ଖୋର୍ଦ୍ଧା ଅଫିସ,୨୭ା୬: ପବିତ୍ର ଦେବସ୍ନାନ ପୂର୍ଣ୍ଣିମାରେ ଖୋର୍ଦ୍ଧା ଜାଗୁଳାଇପାଟଣାସ୍ଥିତ ଶ୍ରୀ ଅନନ୍ତ ପୁରୁଷୋତ୍ତମ (ଶ୍ରୀଜଗନ୍ନାଥ), ବଳଭଦ୍ର ଓ ଦେବୀ ସୁଭଦ୍ରା ୧୦୮ଗଡୁ ସୁବାସିତ ଜଳରେ ସ୍ନାନ ପରେ ଜ୍ୱରରେ ପୀଡ଼ିତ ହୋଇଛନ୍ତି। ଗୁରୁବାରଠାରୁ ଠାକୁରଙ୍କ ଅଣସର ନୀତି ଆରମ୍ଭ ହୋଇଛି। ଶ୍ରୀବିଗ୍ରହଙ୍କ ଶାସ୍ତ୍ରୀୟ ବିଧିରେ ଚାଲିଛି ଉପଚାର। ୧୪ଦିନ ଧରି ଚାଲିବ ଗୁପ୍ତସେବା ନୀତି। ଶନିବାର ଅଣସରର ତୃତୀୟ ଦିନରେ ଶ୍ରୀଜୀଉଙ୍କ ଓଦାବସ୍ତ୍ର ଫିଟା ନୀତି ସମ୍ପନ୍ନ ହୋଇଥିବା ମନ୍ଦିର ପୂଜକ କମଳଲୋଚନ ଦାସ ମହାରାଜ କହିଛନ୍ତି। ସ୍ନାନବେଦିରେ ଅତ୍ୟଧିକ ସ୍ନାନ ଯୋଗୁ ଠାକୁରଙ୍କ ଶ୍ରୀଅଙ୍ଗ ଓଦା ହୋଇଯାଇଛି। ଶନିବାର ଏହି ଓଦା ବସ୍ତ୍ର ଓଲାଗି କରିଛନ୍ତି ମନ୍ଦିର ପୂଜକ। ବସ୍ତ୍ର ଓଲାଗି ପରେ ଶ୍ରୀଜୀଉଙ୍କୁ ପଣାଭୋଗ ଅର୍ପଣ କରାଯାଇଛି।
ନୀତି ନିଷ୍ଠା ପୂର୍ବକ କରାଯାଇଥାଏ। ଗୁପ୍ତସେବାରେ ରହିଥିବା ପୂଜକମାନେ ବାହାରକୁ ଯାଆନ୍ତି ନାହିଁ। ଅଣସର ଗୃହକୁ ଥରେ ପ୍ରବେଶ କଲେ, ନୀତି ସମ୍ପନ୍ନ ନ ହେବା ପର୍ଯ୍ୟନ୍ତ ବାହାରକୁ ଆସନ୍ତି ନାହିଁ। ଠାକୁରଙ୍କ ଲାଗି ନୈବେଦ୍ୟ, ପୁଷ୍ପ ବାହାରକୁ ଯାଏ ନାହିଁ। ଏହି ସମୟରେ ଶ୍ରୀଜୀଉଙ୍କୁ ଧଳା ପୁଷ୍ପ ଲାଗି ହୋଇଥାଏ। ଶ୍ରୀଜୀଉଙ୍କୁ ଚକଟା ଓ ପଣାଭୋଗ ଅର୍ପଣ କରାଯାଏ। ଅଣସର ପିଣ୍ଡିରେ କେହି ପରସ୍ପର ମଧ୍ୟରେ କଥାବାର୍ତ୍ତା ହୁଅନ୍ତି ନାହିଁ। ଠାକୁରଙ୍କ ମନ୍ତ୍ରୋଚ୍ଚାର, ଧ୍ୟାନ, ଜପରେ ନିମଗ୍ନ ରୁହନ୍ତି। ଏଠାରେ ପଟିଦିଅଁ ପୂଜା ପରମ୍ପରା ନାହିଁ। ବିଧି ରକ୍ଷା ଲାଗି ଅଣସର ଆଗରେ ଶ୍ରୀଜୀଉଙ୍କ ଚଳନ୍ତି ପ୍ରତିମା ମଦନମୋହନ, ରାମକୃଷ୍ଣ, ଶ୍ରୀଦେବୀ, ଭୂଦେବୀ, ଶାଳଗ୍ରାମ ବିଜେ କରନ୍ତି। ଅଣସର ୧୪ଦିନ ନୀତି ପ୍ରକାରେ ମଦନମୋହନଙ୍କ ନିକଟରେ ସମସ୍ତ ନୀତି ସମ୍ପନ୍ନ କରାଯାଏ ବୋଲି ମନ୍ଦିର ପୂଜକ କହିଛନ୍ତି।
ଏହି ମନ୍ଦିରରେ ସ୍ବତନ୍ତ୍ର ଭାବେ କୌଣସି ସେବାୟତ କିମ୍ବା ପୂଜକ ନାହାନ୍ତି। ଏଠାରେ ରହୁଥିବା ବାବାଜିମାନେ ଶ୍ରୀଜୀଉଙ୍କ ନୀତିକାନ୍ତି କରିଥାନ୍ତି। ଠାକୁରଙ୍କ ସେବାରେ ମୁଖ୍ୟ ପୂଜକ କମଳଲୋଚନ ମହାରାଜ, କୃଷ୍ଣଚନ୍ଦ୍ର ଦାସ, ଅଯୋଧ୍ୟ ଦାସ, ଧନେଶ୍ୱର ପଣ୍ଡା ପ୍ରମୁଖ ଏହି ନୀତି ସମ୍ପନ୍ନ କରୁଛନ୍ତି। ପରମ୍ପରା ଅନୁଯାୟୀ ଶ୍ରୀଜୀଉଙ୍କ ସମସ୍ତ ଗୁପ୍ତ ନୀତି ସମ୍ପନ୍ନ କରାଯାଇଥାଏ। ୫ମୀ(୨୯ତାରିଖ)ରେ ଫୁଲରୀତେଲ ଲାଗି କରାଯିବ। ଅଣସର ୧୦ଦିନରେ ଓଷୁଓ ଲାଗି କରାଯିବ। ଦଶମୀ(ଜୁଲାଇ ୪)ରେ ଚକା ବିଜେ, ଏକାଦଶୀ( ଜୁଲାଇ୫) ଖଳିଲାଗି ଏକାଦଶୀ, ଚତୁର୍ଦ୍ଦଶୀ (ଜୁଲାଇ ୮)ରେ ବନକଲାଗି, ଅମାବାସ୍ୟା( ଜୁଲାଇ ୯)ରେ ନେତ୍ରୋତ୍ସବ ଓ ନବଯୌବନ ଦର୍ଶନ ରହିଛି। ଏହି ସମସ୍ତ ନୀତି ସମ୍ପନ୍ନ ହେବ। ଏଠାରେ ପୂର୍ଣ୍ଣ ବିଗ୍ରହ(ହାତ ଗୋଡ଼ ଥିବା ଠାକୁର) ପୂଜା ପାଉଛନ୍ତି। ଭାରତବର୍ଷରେ ଅନ୍ୟ କୌଣସି ସ୍ଥାନରେ ଏଭଳି ଠାକୁର ନାହାନ୍ତି। ଠାକୁରଙ୍କ ମହିମା ଅପାର ବୋଲି କମଳ ମହାରାଜ କହିଛନ୍ତି।
