ଅଭିନେତ୍ରୀ ତୁନିଶା ଶର୍ମାଙ୍କ ହଠାତ୍ ଆତ୍ମହତ୍ୟାକୁ ନେଇ ଟିଭି ଇଣ୍ଡଷ୍ଟ୍ରିରେ ଶୋକର ଛାୟା ଖେଳିଯାଇଛି। ରବିବାର ତୁନିଶାଙ୍କ ପୋଷ୍ଟମର୍ଟମ ରିପୋର୍ଟ ଆସିଛି। ଏହି ରିପୋର୍ଟରେ ଅନେକ ଖୁଲାସା ହୋଇଛି। ଅଭିନେତ୍ରୀଙ୍କ ମୃତ୍ୟୁ ପରଠାରୁ ସେ ଗର୍ଭବତୀ ଥିବା କଥା ଶୁଣିବାକୁ ମିଳିଥିଲା। ତେବେ ବର୍ତ୍ତମାନ ପର୍ଯ୍ୟନ୍ତ ପୋଲିସ ଏହି ଗୁଜବକୁ ଖାରଜ କରିଦେଇଛି। ପୋଷ୍ଟମର୍ଟମ ରିପୋର୍ଟ ଅନୁଯାୟୀ, ୨୦ ବର୍ଷୀୟା ତୁନିଶାଙ୍କ ଶ୍ୱାସରୁଦ୍ଧ ଯୋଗୁ ମୃତ୍ୟୁ ହୋଇଥିବା ଜଣାପଡିଛି। ତାଙ୍କ ଶରୀରରେ କୌଣସି ଆଘାତ ଚିହ୍ନ ଦେଖିବାକୁ ମିଳିନାହିଁ।
ଶନିବାର ତୁନିଶା ତାଙ୍କ ଟିଭି ଶୋ’ ଆଲିବାବା ସେଟରେ ଆତ୍ମହତ୍ୟା କରିଥିଲେ। ତୁନିଶା ନିଜ ସହ-ଷ୍ଟାର ଶିଜାନ ମହମ୍ମଦ ଖାନଙ୍କ ମେକଅନ୍ ରୁମରେ ଆତ୍ମହତ୍ୟା କରିଥିଲେ। ଘଟଣା ସମ୍ପର୍କରେ ସୂଚନା ପାଇବା ମାତ୍ରେ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା। ଏହା ପରେ ବିଳମ୍ବିତ ରାତିରେ ମୃତଦେହକୁ ପୋଷ୍ଟମର୍ଟମ ପାଇଁ ଜେଜେ ହସ୍ପିଟାଲକୁ ପଠାଯାଇଥିଲା। ପୋଷ୍ଟମର୍ଟମ ଚାରି-ପାଞ୍ଚଜଣ ଡାକ୍ତରଙ୍କ ଉପସ୍ଥିତିରେ ହୋଇଥିଲା। ଏହି ସମୟରେ ଏହାର ଭିଡିଓଗ୍ରାଫି ମଧ୍ୟ କରାଯାଇଥିଲା।
ତୁନିଶା ଆତ୍ମହତ୍ୟା କରିବା ପରେ ତାଙ୍କ ମା’ ଶିଜାନଙ୍କ ବିରୋଧରେ ଅନେକ ଗୁରୁତର ଅଭିଯୋଗ କରିଛନ୍ତି। ତାଙ୍କ କହିବାନୁସାରେ, ଶିଜାନ ମୋ ଝିଅକୁ ଆତ୍ମହତ୍ୟା କରିବାକୁ ଉସ୍କାଇ ଥିଲେ। ତୁନିଶାଙ୍କ ମା’ଙ୍କ ଅଭିଯୋଗ ଉପରେ, ଧାରା ୩୦୬ ଅନୁଯାୟୀ ଶିଜାନଙ୍କ ବିରୋଧରେ ମାମଲା ରୁଜୁ ହୋଇଛି। ବିଳମ୍ବିତ ରାତିରେ ପଚରାଉଚରା ପରେ ପୋଲିସ ତାଙ୍କୁ ଗିରଫ କରିଥିଲା। ବର୍ତ୍ତମାନ ତାଙ୍କୁ ଚାରି ଦିନ ପାଇଁ ପୋଲିସ ରିମାଣ୍ଡରେ ନିଆଯାଇଛି।
