ଇସ୍ତାନବୁଲ,୯।୨ : ତୁର୍କୀ ଏବଂ ସିରିଆରେ ହୋଇଥିବା ଭୟଙ୍କର ଭୂକମ୍ପରେ ମୃତ୍ୟୁସଂଖ୍ୟା ୧୫ ହଜାର ଅତିକ୍ରମ କରିଛି। ଏଥି ସହିତ ଆହତଙ୍କ ସଂଖ୍ୟା ୮୦ ହଜାରରୁ ଅଧିକ ଛୁଇଁଛି। ଘରୋଇ ଏବଂ ବିଦେଶୀ ରିଲିଫ କର୍ମଚାରୀମାନେ ଉଭୟ ଦେଶର ଭୂକମ୍ପ ପ୍ରଭାବିତ ଅଞ୍ଚଳରେ ଦିନରାତି ଉଦ୍ଧାର କାର୍ଯ୍ୟରେ ନିୟୋଜିତ ଅଛନ୍ତି। କିନ୍ତୁ ବିନାଶ ଏତେ ଭୟଙ୍କର ଯେ ସାହାଯ୍ୟ ଏପର୍ଯ୍ୟନ୍ତ ହଜାର ହଜାର ଲୋକଙ୍କ ପାଖରେ ପହଞ୍ଚି ପାରି ନାହିଁ। ସରକାରଙ୍କ ବିରୋଧରେ ନାଗରିକଙ୍କ କ୍ରୋଧ ବଢ଼ିବାରେ ଲାଗିଛି।
ଲୋକେ ସରକାରଙ୍କୁ ପ୍ରଶ୍ନ ପଚାରିବା ଆରମ୍ଭ କରିଛନ୍ତି। ଯେ ଭୂକମ୍ପ ସହ ମୁକାବିଲା କରିବା ନାମରେ ଯେଉଁ ଟିକସ ସଂଗ୍ରହ କରାଯାଉଥିଲା ତାହା କୁଆଡ଼େ ଗଲା। ପ୍ରକୃତରେ, ୧୯୯୯ ର ଭୟଙ୍କର ଭୂକମ୍ପ ପରେ ତୁର୍କୀ ଏକ ନୂଆ ଟିକସ ଲାଗୁ କରିଥିଲା। ଏଥିରୁ ଜମା ହୋଇଥିବା ପରିମାଣ ଭୂକମ୍ପ କିମ୍ବା ଅନ୍ୟାନ୍ୟ ପ୍ରାକୃତିକ ବିପର୍ଯ୍ୟୟର ମୁକାବିଲା ପାଇଁ ବ୍ୟବହୃତ ହେବ। ଏହାର ସରକାରୀ ନାମ ହେଉଛି ‘ସ୍ପେଶାଲ କମ୍ୟୁନିକେଶନ ଟ୍ୟାକ୍ସ’। ଖବର ଅନୁଯାୟୀ, ଏହି ଟିକସରୁ ପ୍ରାୟ ୮୮ ବିଲିୟନ ଲିରା (୪.୬ ବିଲିୟନ ଡ଼ଲାର୍) ସଂଗ୍ରହ କରାଯାଇଥିଲା। ତେବେ ଏହି ଟଙ୍କା କେଉଁଠାରେ ଓ କିପରି ଖର୍ଚ୍ଚ ହୋଇଛି ତାହା ସରକାର କହି ନାହାଁନ୍ତି। ୧୯୯୯ ମସିହାରୁ ୨୪ ବର୍ଷ ଡ଼ରି ସଂଗୃହିତ ଆମର ସମସ୍ତ ଟ୍ୟାକ୍ସ କୁଆଡେ ଗଲା ବୋଲି ଲୋକେ ପ୍ରଶ୍ନ କରିଛନ୍ତି।
