ଦାରିଙ୍ଗବାଡ଼ି,୨୧ା୧୨(ଡି.ଏନ୍.ଏ): ସମଗ୍ର କନ୍ଧମାଳ ଜିଲା ଏବେ ଶୀତରେ ଥରୁଛି। ଓଡ଼ିଶାର କଶ୍ମୀର କୁହାଯାଉଥିବା ଦାରିଙ୍ଗବାଡ଼ିରେ ପାରଦ ଦିନକୁ ଦିନ ଖସିବାରେ ଲାଗିଛି। ସୋମବାର ସକାଳ ୮ଟା ସୁଦ୍ଧା ୬ ଡିଗ୍ରୀ ତାପମାତ୍ରା ରହିଥିବା ବ୍ଲକ କାର୍ଯ୍ୟାଳୟ ସୂତ୍ରରୁ ଜଣାପଡ଼ିଛି। ଦାରିଙ୍ଗବାଡ଼ି ସମେତ ଏହାର ଆଖପାଖ କିଲାବାଡ଼ି, ଗ୍ରୀନବାଡ଼ି, ସିମନବାଡ଼ି, କିରିକୁଟି, ବାଡାବାଙ୍ଗା, ସୋନପୁର, ପର୍ତ୍ତମାହା ଆଦି ଅଞ୍ଚଳରେ ଘାସ , ଧାନ ବିଲ, ଚାଳ ଛପର ଘର ଉପରେ ତୁଷାରପାତ ହୋଇଥିବା ଦେଖିବାକୁ ମିଳିଛି। ଦାରିଙ୍ଗବାଡ଼ି ବଜାରକୁ ଛାଡ଼ିଦେଲେ ଅପହଞ୍ଚ ଇଲାକାରେ ଏହା ଠାରୁ ଆହୁରି କମ୍ ତାପମାତ୍ରା ରହିଥିବା ଆଶଙ୍କା କରାଯାଇଛି। ପ୍ରବଳ ଜାଡ଼ ଯୋଗୁ ସ୍ଥାନୀୟ ଲୋକଙ୍କ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଛି। ସବୁଠାରେ ଶୀତରୁ ଉପଶମ ପାଇଁ ନିଆଁ ଜାଳି ଲୋକେ ବସୁଥିବା ଦେଖିବାକୁ ମିଳିଛି।
ସୂଚନାଯୋଗ୍ୟ, ପୂର୍ବରୁ ତାପମାତ୍ରା ୯ ଡିଗ୍ରୀ ପର୍ଯ୍ୟନ୍ତ ରହିଥିବାବେଳେ ଚଳିତବର୍ଷ ସବୁଠାରୁ ଏହା କମ୍ ରେକର୍ଡ କରାଯାଇଥିବା କୁହାଯାଇଛି। ଆହୁରି ଶୀତ ବୃଦ୍ଧି ପାଇବା ସହ ତାପମାତ୍ରା ହ୍ରାସ ପାଇବା ଆଶଙ୍କା କରାଯାଇଛି। ଶୀତର ମଜା ନେବା ପାଇଁ ଇକୋ ରିଟ୍ରିଟ୍ ସହ ସମସ୍ତ ଘରୋଇ ଏବଂ ସରକାରୀ କଟେଜ, ହୋଟେଲରେ ପର୍ଯ୍ୟଟକଙ୍କ ଭିଡ଼ ଦେଖିବାକୁ ମିଳିଛି। ସେହିପରି ରବିବାର ଛୁଟିଦିନରେ ହଜାର ସଂଖ୍ୟାରେ ପର୍ଯ୍ୟଟକ ଦାରିଙ୍ଗବାଡ଼ିକୁ ଆସିଥିବା ନେଚରପାର୍କ ଏବଂ ହିଲ୍ ଭିୟୁ ଓ କଫି ବଗିଚା ରେକର୍ଡ଼ରୁ ଜଣାପଡ଼ିଛି।
