ଚଣ୍ଡିଖୋଲ,୯ା୨(ଡି.ଏନ୍.ଏ.): ରାସ୍ତା ନିର୍ମାଣ ନାମରେ କେତେକ ବିଭାଗ ତରଫରୁ ଲୁଟ୍ କରାଯାଉଥିବା ଅଭିଯୋଗ ହେଉଛି। ଏପରି କି ଗୋଟିଏ ରାସ୍ତାକୁ ବିଭାଗ ବଦଳାଇ ନିମ୍ନମାନର କାମକରି ବାରମ୍ବାର ଟେଣ୍ଡର କରାଯାଉଛି। ଏହାଦ୍ୱାରା ବିଭାଗୀୟ ଅଧିକାରୀ ଓ ଠିକାଦାର ମାଲାମାଲ ହେଉଥିବାବେଳେ ସାଧାରଣ ଲୋକଙ୍କ ସମସ୍ୟା କିନ୍ତୁ ଦୂର ହେଉନାହିଁ। ଏଭଳି ଅବସ୍ଥା ଦେଖିବାକୁ ମିଳିଛି ଯାଜପୁର ଜିଲା ବଡ଼ଚଣା ବ୍ଲକ ଚାରିବାଟିଆ ପୂର୍ତ୍ତ ବିଭାଗ ଡିଭିଜନ ଅନ୍ତର୍ଗତ ବାଲିଚନ୍ଦ୍ରପୁର-ବେଣୀପୁର ରାସ୍ତାରେ। ଏହି ରାସ୍ତାଟି ବିରୂପା ନଦୀବନ୍ଧ । ଏହା କେନ୍ଦ୍ରାପଡ଼ା ଜଳ ସମ୍ପଦ ବିଭାଗ ଅଧୀନରେ ପୂର୍ବରୁ ଥିଲା। ୨୦୧୪ରୁ ୨୦୧୬ ମଧ୍ୟରେ ଏହି ରାସ୍ତାର ଉନ୍ନତୀକରଣ ପାଇଁ ବିଭାଗ ପକ୍ଷରୁ ୧୪ କୋଟି ୮୫ ଲକ୍ଷ ଟଙ୍କା ଖର୍ଚ୍ଚ କରାଯାଇଥିଲା। ମାତ୍ର ସମ୍ପୃକ୍ତ ରାସ୍ତା କାମ ନିମ୍ନମାନର ହେବାରୁ ନିର୍ମାଣର ୨ମାସ ମଧ୍ୟରେ ପିଚୁ ଉଠିଗଲା। ସ୍ଥାନୀୟ ଅଞ୍ଚଳବାସୀଙ୍କ ଅଭିଯୋଗକ୍ରମେ ତତ୍କାଳୀନ ଜଳ ସମ୍ପଦ ସଚିବ ପ୍ରଦୀପ ଜେନା ୨୦୧୭ରେ ରାସ୍ତାର ନିରୀକ୍ଷଣ କରିବାକୁ ଆସିଥିଲେ। ସେ ସମୟରେ ରାସ୍ତାକାର୍ଯ୍ୟ ଠିକା ନେଇଥିବା ଓଡ଼ିଶା କନ୍ଷ୍ଟ୍ରକଶନ୍ କମ୍ପାନୀ (ଓସିସି)ର ଜେନେରାଲ ମ୍ୟାନେଜରଙ୍କୁ ନିଲମ୍ବିତ କରିଥିଲେ ଏବଂ ଠିକା ସଂସ୍ଥାକୁ କଳାତାଲିକାଭୁକ୍ତ କରିଥିଲେ। ଦ୍ୱିତୀୟ ବାର ପିଚୁ ପାଇଁ ନିର୍ଦ୍ଦେଶ ମଧ୍ୟ ଦେଇଥିଲେ।
