ଓ୍ବାଶିଂଟନ୍, ୨୦।୧୨: ସୋସିଆଲ ମିଡିଆ ଜାଏଣ୍ଟ ଟୁଇଟର ୟୁଜର୍ସ ଏଲନ ମସ୍କଙ୍କ ଉପରେ ଖୁସି ନାହାନ୍ତି। ଟୁଇଟରର ମାଲିକାନା ଏଲନ ମସ୍କଙ୍କ ହାତକୁ ଯିବା ପରେ କମ୍ପାନୀର କର୍ମଚାରୀଙ୍କଠୁ ଆରମ୍ଭ କରି ୟୁଜର୍ସ ଅସୁଖୀ ଥିବା ଜଣାପଡ଼ିଛି। ରବିବାର ସନ୍ଧ୍ୟାରେ ମସ୍କ ଟୁଇଟର ସିଇଓ ପଦରେ ରହିବା ଉଚିତ୍ କି ନୁହେଁ ସେଥିଲାଗି ଟୁଇଟର ପୋଲ୍ ଜରିଆରେ ୟୁଜର୍ସଙ୍କ ମତ ଲୋଡ଼ିଥିଲେ। ସୋମବାର ଏହାର ଫଳ ପ୍ରକାଶ ପାଇଛି, ଯେଉଁଥିରେ ୫୭.୫% ୟୁଜର୍ସ ମସ୍କ ସିଇଓ ପଦରୁ ଓହରି ଯିବା ଦରକାର ବୋଲି ମତ ଦେଇଥିବାବେଳେ ମାତ୍ର ୪୨.୫% ମସ୍କଙ୍କ ସପକ୍ଷରେ ଭୋଟ ଦେଇଛନ୍ତି। ମୋଟ ୧୭ ନିୟୁତ ଟୁଇଟର ୟୁଜର୍ସ ଏଥିରେ ଅଂଶଗ୍ରହଣ କରିଥିଲେ। ପୋଲ ରେଜଲ୍ଟ ଅନୁସାରେ ମସ୍କ ଆଗାମୀ ନିଷ୍ପତ୍ତି ନେବେ ବୋଲି ରବିବାର କହିଥିବାବେଳେ ଏ ନେଇ ତାଙ୍କର ପ୍ରତିକ୍ରିୟା ମିଳିପାରି ନାହିଁ।
ଟୁଇଟର ପୋଲ୍କୁ ଅନୁକରଣ କରି ଆମେରିକୀୟ ର଼୍ୟାପର ସ୍ନୁପ ଡଗ୍ ଏହି ମାଇକ୍ରୋବ୍ଲଗିଂ ଆପ୍ ପରିଚାଳାନା କରିବା ଲାଗି ୟୁଜର୍ସଙ୍କ ମତ ଲୋଡିଛନ୍ତି। ଏଥିଲାଗି ସୋମବାର ସ୍ନୁପ ଟୁଇଟର ପୋଲ କରିଛନ୍ତି। ବର୍ତ୍ତମାନ ସୁଦ୍ଧା ୧୦ ଲକ୍ଷ ୟୁଜର୍ସ ନିଜ ମତ ଦେଇଛନ୍ତି। ଏଥିରୁ ୮୦ ପ୍ରତିଶତ ୟୁଜର୍ସ ସ୍ନୁପ ଟୁଇଟର ପରିଚାଳନା ଦାୟିତ୍ୱ ଗ୍ରହଣ କରନ୍ତୁ ବୋଲି ମତ ଦେଇଛନ୍ତି।
