ରୂପସା, ୩।୭(ଡି.ଏନ.ଏ.): ବାଲେଶ୍ୱର ଜିଲା ରୂପସା ଥାନା ଗଡ଼ପଦା ପଞ୍ଚାୟତ ଅଧୀନ ଲଛମନଖୁଣ୍ଟା ଅଞ୍ଚଳରେ ପୁଣି ଏକ ଦନ୍ତା ତାଣ୍ଡବ ରଚିଛି। ଶୁକ୍ରବାର ଏହି ହାତୀ ଲଛମନଖୁଣ୍ଟା, ଜାରାସାହି କଲୋନୀସାହି ଆଦି ଗାଁକୁ ଯାଇ ବହୁ ଘରଦ୍ୱାର ଭାଙ୍ଗିବା ସହ ଜଣେ ଆଦିବାସୀ ମହିଳା କୁନି ସିଂଙ୍କ ଘରେ ପଶି ପାଚିଲା ପଣସ ଖାଇଯାଇଥିବା ଦେଖିବାକୁ ମିଳିଛି। କୁନି ସିଂ, ବାଙ୍ଗୁ ସିଂ, ରେଣ୍ଠୁ ସିଂ, ବୈକୁଣ୍ଠ ସିଂ, ଏକାଦଶୀ ସିଂ ଓ ହୁସନା ବିବିଙ୍କ ଘର ଓ କାନ୍ଥ ଭାଙ୍ଗି ଥିବାରୁ ସ୍ଥାନୀୟ ଲୋକେ ଭୟଭୀତ ହୋଇପଡ଼ିଛନ୍ତି।
ଗୁରୁବାର ରାତିରେ ମୟୂରଭଞ୍ଜ ପଟୁ ଏହି ହାତୀ ଗାଁକୁ ପଶିଆସିଥିଲା। ଲଛମନଖୁଣ୍ଟା, ଜାରାସାହି, ଦରଖୁଳି, ଗୁଆବଣିଆ, ନିମଡ଼ିହା ଆଦି ଗାଁରେ ହାତୀ ବୁଲୁଥିବା ଦେଖି ବନବିଭାଗକୁ ଖବର ଦିଆଯାଇଥିଲା। ବହୁ ଲୋକଙ୍କ ଧାନ, ଚାଉଳ ଖାଇଯିବା ସହ ହାତୀଟି ପରିବା ଫସଲ ନଷ୍ଟ କରିପକାଇଥିଲା। ବନବିଭାଗ କର୍ମଚାରୀ ପହଞ୍ଚତ୍ ଗାଁ ଲୋକଙ୍କ ସହାୟତାରେ ହାତୀକୁ ମୟୂରଭଞ୍ଜ ପଟ ନିମଡ଼ିହା ଜଙ୍ଗଲରେ ଛାଡ଼ିଥିଲେ। ଶୁକ୍ରବାର ରାତିରେ ହାତୀ ବାମଡ଼ା, ମନ୍ତ୍ରୀଡ଼ାହି ଗାଁ ଦେଇ ଏଫ୍ସିଆଇ ଗୋଦାମ ରାସ୍ତା ଅତିକ୍ରମ କରି ମୟୂରଭଞ୍ଜ ପଟକୁ ଯିବା ପରେ ବିଦ୍ୟୁତ୍ ସଂଯୋଗ କରାଯାଇଥିଲା। ୬ ମାସ ଧରି ବାରମ୍ବାର ରୂପ୍ସା ଅଞ୍ଚଳକୁ ହାତୀ ପଶି ଆସୁଥିବାରୁ ଏହାର ସ୍ଥାୟୀ ପ୍ରତିକାର ପାଇଁ ବନବିଭାଗ ପକ୍ଷରୁ ପଦକ୍ଷେପ ଗ୍ରହଣ କରିବାକୁ ଦାବି ହୋଇଛି। କ୍ଷତିଗ୍ରସ୍ତ ପରିବାରଙ୍କୁ ସରକାରୀ ସହାୟତା ପ୍ରଦାନ ପାଇଁ ସାଧାରଣରେ ଦାବି ହୋଇଛି। ଏ ସମ୍ପର୍କରେ ବନବିଭାଗ ଅଧିକାରୀ, ବସ୍ତା ତହସିଲଦାରଙ୍କୁ ଅବଗତ କରାଯାଇଛି।