ଏହାପରେ ୨୦୧୮ରେ ଜଳ ସମ୍ପଦ ବିଭାଗ ତରଫରୁ ପୁନର୍ବାର ରାସ୍ତାକାର୍ଯ୍ୟ ମରାମତି ନାମରେ ୩୫ ଲକ୍ଷ ଟଙ୍କା ଖର୍ଚ୍ଚ କରାଯାଇଥିଲା। ୨୦୧୯ରେ ସେହି ରାସ୍ତାର ମରାମତି ପାଇଁ ପୁନର୍ବାର ୧୮ଲକ୍ଷ ଟଙ୍କା ଖର୍ଚ୍ଚ କରାଗଲା। ୨୦୧୯ ଡିସେମ୍ବର ୨୩ରେ ଏହାକୁ ଚାରିବାଟିଆ ପୂର୍ତ୍ତ ବିଭାଗ ଅଧୀନକୁ ହସ୍ତାନ୍ତର କରାଗଲା। ପୂର୍ତ୍ତ ବିଭାଗ ତରଫରୁ ୧୦ କି.ମି. ୨୦୦ ମିଟର ରାସ୍ତାକୁ ବଢ଼ାଯାଇ ୧୧ କି.ମି. ୨୦୦ ମିଟର କରିଦିଆଗଲା। ୨୦୨୧ରେ ଚାରିବାଟିଆ ଡିଭିଜନ୍ ଓ ବଡ଼ଚଣା ସବ୍ଡିଭିଜନ୍ ଅଧୀନରେ ମରାମତି ନାମରେ ୫୦ ଲକ୍ଷରୁ ଊର୍ଦ୍ଧ୍ୱ ଟଙ୍କା ଖର୍ଚ୍ଚ କରାଗଲା। ଏହି ଖର୍ଚ୍ଚ ହେବାପରେ ୨୦୨୧ ନଭେମ୍ବରରେ ରାସ୍ତାକୁ ୨ ଭାଗରେ ବିଭକ୍ତ କରାଯାଇ ଟେଣ୍ଡର କରାଗଲା। ବାଲିଚନ୍ଦ୍ରପୁରଠାରୁ କଳାଶ୍ରୀ ପର୍ଯ୍ୟନ୍ତ ୫ କି.ମି. ୫୦୦ ମିଟର ରାସ୍ତାକୁ ୯ କୋଟି ୯୭ ଲକ୍ଷ ଟଙ୍କା ଓ କଳାଶ୍ରୀଠାରୁ ବେଣୀପୁର ପର୍ଯ୍ୟନ୍ତ ୫ କି.ମି. ୫୦୦ ମିଟରକୁ ୧୨ କୋଟି ୮୦ ଲକ୍ଷ ଟଙ୍କା ବ୍ୟୟବରାଦ କରାଯାଇ ଖର୍ଚ୍ଚ କରାଗଲା। ରାସ୍ତା ନିର୍ମାଣ ଅବଧି ୯ ମାସ ଥିବା ବେଳେ ଅଦ୍ୟାବଧି କାମ ସରିନାହିଁ। ଏପରି କି ରାସ୍ତାର ଓସାର ୮.୫ ମିଟର ହେବାକୁ ଥିବାବେଳେ ଏହା ମଧ୍ୟରୁ ୫.୫ ମିଟର ଓସାର ପିଚୁ ଓ ଉଭୟ ପାର୍ଶ୍ୱରେ ୧.୫ ମିଟର ଲେଖାଏ ମାଟି ଏବଂ ମୋରମ ରାସ୍ତା ତିଆରି ହେବ ବୋଲି ବିଭାଗୀୟ ଚୁକ୍ତିପତ୍ରରେ ଉଲ୍ଲେଖ ରହିଛି। ଏହାକୁ ଅଣଦେଖା କରାଯାଇ ରାସ୍ତାର ଓସାରକୁ ୬.୫ ମିଟରରେ ସୀମିତ ରଖାଯାଇଛି। ଏହାପରେ ଏହି ରାସ୍ତାର ପୁନର୍ବାର ୮୩ କୋଟି ୪୬ ଲକ୍ଷ ୪୮ହଜାର ଟଙ୍କା ବ୍ୟୟବରାଦ ହେବ ବୋଲି ପୂର୍ତ୍ତ ବିଭାଗ ପକ୍ଷରୁ ଆକଳନ କରାଯାଇଛି।
