ନୂଆଦିଲ୍ଲୀ, ୨୫।୧(ପି.ଟି.): ସାଧାରଣତନ୍ତ୍ର ଦିବସରେ ଆନ୍ଦୋଳନରତ ଚାଷୀମାନଙ୍କ ପ୍ରସ୍ତାବିତ ଟ୍ରାକ୍ଟର ରାଲିକୁ ଦିଲ୍ଲୀ ପୋଲିସ ଅନୁମତି ପ୍ରଦାନ କରିଛି। ରବିବାର ଏ ସମ୍ପର୍କରେ ପୋଲିସ ଏକ ସାମ୍ବାଦିକ ସମ୍ମିଳନୀରେ ସ୍ପଷ୍ଟ କରିଛି। ଜାନୁୟାରୀ ୨୬ରେ ଶାନ୍ତିପୂର୍ଣ୍ଣ ଭାବେ ରାଲି ବାହାର କରିବା ଲାଗି କୃଷକ ସଂଗଠନଗୁଡ଼ିକ ସହମତ ହେବା ପରେ ଅନୁମତି ଦିଆଯାଇଛି। ଏନେଇ ସଂଯୁକ୍ତ କିଷାନ ମୋର୍ଚ୍ଚାର କାର୍ଯ୍ୟକର୍ତ୍ତା ଓ ପୋଲିସ ମଧ୍ୟରେ ଦୀର୍ଘ ସମୟ ଆଲୋଚନା ହୋଇଥିଲା। ସୁରକ୍ଷା ବ୍ୟବସ୍ଥା ସମ୍ପର୍କରେ ଚାଷୀନେତାମାନଙ୍କୁ ଅବଗତ କରାଯାଇଥିଲା। ସାଧାରଣତନ୍ତ୍ର ଦିବସ ପରେଡ୍ ଦେଶର ଗର୍ବ ହୋଇଥିବାରୁ ଏହା ଯେପରି ବ୍ୟାଘାତ ନ ହୁଏ, ସେଥିପାଇଁ ସ୍ବତନ୍ତ୍ର ପୋଲିସ କମିଶନର(ଗୋଇନ୍ଦା) ଦେପେନ୍ଦ୍ର ପାଠକ ବାରମ୍ବାର ସତର୍କ କରାଇଥିଲେ।
କୃଷକ ନେତାଙ୍କ ସହ ହୋଇଥିବା ସହମତି ଅନୁଯାୟୀ ପୋଲିସ ଟିକ୍ରି ସୀମାରୁ ବ୍ୟାରିକେଡ୍ ହଟାଇବା ସହ ୫୨-୬୩ କିଲୋମିଟର ରାସ୍ତାକୁ ଅବରୋଧ ମୁକ୍ତ କରିବ। ସେହିପରି ସିଙ୍ଘୁ ସୀମାରୁ ଅନ୍ୟ ଏକ ୬୦ କିଲୋମିଟର ରାସ୍ତା ଏବଂ ଗାଜିପୁର ସୀମାରୁ ୪୬ କିଲୋମିଟର ରାସ୍ତାକୁ ଟ୍ରାକ୍ଟର ରାଲି ପାଇଁ ଛାଡ଼ିଦିଆଯିବ। ଦିଲ୍ଲୀ ସୀମା ଭିତରେ ୧୦୦ କିଲୋମିଟରରୁ ଊର୍ଦ୍ଧ୍ୱ ରାସ୍ତାରେ ଟ୍ରାକ୍ଟର ପରେଡ୍ ହେବ। ପ୍ରଥମ ରୁଟ୍ ସିଙ୍ଘୁ ସୀମାରୁ ଆରମ୍ଭ ହୋଇ ସଞ୍ଜୟ ଗାନ୍ଧୀ ଟ୍ରାନ୍ସପୋର୍ଟ ନଗରରୁ ବାଓ୍ବାନା ପର୍ଯ୍ୟନ୍ତ ଯିବ। ସେହିପରି ଦ୍ୱିତୀୟ ରୁଟ୍ରେ ରାଲି ଟିକ୍ରି ସୀମାରୁ ବାହାରି ନଙ୍ଗଲୋଇ-ନଜଫଗଡ଼ ଏବଂ ଝାରୋଡା ଦେଇ ଯିବାକୁ ଥିବାବେଳେ ତୃତୀୟ ରୁଟରେ ଗାଜିପୁରରୁ ଆରମ୍ଭ ହୋଇ ଅପ୍ସରା ସୀମା ଓ ହାପୁର ପର୍ଯ୍ୟନ୍ତ ଯିବ। ସମସ୍ତ ଶୋଭାଯାତ୍ରା କୁଣ୍ଡଲି ମାନେସାର ପଲଓ୍ବାଲ୍ ଏକ୍ସପ୍ରେସ୍ ଓ୍ବେରେ ଏକାଠି ହେବେ। ଟିକ୍ରି ସୀମାରୁ ୭ରୁ ୮ ହଜାର ଚାଷୀ ଟ୍ରାକ୍ଟର ରାଲିରେ ସାମିଲ ହେବାକୁ ଥିବାବେଳେ ଗାଜିପୁର ସୀମାରୁ ୧,୦୦୦ ଏବଂ ସିଙ୍ଘୁ ସୀମାରୁ ୫,୦୦୦ ଚାଷୀ ଟ୍ରାକ୍ଟର ରାଲିରେ ବାହାରିବେ।
