ତରବୋଡ଼/ନୂଆପଡ଼ା ଅଫିସ, ୨୫।୨: ନବବିବାହିତ ସ୍ବାମୀ ସ୍ତ୍ରୀଙ୍କୁ ଅପହରଣର ୨ ଦିନ ପରେ ଗରୁତର ଅବସ୍ଥାରେ ସ୍ବାମୀଙ୍କୁ ଉଦ୍ଧାର କରାଯାଇଛି। ହେଲେ କନ୍ୟାଙ୍କ ପତ୍ତା ମିଳିପାରୁ ନାହିଁ। ଏହି ଘଟଣା ଜିଲାରେ ଚର୍ଚ୍ଚାର ବିଷୟ ହୋଇଛି। ୧୬ ତାରିଖରେ ସାମାଜିକ ରିତୀରେ ନୂଆପଡ଼ା ଜିଲା କୋମନା ବ୍ଲକ କୁରେଶ୍ୱର ପଞ୍ଚାୟତ ଅଞ୍ଚଳର ଜଣେ ଯୁବକଙ୍କ ସହିତ ସଦର ବ୍ଲକ ଅଞ୍ଚଳର ଯୁବତୀଙ୍କ ସହ ବିବାହ ହୋଇଥିଲା। ୨୧ ତାରିଖରେ ନବବିବାହିତ ଜିଲା ଚିକିତ୍ସାଳୟ ଯିବାକୁ କହି ଘରୁ ଏକ ବାଇକ୍ ଯୋଗେ ବାହାରି ଥିଲେ। ସନ୍ଧ୍ୟା ପର୍ଯ୍ୟନ୍ତ ସେମାନେ ଫେରି ନ ଥିଲେ। ଯୁବକଙ୍କ ମୋବାଇଲରୁ ଏକ ମେସେଜ ଆସିଥିଲା। ଯେଉଁଥିରେ ସାଙ୍ଗ ଘରକୁ ଯାଉଛୁ। ୨୨ ତାରିଖରେ ଘରକୁ ଫେରିବୁ ବୋଲି ଲେଖାଯାଇଥିଲା। ହେଲେ ୨୨ତାରିଖ ସନ୍ଧ୍ୟା ପର୍ଯ୍ୟନ୍ତ ଦୁହେଁ ଘରକୁ ଫେରି ନ ଥିଲେ। ପରିବାର ଲୋକେ ତାଙ୍କୁ ଯୋଗଯୋଗ କରିଥିଲେ ମଧ୍ୟ ସମ୍ଭବ ହୋଇ ନ ଥିଲା। ଏନେଇ ପରିବାର ଲୋକେ କୋମନା ଥାନାର ଦ୍ୱାରସ୍ଥ ହୋଇଥିଲେ। ସେତିକିବେଳେ ଏକ ଅଜଣା ନମ୍ବରରୁ ଏକ ଫୋନ କଲ୍ ଆସିଥିଲା। ଯୁବକ ଜଣକ ତାଙ୍କ ଜୀବନ ପ୍ରତି ବିପଦ ଥିବା ସହ ତୁରନ୍ତ ଉଦ୍ଧାର କରିବାକୁ କହିଥିଲେ। ପରବର୍ତ୍ତି ସମୟରେ ପରିବାର ଲୋକେ ଛତିଶଗଡ଼ ରାଜ୍ୟ ଦୁର୍ଗଠାରୁ ୧୮ କି.ମି. ଦୂର ନାଗପୁରା ଛକ ପାଖରୁ ଗୁରୁତର ଅବସ୍ଥାରେ ଯୁବକଙ୍କୁ ଉଦ୍ଧାର କରି କୋମନା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ। ସେ କଥା କହିପାରୁ ନାହାନ୍ତି। ତାଙ୍କ ଶରୀରର ବେକ, ପଞ୍ଜରା, ଛାତି, ମୁଣ୍ଡରେ ଶକ୍ତ ଆଘାତ ଲାଗିଛି।