ସମ୍ପୃକ୍ତ ରାସ୍ତାଟି ବାଲିଚନ୍ଦ୍ରପୁର ୫୩ ନଂ. ଜାତୀୟ ରାଜପଥଠାରୁ ବରୀ ପର୍ଯ୍ୟନ୍ତ ଭାୟା ବେଣାପୁର ଦେଇ ଯିବ ବୋଲି ସ୍ଥିରୀକୃତ ହୋଇଛି। ସେଥିପାଇଁ ସମ୍ପୃକ୍ତ ରାସ୍ତାକୁ ଏବେ ଚାରିବାଟିଆ ଡିଭିଜନ୍ରୁ ବଦଳାଇ ଦିଆଯାଇ ପାଣିକୋଇଲି ଡିଭିଜନକୁ ହସ୍ତାନ୍ତର କରାଯାଇଛି। ଚାରିବାଟିଆ ଡିଭିଜନର କାମ ନ ସରିଥିବା ବେଳେ ପୁନର୍ବାର ଗତ ଡିସେମ୍ବର ୨୨ରେ ଚିଠି ନଂ. ୧୮୬୭୮ରେ ପୂର୍ତ୍ତ ବିଭାଗ ତରଫରୁ ଓସ୍ଡମାର ନିର୍ବାହୀ ନିର୍ଦ୍ଦେଶକଙ୍କୁ ଚିଠି କରାଯାଇଛି। ଓସ୍ଡମା ପକ୍ଷରୁ ଟଙ୍କା ପ୍ରଦାନ କରାଗଲା ପରେ ରାସ୍ତା ନିର୍ମାଣ କାମ ଆରମ୍ଭ ହେବ। ମାତ୍ର ୮ ବର୍ଷ ଅନ୍ତରରେ ଗୋଟିଏ ରାସ୍ତାକୁ ୩ ବିଭାଗକୁ ବଦଳି କରାଯିବାର ଉଦ୍ଦେଶ୍ୟ କ’ଣ ଥାଇପାରେ ବୋଲି ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। ଅନ୍ୟପକ୍ଷରେ ଏହି ଘଟଣାର ଜିଲାପାଳ ତଦନ୍ତ କରିବାକୁ ଅଞ୍ଚଳବାସୀଙ୍କ ପକ୍ଷରୁ ଦାବି ହୋଇଛି। ଏ ସମ୍ପର୍କରେ ଚାରିବାଟିଆ ଡିଭିଜନ୍ର ଅଧୀକ୍ଷଣ ଯନ୍ତ୍ରୀ ପ୍ରଦୀପ କୁମାର ମହାନ୍ତିଙ୍କୁ ପଚାରିବାରେ ସେ କହିଛନ୍ତି, ସମ୍ପୃକ୍ତ ରାସ୍ତାଟି ପାଣିକୋଇଲି ଡିଭିଜନ୍ କରିବ କି ନାହିଁ ମୁଁ କହିପାରିବି ନାହିଁ। ପାଣିକୋଇଲି ଡିଭିଜନ୍ର ଅଧୀକ୍ଷଣ ଯନ୍ତ୍ରୀ ଆଲୋକ ମହାନ୍ତିଙ୍କୁ ପଚାରିବାରେ ସେ କହିଛନ୍ତି, ରାସ୍ତାର ସର୍ଭେ କାମ ସରି ଟେଣ୍ଡରକୁ ଯାଇଛି। ତେଣୁ ଅଧିକ କିଛି କହିପାରିବି ନାହିଁ।
