ଲାଠୋର, ୧୮ା୪(ଡ଼ି.ଏନ.ଏ.): ବଲାଙ୍ଗୀର ଜିଲା ଖପ୍ରାଖୋଲ ବ୍ଳକ କରୁଆଝର ପଞ୍ଚାୟତ ଅନ୍ତର୍ଗତ ସାନଗୁର୍ଜିଭଟା ସରକାରୀ ନୂତନ ପ୍ରକଳ୍ପ ଉଚ୍ଚ ପ୍ରାଥମିକ ବିଦ୍ୟାଳୟରେ ରହିଥିବା ଋତୁକାଳୀନ ଆବାସିକ ପ୍ରଯତ୍ନ କେନ୍ଦ୍ରରେ ପାନୀୟ ଜଳ ସମସ୍ୟା ଦେଖାଦେଇଛି। ଫଳରେ ଏଠାରେ ଥିବା ଛାତ୍ରୀଛାତ୍ର ପାଣି ପାଇଁ ହଇରାଣ ହେଉଛନ୍ତି। ଆବାସିକ ପ୍ରଯତ୍ନ କେନ୍ଦ୍ରରେ ୪୭ ଜଣ ଛାତ୍ରୀଛାତ୍ର ରହୁଛନ୍ତି। ସ୍ନାନଶୌଚାଦି ପାଇଁ ଗୋଟିଏ ନଳକୂପ ଏବଂ ଜଳଯୋଗାଣ କେନ୍ଦ୍ରରୁ ଜଳ ଯୋଗାଣ ବ୍ୟବସ୍ଥା ରହିଛି। ହେଲେ ୧୫ ଦିନରୁ ଉର୍ଦ୍ଧ୍ୱ ହେବ ସେଠାରେ ଥିବା ନଳକୂପ ଖରାପ ହୋଇଯାଇଛି। ଫଳରେ ଆବାସିକ କେନ୍ଦ୍ରର ୪୭ ଛାତ୍ରୀଛାତ୍ର ତଥା ବିଦ୍ୟାଳୟକୁ ପଢିବାକୁ ଆସୁଥିବା ଛାତ୍ରୀଛାତ୍ରଙ୍କୁ ପାଣି ନିଅଣ୍ଟ ହେଉଛି। ତାତି ବଢିଥିବା ଯୋଗୁଁ ଜଳାଭାବ ପରିସ୍ଥିତିକୁ ସଙ୍ଗୀନ କରିଛି। ସରକାରୀ ନିୟମ ଅନୁସାରେ ଆବାସିକ ପ୍ରଯତ୍ନ କେନ୍ଦ୍ରର ଛାତ୍ରୀଛାତ୍ର ଶୌଚ ଏବଂ ସ୍ନାନ ପାଇଁ ବାହାରକୁ ଯିବା କଥା ନୁହେଁ। ହେଲେ ପାଣିର ଅଭାବ ହେତୁ ସେମାନେ ବାଧ୍ୟ ହୋଇ ବିପଦପୂର୍ଣ୍ଣ ଅବସ୍ଥାରେ ବାହାରକୁ ଯାଉଛନ୍ତି। ଯଦି ଏ ନେଇ କୌଣସି ଅଘଟଣ ଘଟେ କିଏ ଦାୟି ହେବ ବୋଲି ଗ୍ରାମର ସଚେତନ ଯୁବ ଗୋଷ୍ଠୀ କହିଛନ୍ତି। ନଳକୂପ ମରାମତି ପାଇଁ କରୁଆଁଝର ସରପଞ୍ଚଙ୍କୁ ଅବଗତ କରାଯାଇଥିଲା। ହେଲେ ଅଦ୍ୟାବଧି ମରାମତି କରାଯାଇ ନାହଁି ବୋଲି ପ୍ରଧାନ ଶିକ୍ଷକ ଭଗବାନ ସେଠ ପ୍ରକାଶ କରିଛନ୍ତି। ଏନେଇ ସରପଞ୍ଛ ଜପସ୍ମିନି ସାହୁଙ୍କୁ ପଚାରିବାରୁ ଖୁବ୍ଶୀଘ୍ର ନଳକୂପ ମରାମତି କରାଯିବ ବୋଲି କହିଛନ୍ତି।
