ଓ୍ବାଶିଂଟନ,୧୦।୪ : ଯେଉଁମାନେ ଆମେରିକା ଯିବାକୁ ଯୋଜନା କରୁଛନ୍ତି ସେମାନଙ୍କ ପାଇଁ ଖରାପ ଖବର। ଆମେରିକାର ବୈଦେଶିକ ବିଭାଗ ଭିଜା ଆବେଦନ ଶୁଳ୍କ ବୃଦ୍ଧି କରିବାକୁ ନିଷ୍ପତ୍ତି ନେଇଛି। କିଛି ଅଣ-ପ୍ରବାସୀ ଭିଜା ଉପରେ ଏହି ଶୁଳ୍କ ବୃଦ୍ଧି କରାଯାଇଛି। ଏହି ନିଷ୍ପତ୍ତି ସହିତ ଭାରତୀୟ ଛାତ୍ରୀଛାତ୍ର ଏବଂ ପର୍ଯ୍ୟଟକଙ୍କୁ ଭିଜା ପାଇଁ ଅଧିକ ଫି ଦେବାକୁ ପଡ଼ିବ।
ଆମେରିକାର ବୈଦେଶିକ ବିଭାଗ ଦ୍ୱାରା ଜାରି ବିବୃତ୍ତି ଅନୁଯାୟୀ, ଅଣ-ପ୍ରବାସୀ ଭିଜା (ଏନଆଇଭି) ପାଇଁ ବର୍ଦ୍ଧିତ ଶୁଳ୍କ ୩୦ ମେ ୨୦୨୩ ଠାରୁ ଲାଗୁ ହେବ। ଏହି ଭିଜା ଗୁଡିକରେ ପରିଦର୍ଶକ, ଟୁରିଷ୍ଟ ଭିସା, ଛାତ୍ର ଭିଜା ଏବଂ ଏକ୍ସଚେଞ୍ଜ ଭିଜିଟର ଭିଜା ଇତ୍ୟାଦି ଅନ୍ତର୍ଭୁକ୍ତ। ଭିଜା ଆବେଦନ ଶୁଳ୍କ ପାଇଁ ଦେୟ ଏକ ଗ୍ରେଡ ଭାବେ ବୃଦ୍ଧି କରାଯାଇଛି ।
ବ୍ୟବସାୟ କିମ୍ବା ପର୍ଯ୍ୟଟକ (ବି-୧ / ବି-୨ ଏବଂ ବିସିସି) ଭିଜା ଏବଂ ଅନ୍ୟାନ୍ୟ ଭିଜିଲାନ୍ସ ଭିତ୍ତିକ ଏନଆଇଭି ପରି ଛାତ୍ରୀଛାତ୍ର ଭିଜା ପାଇଁ ଦେୟରେ ୨ ହଜାର ଟଙ୍କା ବଢ଼ିବ। ଫଳରେ ଏବେ ଏହା ୧୩୦୦୦ ରୁ ପ୍ରାୟ ୧୫୦୦୦ ଟଙ୍କାକୁ ବୃଦ୍ଧି ପାଇବ । ବର୍ତ୍ତମାନର ବିନିମୟ ମୂଲ୍ୟ ଅନୁଯାୟୀ, ଏହି ନିୟମ ଲାଗୁ ହେବା ପରେ ଭାରତୀୟ ଛାତ୍ରୀଛାତ୍ରମାନଙ୍କୁ ଆମେରିକାର ଭିଜା ପାଇଁ ପ୍ରାୟ ୧୫,୧୪୦ଟଙ୍କା ଦେବାକୁ ପଡିବ।
ବିଭାଗ ଏହା ମଧ୍ୟ ସୂଚନା ଦେଇଛି ଯେ ଅସ୍ଥାୟୀ ଶ୍ରମିକ (ଏଚ,ଏଲ,ଓ,ପି,କ୍ୟୁ ଏବଂ ଆର ବର୍ଗ) ପାଇଁ କେତେକ ଆବେଦନ ଭିତ୍ତିକ ଅଣ-ପ୍ରବାସୀ ଭିଜା ଉପରେ ଦେୟ ମଧ୍ୟ ୧୫,୫୫୭ ରୁ ୧୬,୭୮୫ ଟଙ୍କାକୁ ବୃଦ୍ଧି ପାଇବ। ଏଥି ସହିତ ବ୍ୟବସାୟୀ, ନିବେଶକ ଏବଂ ଏକ ବିଶେଷ ବୃତ୍ତି (ଇ ବର୍ଗ) ଥିବା ଆବେଦନକାରୀଙ୍କ ପାଇଁ ଦେୟ ୧୬,୭୮୫ ରୁ ୨୫,୭୯୨ ଟଙ୍କାକୁ ବୃଦ୍ଧି ପାଇବ।
