ରସୁଲପୁର,୨୦ା୫(ଡି.ଏନ.ଏ.): ରସୁଲପୁର ବ୍ଲକ ଅଞ୍ଚଳରେ ଶୁକ୍ରବାର କାଳବୈଶାଖୀ ତାଣ୍ଡବ ରଚିଛି। ଅପରାହ୍ନରେ ସ୍ବଳ୍ପ ଅବଧିର ଝଡ଼ତୋଫାନ ଯୋଗୁ ଓଡ଼ିଶୋ ପଞ୍ଚାୟତ ବିଶେଷ କ୍ଷତିଗ୍ରସ୍ତ ହୋଇଛି। ଏହି ରାସ୍ତା ପାର୍ଶ୍ୱରେ ଥିବା ଗଛଗୁଡ଼ିକର ଡାଳ ଭାଙ୍ଗି ପଡ଼ିବାରୁ ବାରବାଟୀ-ବାହାବଳପୁର ପୂର୍ତ୍ତ ବିଭାଗ ରାସ୍ତା, ବାରବାଟୀ-ମାନପୁର ଗ୍ରାମ୍ୟ ଉନ୍ନୟନ ରାସ୍ତାରେ ଯାତାୟାତ ବାଧାପ୍ରାପ୍ତ ହୋଇଛି। ବିଜୁଳି ଆଲୁଅ ନ ଥିବାରୁ ୩୦ରୁ ଊର୍ଦ୍ଧ୍ୱ ଗାଁ ଅନ୍ଧାରରେ ରହିଛି। ଗାଁ ଲୋକେ ରାସ୍ତା ଉପରୁ ଗଛ ଡାଳଗୁଡିକୁ କାଟି ସଫା କରି ଯାତାୟାତକୁ ସୁଗମ କରିଛନ୍ତି। ବିଦ୍ୟୁତ ବିଭାଗର କର୍ମଚାରୀ ବିଦ୍ୟୁତ ସରବରାହକୁ ସଜାଡିବା ଦିଗରେ ବ୍ୟସ୍ତ ଅଛନ୍ତି। ତେବେ କେତେବେଳ ବିଜୁଳି ଆଲୁଅ ସ୍ବାଭାବିକ ହୋଇପାରିବ ସେ ନେଇ ବିଭାଗ ପକ୍ଷରୁ ସ୍ପଷ୍ଟ କରାଯାଇ ପାରୁନାହିଁ।
ଦିନରେ ତାତି ସାଙ୍ଗକୁ ଗରମ ଗୁଳୁଗୁଳି ଲୋକଙ୍କୁ ଅସ୍ତବ୍ୟସ୍ତ କରୁଥିବାବେଳେ ଅପରାହ୍ନ କାଳବୈଶାଖିରେ କଚ୍ଚାଘର, ପନିପରିବା କ୍ଷେତ, ବଡ଼ବଡ଼ ଗଛ, ବିଦ୍ୟୁତ ସରବରାହ ଆଦି ବିଶେଷ କ୍ଷତିଗ୍ରସ୍ତ ହେଉଛି। ବିଜୁଳି ଆଲୁଅ ନ ଥିବାରୁ ଲୋକେ ଅକଥନୀୟ ଅସୁବିଧାର ସମ୍ମୁଖିନ ହେଉଛନ୍ତି। ଏଭଳି ସ୍ଥିିତି ଏହି ବ୍ଲକର ବାରବାଟୀ ଅଞ୍ଚଳରେ ଦେଖିବାକୁ ମିଳିଥିଲା। ଓଡ଼ିଶୋ ପଞ୍ଚାୟତ ମାନପୁରଠାରେ ରାସ୍ତା ପାର୍ଶ୍ୱସ୍ଥ ଗଛ ଗୁଡିକର ଡାଳ ଭାଙ୍ଗି ପଡିବାରୁ ବାରବାଟୀ-ଯାଜପୁରରୋଡ, ବାରବାଟୀ-ମଧୁବନକୁ ସଂଯୋଗ କରୁଥିବା ରାସ୍ତା ଦୁଇଟିରେ ଯାତାୟାତ ଠପ୍ ହୋଇଯାଇଥିଲା। ରାସ୍ତାର ଉଭୟ ପାର୍ଶ୍ୱରେ ଶତାଧିକ ଗାଡିମୋଟର ଅଟକି ରହିଥିଲା। ରାସ୍ତାଦେଇ ବାରବାଟୀ ବଜାରକୁ ଆସିବାକୁ ହେଲେ ଯାତ୍ରୀଙ୍କୁ ୧୦ କି.ମି.ରୁ ଊର୍ଦ୍ଧ୍ୱ ବୁଲିବାକୁ ପଡ଼ିଛି। ରିପୋର୍ଟ ଲେଖା ହେବା ବେଳକୁ ରାସ୍ତାରୁ ଗଛ ଡାଳଗୁଡିକ ହଟିବା ପରେ ଯାତାୟତ ସ୍ବାଭିକ ହୋଇପାରିଛି ବୋଲି ସୂଚନା ମିଳିଛି। ହେଲେ ବିଦ୍ୟୁତ୍ ସେବା ବ୍ୟବସ୍ଥିତ ହୋଇପାରି ନ ଥିବାରୁ କୁଆଖିଆ ବିଦ୍ୟୁତ୍ ଡିଭିଜନର ମଠସାହି ସେକ୍ସନ ଅଧୀନ ଓଡ଼ିଶୋ, ସିଂହାପୁର, କଲଣ, ବାରବାଟୀ ଆଦି ପଞ୍ଚାୟତରେ ୩୦ରୁ ଊର୍ଦ୍ଧ୍ୱ ଗାଁ ଅନ୍ଧାରରେ ରହିଛି।