ମଙ୍ଗଳବାର ସାଧାରଣତନ୍ତ୍ର ପରେଡ୍ ପରେ ଟ୍ରାକ୍ଟର ରାଲି କଡ଼ା ସୁରକ୍ଷା ମଧ୍ୟରେ ଆରମ୍ଭ ହେବ। ପ୍ରସ୍ତାବିତ ରାଲିକୁ ଭଣ୍ଡୁର କରିବା ପାଇଁ ପାକିସ୍ତାନରେ ୩୦୦ରୁ ଊର୍ଦ୍ଧ୍ୱ ଟୁଇଟର୍ ହ୍ୟାଣ୍ଡଲ୍ ସୃଷ୍ଟି ହୋଇଥିବା ସ୍ବତନ୍ତ୍ର ପୋଲିସ କମିଶନର କହିଛନ୍ତି। ଲୋକଙ୍କୁ ବିଭ୍ରାନ୍ତ କରିବା ଲାଗି ଜାନୁୟାରୀ ୧୩ରୁ ୧୮ ମଧ୍ୟରେ ଏହିସବୁ ଟୁଇଟର ହ୍ୟାଣ୍ଡଲ୍ ସୃଷ୍ଟି ହୋଇଥିବା ବିଭିନ୍ନ ସଂସ୍ଥାଠାରୁ ସୂଚନା ମିଳିଛି। ଏହା ଆମ ପାଇଁ ଏକ ଚ୍ୟାଲେଞ୍ଜିଂ କାର୍ଯ୍ୟ। ତେବେ କଡ଼ା ସୁରକ୍ଷା ମଧ୍ୟରେ ରାଲି କରାଯିବ ବୋଲି ଖବରଦାତା ସମ୍ମିଳନୀରେ ପାଠକ କହିଥିଲେ। ସୂଚନାଯୋଗ୍ୟ, କେନ୍ଦ୍ର ସରକାରଙ୍କ ୩ ନୂତନ କୃଷି ଆଇନକୁ ବିରୋଧ କରି ଦିଲ୍ଲୀର ବିଭିନ୍ନ ସୀମାରେ ହଜାର ହଜାର ଚାଷୀ ନଭେମ୍ବର ମାସରୁ ଆନ୍ଦୋଳନରେ ବସିଛନ୍ତି। ସରକାରଙ୍କ ସହ ବାରମ୍ବାର ବୈଠକ ସତ୍ତ୍ୱେ ସମାଧାନର ବାଟ ବାହାରିପାରୁ ନ ଥିବାରୁ କୃଷକ ସଂଗଠନଗୁଡ଼ିକ ଆନ୍ଦୋଳନକୁ ଆହୁରି ଜୋର୍ଦାର କରିବାକୁ ନିଷ୍ପତ୍ତି ନେଇଛନ୍ତି। ସେହିକ୍ରମରେ ସାଧାରଣତନ୍ତ୍ର ଦିବସରେ ଟ୍ରାକ୍ଟର ରାଲି ଯୋଜନା ହୋଇଛି। ଆଇନ ଶୃଙ୍ଖଳା ସୃଷ୍ଟି ହେବା ଆଶଙ୍କାରେ ରାଲି ବନ୍ଦ କରିବାକୁ ନିର୍ଦ୍ଦେଶ ଦେବା ଲାଗି କେନ୍ଦ୍ର ସରକାରଙ୍କ ପକ୍ଷରୁ ଦିଲ୍ଲୀ ପୋଲିସ ସୁପ୍ରିମକୋର୍ଟଙ୍କୁ ଅନୁରୋଧ କରିଥିଲା। ତେବେ ସର୍ବୋଚ୍ଚ ଅଦାଲତ ରାଲି ଆୟୋଜନ ପାଇଁ ଅନୁମତି ଦେବା ଦାୟିତ୍ୱ ଦିଲ୍ଲୀ ପୋଲିସ ଉପରେ ଛାଡ଼ିଦେଇଥିଲେ। ଫଳରେ ପୋଲିସ କୃଷକଙ୍କ ଟ୍ରାକ୍ଟର ରାଲିକୁ ଅନୁମତି ଦେବାକୁ ବାଧ୍ୟ ହୋଇଛି।
ସେପଟେ ରାଲିକୁ ଜୋର୍ଦାର କରିବା ଲାଗି ରବିବାର ପଞ୍ଜାବରୁ ଅଧିକ ସଂଖ୍ୟାରେ କୃଷକ ଦିଲ୍ଲୀ ଅଭିମୁଖେ ବାହାରିଛନ୍ତି। ଅମୃତସର, ଫଗ୍ଓ୍ବାରା, ହାଶିଆରପୁର ଓ ଅନ୍ୟ ସ୍ଥାନରୁ ଶତାଧିକ ଟ୍ରାକ୍ଟର-ଟ୍ରଲି ଦିଲ୍ଲୀ ଆସୁଥିବା ଦେଖିବାକୁ ମିଳିଛି। ଅମୃତସର ଓ ତରଣ ଜିଲାରୁ ପାଖାପାଖି ୧୨ ହଜାର ଟ୍ରାକ୍ଟର-ଟ୍ରଲି ଦିଲ୍ଲୀ ଯାଇଥିବା କିଷାନ ସଂଘର୍ଷ କମିଟି ମୁଖପାତ୍ର ଗୁରୁବଚନ ସିଂ ଚାବା କହିଛନ୍ତି।
