କଟକ,୧୫ା୭(ଶିଳ୍ପା ପ୍ରିୟଦର୍ଶିନୀ): କଟକ ପୁରୀଘାଟସ୍ଥିତ ଘରୋଇ ନର୍ସିଂହୋମ୍ ତ୍ରିଶା ହସ୍ପିଟାଲରେ ଶନିବାର ହୋଇଥିବା ଅଗ୍ନିକାଣ୍ଡ ଘଟଣାରେ ଏକ ଦୁଃଖଦ ଖବର ସାମ୍ନାକୁ ଆସିଛି। ନିଆଁ ଲାଗିବା ପରେ ଏଠାରେ ଚିକିତ୍ସିତ ହେଉଥିବା ୪୫ ଶିଶୁ ଓ ବୟସ୍କ ରୋଗୀଙ୍କୁ ଏସ୍ସିବି ମେଡିକାଲ, ଶିଶୁଭବନ ଓ କେତେକ ଘରୋଇ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା। ହେଲେ ଶିଶୁଭବନକୁ ସ୍ଥାନାନ୍ତର ହୋଇଥିବା ୧୭ ଶିଶୁଙ୍କ ମଧ୍ୟରୁ ଜଣେ ଶିଶୁକନ୍ୟାର ମୃତ୍ୟୁ ଘଟିଛି। ମୃତ ଶିଶୁ ଜଣକ ଭଦ୍ରକ ଜିଲା ଚାନ୍ଦବାଲି ଥାନା ଅନ୍ତର୍ଗତ ଆମ୍ବୋଲୋ ଗ୍ରାମରେ।
ତେବେ ଶିଶୁଟିର ମୃତ୍ୟୁ ଶନିବାର ରାତିରେ ହୋଇଥିଲେ ମଧ୍ୟ ଶିଶୁଭବନ କର୍ତ୍ତୃପକ୍ଷ ତାହାକୁ ଲୁଚାଇ ରଖିଥିବା ତାଙ୍କ ବାପା ବିଜୟ ବେହେରା ରବିବାର ଗୁରୁତର ଅଭିଯୋଗ ଆଣିଛନ୍ତି। ଏପରିକି ତାଙ୍କ ପିଲାର ମୃତ୍ୟୁ ପାଇଁ ଶିଶୁଭବନକୁ ହିଁ ସମ୍ପୂର୍ଣ୍ଣ ରୂପେ ଦାୟୀ କରିଛନ୍ତି। ତାଙ୍କ କହିବାନୁସାରେ, ଶିଶୁକନ୍ୟାଟି ଗତ ୭ ତାରିଖରେ ଭଦ୍ରକରେ ଜନ୍ମ ହୋଇଥିଲା। ପିଲା ପାଇଁ ଆଇସିୟୁ ଜରୁରୀ ଥିଲା। ଡାକ୍ତର କଟକ ଶିଶୁ ଭବନକୁ ରେଫର କରିବାରୁ ବାପା ବିଜୟ ପିଲାକୁ ଧରି ଏଠାରେ ପହଞ୍ଚଥିଲେ। ହେଲେ ଶିଶୁଭବନରେ ଆଇସିୟୁ ମିଳି ନ ଥିଲା।
ଶିଶୁଭବନର ଜଣେ ସିକ୍ୟୁରିଟି ଗାର୍ଡ ତାଙ୍କୁ ତ୍ରିଶା ନର୍ସିଂହୋମ୍ ନମ୍ବର ଦେଇ ସେଠାକୁ ନେଇଯିବାକୁ କହିଥିଲେ। ୮ ତାରିଖରେ ଶିଶୁଟିକୁ ତ୍ରିଶା ନର୍ସିଂହୋମ୍କୁ ସ୍ଥାନାନ୍ତର କରାଯାଇଥିଲା। ତୃତୀୟ ମହଲାରେ ଥିବା ଆଇସିୟୁରେ ପିଲାର ଚିକିତ୍ସା ଚାଲିଥିଲା। ତେବେ ନର୍ସିଂହୋମ୍ରେ ନିଆଁ ଲାଗିବା ସମୟରେ ବିଜୟ ବାହାରେ ଥିଲେ। ମେଡିକାଲ ଭିତରକୁ ଯିବାକୁ ଚେଷ୍ଟା କରିଥିଲେ ମଧ୍ୟ ଧୂଆଁ ଓ ଲୋକଙ୍କ ଧାଁଦୌଡ଼ ଭିତରେ ଯାଇପାରି ନ ଥିଲେ। ବାହାରପଟୁ ଆଜ୍ବେଷ୍ଟସ୍, ତାଜା ଆଦି ଚଢ଼ି ୩ ମହଲାରେ ପହଞ୍ଚଥିଲେ। ତାଙ୍କ ଝିଅକୁ ଆଇସିୟୁରୁ ବାହାର କରାଯାଉଥିଲା। ହଠାତ୍ ପାଟିରୁ ବ୍ଲଡ୍ ବାହାରିଥିଲା। ତଳକୁ ଆଣିଥିଲେ ମଧ୍ୟ ଆମ୍ବୁଲାନ୍ସ ନ ଥିଲା। ଏହା ଭିତରେ ୨ ଘଣ୍ଟା ବିତିଯାଇଥିଲା। ପରେ ଆମ୍ବୁଲାନ୍ସରେ ଶିଶୁଭବନ ଅଣାଯାଇ ଆଇସିୟୁରେ ଭର୍ତ୍ତି କରାଯାଇଥିଲା। ରାତି ପ୍ରାୟ ସାଢ଼େ ୧୦ଟାବେଳେ ଶିଶୁଟିର ମୃତ୍ୟୁ ଘଟିଥିବା ଶୁଣିଥିଲେ ମଧ୍ୟ ହସ୍ପିଟାଲ ପକ୍ଷରୁ କୌଣସି ସୂଚନା ଦିଆଯାଇ ନ ଥିଲା।
