୍ନଙ୍କ ପେଟ ଯନ୍ତ୍ରଣା ହେଉଥିଲା। ପ୍ରଥମେ ସେ ଭୁବନେଶ୍ୱର ଏମ୍ସରେ ଡାକ୍ତରଙ୍କୁ ଦେଖାଇଥିଲେ। ପରୀକ୍ଷା ନିରୀକ୍ଷା ପରେ ଡାକ୍ତର କହିଲେ ଦୁଇଟି ଯାକ କିଡ୍ନୀ ନଷ୍ଟ ହୋଇ ଯାଇଛି, ଏହା ପ୍ରତିରୋପଣ କରିବାକୁ ପଡ଼ିବ। ଏହି କଥା ଶୁଣି ପିତା ନିରଞ୍ଜନଙ୍କ ମୁଣ୍ଡରେ ଚଡ଼କ ପଡ଼ିଲା। ଏତେ ଟଙ୍କା କେଉଁଠୁ କିପରି ଯୋଗାଡ଼ କରିବେ ଓ ପୁଅର କିଡ୍ନୀ ପ୍ରତିରୋପଣ ହେବ ସେଇ ଚିନ୍ତା ତାଙ୍କୁ ଘାରିଛି। ପ୍ରସନ୍ନ ଔଷଧ ଖାଇ ଜୀବନ ସହିତ ସଂଘର୍ଷ କରୁଛନ୍ତି। ଔଷଧ ପାଇଁ ବହୁ ଟଙ୍କା ବ୍ୟୟ କରିବାକୁ ପଡୁଛି। ଏଥିଲାଗି ମଧ୍ୟ ନିରଞ୍ଜନଙ୍କର ଆଉ ସମ୍ବଳ ନାହିଁ। ପ୍ରସନ୍ନଙ୍କ ସ୍ବାସ୍ଥ୍ୟବସ୍ଥା ଧିରେ ଧିରେ ଗୁରୁତର ହେବାରେ ଲାଗିଛି। ଆପୋଲୋ ହସ୍ପିଟାଲର ଡାକ୍ତର ନିଶିଥ କୁମାର ମହାନ୍ତି କହିଛନ୍ତି, ଶୀଘ୍ର ଦୁଇଟି କିଡ୍ନୀ ରୋପଣ କରିବାକୁ ପଡ଼ିବ ଏବଂ ଏଥିଲାଗି ୯ଲକ୍ଷ ଟଙ୍କା ଖର୍ଚ୍ଚ ହେବ। ଅନ୍ୟପକ୍ଷରେ ଏତେ ଟଙ୍କା କେଉଁଠାରୁ ମାତାପିତା ସଂଗ୍ରହ କରିବେ ଓ ପୁଅକୁ ବଞ୍ଚାଇବେ ତାହା ଏବେ ନିରଞ୍ଜନଙ୍କ ପାଇଁ ସବୁଠୁ ବଡ଼ ଚିନ୍ତା ପାଲଟିଛି। ପରିବାରର ଆର୍ଥିକ ସ୍ଥିତି ଭଲ ନ ଥିବାରୁ ପୁଅ ଜୀବନ ବଞ୍ଚାଇବା ଲାଗି ସେ ସହୃଦୟ ବ୍ୟକ୍ତିମାନଙ୍କ ସହଯୋଗ କାମନା କରିଛନ୍ତି। ଯଦି କୌଣସି ସହୃଦୟ ବ୍ୟକ୍ତି ସହଯୋଗର ହାତ ବଢାଇବାକୁ ଚାହାନ୍ତି ତେବେ ଷ୍ଟେଟ୍ ବ୍ୟାଙ୍କ ଅଫ୍ ଇଣ୍ଡିଆ ଆକାଉଣ୍ଟ ନଂ-୩୫୦୦୨୮୧୦୮୨୨, ଆଇ.ଏଫ୍.ସି କୋଡ୍ ନଂ-ଏସ୍ବିଆଇଏନ୍ ୦୦୧୩୫୭୦ରେ ଟଙ୍କା ପଠାଇବାକୁ ଅନୁରୋଧ। ଏଥିଲାଗି ମୋବାଇଲ ଫୋନ୍ ନଂ-୭୬୦୯୯୮୩୮୮୯ରେ ଯୋଗାଯୋଗ ମଧ୍ୟ କରିପାରିବେ।
