ବ୍ରହ୍ମପୁର ଅଫିସ,୨୨ା୮: ଏନ୍କାଉଣ୍ଟର ପରେ ବି ଭୟ ନାହିଁ। ପୋଲିସକୁ ଚାଲେଞ୍ଜ କରି ଜଣେ ଯୁବକଙ୍କୁ ହତ୍ୟା ଉଦ୍ୟମ ଘଟଣାରେ ଗିରଫ ହୋଇଛନ୍ତି ଦୁର୍ଦ୍ଦାନ୍ତ ଟୁନା ଦାସ(୩୨)। ଟାଉନ ଥାନା ପୋଲିସ କେସ ନମ୍ବର ୧୫୪/୨୦ରେ ଖଲାସି ସାହିର ଦୁର୍ଦ୍ଦାନ୍ତ ଟୁନାଙ୍କୁ ଗିରଫ କରି କୋର୍ଟ ଚାଲାଣ କରିଛି। ତାଙ୍କ ନିକଟରୁ ୨ଟି ବୋମା ଓ ଗୋଟିଏ ଖଣ୍ଡା ଜବତ ହୋଇଥିବା ତଦନ୍ତ ଅଧିକାରୀ ସୂର୍ଯ୍ୟଚନ୍ଦ୍ର ପାଢ଼ୀ ସୂଚନା ଦେଇଛନ୍ତି।
ଘଟଣାରୁ ପ୍ରକାଶ, ଟାଉନ ଥାନା ଅନ୍ତର୍ଗତ ରୁକ୍ମିଣୀ ସିନେମା ହଲ୍ ଛକ ଦେଇ ଶୁକ୍ରବାର ରାତିରେ ବିଏମ୍ସିର ସଫେଇ କର୍ମଚାରୀ ମାନସ ମାଧୋଇ ଘରକୁ ଫେରୁଥିବା ବେଳେ ଟୁନା ତାଙ୍କୁ ଅଟକାଇଥିଲେ। ପୂର୍ବ ଶତ୍ରୁତାକୁ କେନ୍ଦ୍ର କରି ସେଠାରେ ଉଭୟଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା। ଏଥିରେ ଟୁନା ଉତ୍କ୍ଷିପ୍ତ ହୋଇ ଏକ ଖଣ୍ଡାରେ ଆକ୍ରମଣ ଉଦ୍ୟମ କରିଥିଲେ। ମାନସ ପ୍ରାଣ ବିକଳରେ ଧାଇଁ ପଳାଇବାକୁ ଉଦ୍ୟମ କରୁଥିବା ବେଳେ ଟୁନା ଲକ୍ଷ୍ୟ କରି ଏକ ବୋମା ତାଙ୍କ ଉପରକୁ ଫିଙ୍ଗିଥିଲେ। ହେଲେ ମାନସ ସୌଭାଗ୍ୟବଶତଃ ଅଳ୍ପକେ ରକ୍ଷା ପାଇ ଯାଇଥିଲେ। ଘଟଣା ସମ୍ପର୍କରେ ଟାଉନ ଥାନାରେ ଅଭିଯୋଗ ହେବା ପରେ ଏସ୍ଆଇ ଶୁକ୍ରବାର ବିଳମ୍ବିତ ରାତିରେ ବିଭିନ୍ନ ସ୍ଥାନରେ ଚଢ଼ାଉ କରି ଟୁନାଙ୍କୁ ଗିରଫ କରିଥିଲେ। ଶନିବାର ତାଙ୍କୁ କୋର୍ଟ ଚାଲାଣ କରାଯାଇଥିବା ଏସ୍ଆଇ କହିଛନ୍ତି। ପୂର୍ବ ଶତ୍ରୁତାକୁ ନେଇ ଏଭଳି ଘଟଣା ଘଟିଥିବା ପୋଲିସ କହିଛି।
ପ୍ରକାଶ ଥାଉ କି, ବିଗତ ବର୍ଷରେ ସଦର ଥାନା ପୋଲିସ ଟୁନାଙ୍କୁ ଏନ୍କାଉଣ୍ଟର କରିଥିଲା।