ବାରମ୍ବାର ଶିଶୁଭବନ ଡାକ୍ତରଙ୍କୁ ପଚାରିବାରୁ ସମସ୍ତେ କେବଳ ଗୁରୁତର ବୋଲି କହୁଥିଲେ। ରବିବାର ସକାଳେ ସ୍ବାସ୍ଥ୍ୟମନ୍ତ୍ରୀ ଶିଶୁଭବନ ଆସି ଯିବା ପରେ ବାପା ବିଜୟ ସୁପରିଣ୍ଟେଣ୍ଡେଣ୍ଟଙ୍କୁ ତାଙ୍କ ଝିଅ ସମ୍ପର୍କରେ ପଚାରିଥିଲେ। ପରେ ତାଙ୍କୁ ମୃତ୍ୟୁ ଖବର ଦିଆଗଲା। ବିଜୟ କହିଛନ୍ତି, ପ୍ରଥମେ ଶିଶୁଭବନରେ ଆଇସିୟୁ ମିଳିଥିଲେ ଓ କର୍ମଚାରୀ ତ୍ରିଶା ହସ୍ପିଟାଲକୁ ପଠାଇ ନ ଥିଲେ ମୋ ଝିଅ ବଞ୍ଚିଯାଇଥାନ୍ତା। ଶିଶୁଭବନରେ ଆଇସିୟୁ ଫାଙ୍କା ରଖାଯାଇ ଘରୋଇ ହସ୍ପିଟାଲକୁ ରୋଗୀ ପଠାଯାଉଛି। ଜରୁରୀ ସମୟରେ ଯଦି ଆଇସିୟୁ ମିଳିପାରୁଛି, ତେବେ ମୋ ଗୁରୁତର ଝିଅକୁ କାହିଁକି ସେତେବେଳେ ଆଇସିୟୁ ଦିଆଗଲାନାହିଁ।
ସ୍ବାସ୍ଥ୍ୟମନ୍ତ୍ରୀଙ୍କ ଗସ୍ତ ପାଇଁ ଶିଶୁ ଭବନ କର୍ତ୍ତୃପକ୍ଷ ମୃତ୍ୟୁକୁ ଲୁଚାଇ ରଖିଥିଲେ ବୋଲି ବିଜୟ ଗଣମାଧ୍ୟମରେ ଅଭିଯୋଗ କରିଛନ୍ତି। ଅନ୍ୟପକ୍ଷରେ ମୃତଦେହ ବ୍ୟବଚ୍ଛେଦ ନ କରି ଶିଶୁଭବନ ପକ୍ଷରୁ ପରିବାର ଲୋକଙ୍କୁ ହସ୍ତାନ୍ତର କରିଦିଆଯାଇଥିବାରୁ ଆଉଏକ ପ୍ରଶ୍ନବାଚୀ ସୃଷ୍ଟି ହୋଇଛି। ଏନେଇ ଶିଶୁଭବନ ସୁପରିଣ୍ଟେଣ୍ଡେଣ୍ଟ ପ୍ରଦୀପ କୁମାର ଜେନା କହିଛନ୍ତି, ଏବେ ଶିଶୁଭବନରେ ମୋଟ ୧୪ଜଣ ଶିଶୁଙ୍କର ଚିକିତ୍ସା କରାଯାଉଥିବାବେଳେ ୧୩ ଶିଶୁଙ୍କ ସ୍ବାସ୍ଥ୍ୟାବସ୍ଥା ସ୍ଥିର ଓ ଜଣେ ଶିଶୁଙ୍କ ଅବସ୍ଥା ଗୁରୁତର ରହିଛି। ସମସ୍ତଙ୍କ ଚିକିତ୍ସା ଜାରି ରହିଛି। ଏହାସହ ଜଣେ ଶିଶୁର ମୃତ୍ୟୁ ହୋଇଛି। ୭ଦିନ ହେବ ଶିଶୁଟି ଜନ୍ମ ହୋଇଥିବାବେଳେ ଶିଶୁଟିର ସ୍ବାସ୍ଥ୍ୟାବସ୍ଥା ଠିକ୍ ନ ଥିଲା। ମୃତ ଶିଶୁଟିର କୌଣସି ଅଗ୍ନିକାଣ୍ଡ ସମ୍ପର୍କିତ କ୍ଷତାକ୍ତ ନ ଥିବା ସେ କହିଛନ୍ତି।
ଅନ୍ୟପକ୍ଷରେ ଅଗ୍ନିକାଣ୍ଡ ପରେ ତ୍ରିଶା ନର୍ସିଂହୋମ୍ରୁ ଏସ୍ସିବି ମେଡିକାଲକୁ ୧୮ଜଣ ରୋଗୀଙ୍କୁ ସ୍ଥାନାନ୍ତର କରାଯାଇଥିବାବେଳେ ରବିବାର ୪ଜଣଙ୍କୁ ଡିସ୍ଚାର୍ଜ କରାଯାଇଛି। ଅନ୍ୟ ୧୪ଜଣଙ୍କ ମଧ୍ୟରେ ୩ଜଣ ଶିଶୁଙ୍କୁ ଏସ୍ଏନ୍ସିୟୁ, ୪ଜଣଙ୍କୁ ଆଇସିୟୁ ଓ ୭ଜଣଙ୍କୁ ଜେନେରାଲ ୱାର୍ଡରେ ରଖାଯାଇ ଚିକିତ୍ସା ଚାଲିଥିବା ମେଡିକାଲ ପକ୍ଷରୁ ସୂଚନା ଦିଆଯାଇଛି।
