ଓ୍ବାଶିଂଟନ,୧୩।୪ : ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ତାଙ୍କର ପୂର୍ବ ଆଇନଜୀବୀଙ୍କ ବିରୋଧରେ ମାମଲା ରୁଜୁ କରିଛନ୍ତି। ଖବର ଅନୁଯାୟୀ ଡୋନାଲ୍ଡ ଟ୍ରମ୍ପ ତାଙ୍କ ପୂର୍ବତନ ଆଇନଜୀବୀ ମାଇକେଲ କୋହେନଙ୍କ ବିରୋଧରେ ୫୦ କୋଟି ଡଲାର କ୍ଷତିପୂରଣ ମକଦ୍ଦମା ଦାଏର କରିଛନ୍ତି। ଆମେରିକାର ଫ୍ଲୋରିଡା କୋର୍ଟରେ ଟ୍ରମ୍ପ ଏହି ମକଦ୍ଦମା ଦାୟର କରିଛନ୍ତି। ଟ୍ରମ୍ପ ଅଭିଯୋଗ କରିଛନ୍ତି କୋହେନ ଆଇନଜୀବୀ ଏବଂ କ୍ଲାଏଣ୍ଟଙ୍କ ମଧ୍ୟରେ ଥିବା ଗୋପନୀୟ ଚୁକ୍ତିନାମାକୁ ଉଲ୍ଲଂଘନ କରିଛନ୍ତି।
ଏହି ମାମଲାରେ ଟ୍ରମ୍ପ କୋହେନଙ୍କୁ ନେଇ ଅଭିଯୋଗ କରିଛନ୍ତି, ସେ ତାଙ୍କ ବିରୋଧରେ ବିଭ୍ରାନ୍ତିକର କାହାଣୀ ପ୍ରଚାର କରୁଛନ୍ତି, ଯାହା ତାଙ୍କ ଭାବମୂର୍ତ୍ତିକୁ ବହୁତ କ୍ଷତି ପହଞ୍ଚାଇଛି। ମୁଁ ଏହି ମକଦ୍ଦମା ଦାୟର କରିଛି କାରଣ କୋହେନ ତାଙ୍କ ଅସଦାଚରଣ ସହ ସମସ୍ତ ସୀମା ଅତିକ୍ରମ କରିଛନ୍ତି ଏବଂ ତାଙ୍କ ବିରୋଧରେ ମକଦ୍ଦମା ଦାୟର କରିବା ବ୍ୟତୀତ ମୋ ପାଖରେ ଅନ୍ୟ କୌଣସି ବିକଳ୍ପ ନାହିଁ ବୋଲି ଟ୍ରମ୍ପ କହିଛନ୍ତି।
