ନୟାଗଡ଼ ଅଫିସ,୩।୧୧(ଲୋକନାଥ ମିଶ୍ର): ନୟାଗଡ ସହରର ଟ୍ରାଫିକ ବ୍ୟବସ୍ଥାକୁ ସଜାଡିବା ପାଇଁ ଉଦ୍ୟମ ହୋଇଥିଲା ା ନୟାଗଡ ଟ୍ରାଫିକ ପୋଷ୍ଟର ନବକଳେବର ପାଇଁ ପୁରୁଣା ବସଷ୍ଟାଣ୍ଡରେ ଶିଳାନ୍ୟାସ ହେବାର ୭ ମାସରୁ ଊର୍ଦ୍ଧ୍ୱ ସମୟ ବିତି ଯାଇଛି । ହେଲେ ଗୋଲେଇ ଟ୍ରାଫିକରେ କାର୍ଯ୍ୟ ଅଟକି ରହିଛି । ଗୋଲେଇ ଟ୍ରାଫିକର କାମ ଗତ ଜୁଲାଇ ମାସରେ ଶେଷ କରିବାକୁ ନିର୍ଦ୍ଦେଶ ରହିଥିଲା । ଅକ୍ଟୋବର ଯାଇ ନଭେମ୍ବର ମାସର ୨ ଦିନ ଶେଷ ହୋଇଥିଲେ ମଧ୍ୟ ଟ୍ରାଫିକ କାର୍ଯ୍ୟ ଶେଷ ହୋଇ ପାରୁନି । କାମ ଅଧାପନ୍ତରିଆ ହୋଇ ପଡି ରହିଥିବାବେଳେ ରାସ୍ତାର ଧୂଳିକୁ ବନ୍ଦ କରିବାକୁ ପାଣି ମଧ୍ୟ ପକାଯାଉନି ।
ଗତ ଫେବୃୟାରୀ ୨ରେ ନୟାଗଡ଼ ବିଧାୟକ ଅରୁଣ କୁମାର ସାହୁ ମୁଖ୍ୟ ଅତିଥି ରୂପେ ଯୋଗ ଦେଇ ୨କୋଟି ୧୫ ଲକ୍ଷ ବ୍ୟୟରେ ନିର୍ମାଣ ହେବାକୁ ଥିବା ଟ୍ରାଫିକ ପୋଷ୍ଟ ସହ ରାସ୍ତାର ଶିଳାନ୍ୟାସ କରିଥିଲେ। ପ୍ରସ୍ତାବିତ ଟ୍ରାଫିକ ପୋଷ୍ଟଟି ଗୋଲେଇ ଛକ କରି ନିର୍ମାଣ କରାଯିବାର ରହିଛି । ଗୋଲେଇ ଟ୍ରାଫିକ ଛକର ଭିତର ପାର୍ଶ୍ୱ ୧୮ ମିଟର ଓ ଏହାର ଚାରିପାଖରେ ୩ ଲେନ ରାସ୍ତା ହେବ । ଏହି ୩ ଲେନ୍ ରାସ୍ତା ୧୦.୫ ମିଟରର ଚଉଡା କରାଯାଇ ନିର୍ମାଣ କରାଯିବ ବୋଲି ପ୍ରସ୍ତାବ ରହିଛି। ଗୋଲେଇ ଟ୍ରାଫିକ ଛକଠାରୁ ଓଡ଼ଗଁା, ଖୋର୍ଦ୍ଧା, ଦଶପଲ୍ଲା ଓ ଖଣ୍ଡପଡାକୁ ପଡିଥିବା ରାସ୍ତା ୧୪ ମିଟର ଓସାର ଭିତରେ ୪ ଲେନର କରାଯିବ । ପ୍ରସ୍ତାବିତ ଟ୍ରାଫିକର ଗୋଲେଇ ଛକଠାରୁ ଖୋର୍ଦ୍ଧା, ଦଶପଲ୍ଲା ଓ ଓଡଗଁା ରାସ୍ତାରେ ୧୦୦ ମିଟର ପର୍ଯ୍ୟନ୍ତ ରାସ୍ତା ପ୍ରଶସ୍ତୀକରଣ କରାଯିବ । ପୁଣି ଖଣ୍ଡପଡା ରୋଡରେ ୬୦ ମିଟର ରାସ୍ତା ଅନୁରୂପ ଭାବେ ପ୍ରଶସ୍ତୀକରଣ ହେବ । ଜୁଲାଇ ମାସରେ କାମ ଶେଷ ହେବାକୁ ସରକାର ଧାର୍ଯ୍ୟ କରିଥିବାବେଳେ ମେ ମାସ ଶେଷ ସୁଧା କାର୍ଯ୍ୟ ଶେଷ ହେବାର ଥିଲା । ତେବେ ମେ, ଜୁନ ଯାଇ ଜୁଲାଇ ଯାଇ ନଭେମ୍ବର ଆରମ୍ଭ ହୋଇଥିବାବେଳେ କାମ କଛପ ଗତିରେ ଚାଲିଛି । ଜାତୀୟ ରାଜପଥ ବିଭାଗ, ବିଦ୍ୟୁତ୍, ଜନସ୍ବାସ୍ଥ୍ୟ ବିଭାଗ, ବନ ବିଭାଗ ଓ ପୌର ପରିଷଦ ସହଭାଗିତାରେ ପ୍ରକଳ୍ପର କାର୍ଯ୍ୟ ୨୦୨୩ ଜାନୁୟାରୀ ୨୧ରୁ ଆରମ୍ଭ ହୋଇଥିଲା । ହେଲେ ବିଭିନ୍ନ ବିଭାଗର ସମନ୍ବୟ ଅଭାବ ଯୋଗୁ କାମ ବିଳମ୍ବ ହେଉଥିବା କୁହାଯାଉଛି।
ଏନେଇ ବଲାଙ୍ଗୀର-ଖୋର୍ଦ୍ଧା ୫୭ ନଂ.ଜାତୀୟ ରାଜପଥର ସହକାରୀ ଯନ୍ତ୍ରୀ ସୁଲତା ସ୍ବାଇଁ କୁହନ୍ତି ଗୋଲେଇ ଟ୍ରାଫିକ ପାଇଁ ୨ କୋଟି ୧୫ ଲକ୍ଷ ଅର୍ଥ ମଞ୍ଜୁର ହୋଇଛି। ଆମେ କେବଳ ରାସ୍ତା କାର୍ଯ୍ୟ ପିଚୁ କରିବୁ । ନଭେମ୍ବର ଭିତରେ ଆମେ କାମ ଶେଷ କରିବୁ। ନୟାଗଡ଼ ପୌରାଞ୍ଚଳର ପୂର୍ବତନ ଚେୟାରମ୍ୟାନ ଭବାନୀ ଶଙ୍କର ଦାଶ କୁହନ୍ତି, ଗୋଲେଇ ଟ୍ରାଫିକ କାମ ଶୀଘ୍ର ଶେଷ କରିବା ଦରକାର । ଯାତ୍ରୀ ଓ ସାଧାରଣ ଲୋକ ହଇରାଣ ହେଉଛନ୍ତି। ଟ୍ରାଫିକ ଛକ ନିକଟରେ ଧୂଳି ଉଡିବା ଯୋଗୁ ଯାତାୟତ କଷ୍ଟ ହେଉଛି । ଜିଲା ସର ମହକୁମାରେ କାମ ଜାଣିଶୁଣି କଛପ ଗତିରେ କରାଯାଉଥିଲେ ମଧ୍ୟ ପ୍ରଶାସନିକ ସ୍ତରରେ ଅଙ୍କୁଶ ଲଗା ଯାଉ ନ ଥିବାରୁ ସାଧରଣ ଲୋକ ହଟହଟା ହେଉଛନ୍ତି । ଜିଲାପାଳ ଏ ଦିଗରେ ତୁରନ୍ତ ପଦକ୍ଷେପ ନେବା ଆବଶ୍ୟକ ବୋଲି ସେ କହିଛନ୍ତି ା
