ଓ୍ବାଶିଂଟନ,୪।୫ : ଲେଖିକା ଇ. ଜିନ କାରୋଲଙ୍କ ଦ୍ୱାରା ହୋଇଥିବା ବଳାତ୍କାର ଅଭିଯୋଗରେ ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବିଚାରର ସମ୍ମୁଖୀନ ହୋଇଛନ୍ତି। ଟ୍ରମ୍ପ ମାନହଟ୍ଟନ ଫେଡେରାଲ ଖଣ୍ଡପୀଠରେ ରେକର୍ଡ ହୋଇଥିବା ଏକ ଭିଡିଓ ବୟାନରେ ବଳାତ୍କାର ଅଭିଯୋଗକୁ ଖଣ୍ଡନ କରିଛନ୍ତି। ଟ୍ରାଏଲ ସମୟରେ ସେ ବ୍ୟକ୍ତିଗତ ଭାବେ ହାଜର ହୋଇପାରିବେ ନାହିଁ ବୋଲି ଟ୍ରମ୍ପ ଦାବି କରିଛନ୍ତି। ଅଭିଯୋଗ ହୋଇଛି, ଟ୍ରମ୍ପ ନ୍ୟୁୟର୍କର ବର୍ଗଡୋର୍ଡ ଗୁଡମ୍ୟାନ ବିଭାଗ ଷ୍ଟୋରରେ ଦଶନ୍ଧି ପୂର୍ବରୁ ଲେଖିକାଙ୍କୁ ବଳାତ୍କାର କରିଥିଲେ।
ତାଙ୍କ ଭିଡିଓ ବିବୃତ୍ତିରେ ଟ୍ରମ୍ପ କହିଛନ୍ତି, ଏହା ଏକ ଶସ୍ତା ଏବଂ ହାସ୍ୟାସ୍ପଦ କାହାଣୀ । ଏହା ଏକ ମନଗଢ଼ା କାହାଣୀ। ଏଥିରେ କୌଣସି ସତ୍ୟତା ନାହିଁ। ଟ୍ରମ୍ପଙ୍କ ବିରୋଧରେ ଚାଲିଥିବା ଶୁଣାଣି ହେବାର ୬ ଦିନ ବିତିଗଲାଣି ଏବଂ ଏହା ଆସନ୍ତା ସପ୍ତାହ ପର୍ଯ୍ୟନ୍ତ ଚାଲିପାରେ। ସୂଚନାଯୋଗ୍ୟ ଲେଖିକା କାରୋଲ ଅକ୍ଟୋବର୨୦୨୨ରେ ଏକ ସୋସିଆଲ ମିଡିଆ ପୋଷ୍ଟ ମାଧ୍ୟମରେ ପ୍ରକାଶ କରିଥିଲେ ୯୦ ଦଶକରେ ଟ୍ରମ୍ପ ତାଙ୍କୁ ବଳାତ୍କାର କରିଥିଲେ। ଏଥି ସହିତ ଟ୍ରମ୍ପ ଏହାକୁ ଏକ ମିଥ୍ୟା କାହାଣୀ ବୋଲି କହି ବଳାତ୍କାର ଅଭିଯୋଗକୁ ଅସ୍ବୀକାର କରିଛନ୍ତି।
ଅନ୍ୟ ଦୁଇଜଣ ମହିଳା ମଧ୍ୟ ଟ୍ରମ୍ପଙ୍କ ବିରୋଧରେ ଯୌନ ନିର୍ଯାତନା ଅଭିଯୋଗ ଆଣିଛନ୍ତି। ଯେଉଁଥିରେ ପୂର୍ବତନ ପିପୁଲ ମ୍ୟାଗାଜିନର ଖବରଦାତା ନତାଶା ଷ୍ଟାନୋଫଙ୍କ ନାମ ଅନ୍ତର୍ଭୁକ୍ତ। ନତାଶା ଅଭିଯୋଗ କରିଛନ୍ତି ଟ୍ରମ୍ପ ୨୦୦୫ ରେ ଫ୍ଲୋରିଡାର ମାର୍ ଲୋଗୋ କ୍ଲବରେ ତାଙ୍କୁ ଯୌନ ନିର୍ଯାତନା ଦେଇଥିଲେ। ଏଥି ସହିତ ଟ୍ରମ୍ପଙ୍କ ବିରୋଧରେ ଏଭଳି ଅଭିଯୋଗ ଆଣିଥିବା ଦ୍ୱିତୀୟ ମହିଳା ଜେସିକା ଲିଡସ ମଧ୍ୟ ଅଭିଯୋଗ କରିଛନ୍ତି ଟ୍ରମ୍ପ ୧୯୭୯ ମସିହାରେ ତାଙ୍କୁ ଯୌନ ନିର୍ଯାତନା ଦେଇଥିଲେ।
୨୦୨୪ରେ ହେବାକୁ ଥିବା ଆମେରିକାର ରାଷ୍ଟ୍ରପତି ନିର୍ବାଚନ ପାଇଁ ଡୋନାଲ୍ଡ ଟ୍ରମ୍ପ ମଧ୍ୟ ତାଙ୍କର ପ୍ରାର୍ଥୀତ୍ୱ ି ଉପସ୍ଥାପନ କରୁଛନ୍ତି। ଏପରି ପରିସ୍ଥିତିରେ, ଏହି ବିଚାର ତାଙ୍କର ସମସ୍ୟା ବଢ଼ାଇବାରେ ଲାଗିଛି।
