ନୂଆଦିଲ୍ଲୀ,୧୩ା୮: କଂଗ୍ରେସ ନେତା ରାହୁଲ ଗାନ୍ଧୀ ଶୁକ୍ରବାର ମାଇକ୍ରୋବ୍ଲଗିଂ ସାଇଟ୍ ଟୁଇଟର ବିରୋଧରେ ସାଂଘାତିକ ଅଭିଯୋଗ ଆଣିଛନ୍ତି। ରାହୁଲ କହିଛନ୍ତି, ଟୁଇଟର ତାଙ୍କ ଆକାଉଣ୍ଟକୁ ବ୍ଳକ୍ କରି ଭାରତର ରାଜନୈତିକ ପ୍ରକ୍ରିୟାରେ ହସ୍ତକ୍ଷେପ କରୁଛି। ତାଙ୍କର ଲକ୍ଷ ଲକ୍ଷ ଫଲୋଅର୍ସଙ୍କୁ ମତାମତ ଦେବା ଅଧିକାରରୁ ବଞ୍ଚତ୍ତ କରିଛି। ଏହାକୁ ସେ ଦେଶର ଗଣତନ୍ତ୍ର ଉପରେ ଆକ୍ରମଣ ବୋଲି ଅଭିହିତ କରିବା ସହ ଟୁଇଟରର ନିରପେକ୍ଷତା ଉପରେ ପ୍ରଶ୍ନ ଉଠାଇଛନ୍ତି।
ଅନ୍ୟପକ୍ଷେ ରାହୁଲଙ୍କ ଟୁଇଟର ଆକାଉଣ୍ଟକୁ ସାମୟିକ ଭାବେ ଏହି ସାଇଟ୍ ଲକ୍ କରିଦେଇଥିବାରୁ ଭାଜପା ପକ୍ଷରୁ କଟାକ୍ଷ କରାଯାଇଛି। ଭାଜପା ଏମ୍ପି ତେଜସ୍ବୀ ସୂର୍ଯ୍ୟ କହିଛନ୍ତି, ଯେତେବେଳେ କେନ୍ଦ୍ର ସରକାର ସୋସିଆଲ ମିଡିଆ ୟୁଜର୍ସଙ୍କୁ ସଶକ୍ତ କରିବା ପାଇଁ ନୂଆ ନିୟମ ଆଣିଲେ ସେତେବେଳେ କଂଗ୍ରେସ ବଡ଼ପାଟିରେ ଚିତ୍କାର କରୁଥିଲା। ଏବେ ରାହୁଲ ଅଭିବ୍ୟକ୍ତି ସ୍ବାଧୀନତା ଅଧିକାର ପଛରେ ଲୁଚିପାରିବେ ନାହିଁ ବୋଲି ତେଜସ୍ବୀ ସମାଲୋଚନା କରିଛନ୍ତି। ଇତିମଧ୍ୟରେ ଯେଉଁ ପ୍ରସଙ୍ଗକୁ ନେଇ ରାହୁଲଙ୍କ ଟୁଇଟର ଆକାଉଣ୍ଟକୁ ବ୍ଲକ୍ କରାଯାଇଛି ସେହି କାରଣରୁ ତାଙ୍କ ଉନ୍ଷ୍ଟାଗ୍ରାମ ପ୍ରୋଫାଇଲ୍ ବିରୋଧରେ ମଧ୍ୟ କାର୍ଯ୍ୟାନୁଷ୍ଠାନ ନିଆଯାଉ ବୋଲି ଜାତୀୟ ଶିଶୁ ଅଧିକାର ସୁରକ୍ଷା କମିଶନ (ଏନ୍ସିପିସିଆର୍) ଫେସ୍ବୁକ୍ ନିକଟରେ ଦାବି କରିଛନ୍ତି। ପ୍ରକାଶ ଯେ, ଦକ୍ଷିଣପଶ୍ଚିମ ଦିଲ୍ଲୀରେ ଜଣେ ଦଳିତ ନାବାଳିକାଙ୍କୁ ବଳାତ୍କାର ପରେ ହତ୍ୟା କରାଯାଇଥିବା ଅଭିଯୋଗ ହୋଇଥିଲା। ରାହୁଲ ମୃତ ଝିଅର ମା’ବାପାଙ୍କ ଫଟୋକୁ ଟୁଇଟ୍ କରିଥିଲେ।
