କେନ୍ଦୁଝର,୪ା୨(ସ୍ବ.ପ୍ର.): ପାଟଣା ରେଞ୍ଜ ଅନ୍ତର୍ଗତ ଜଙ୍ଗଲ ପରିବେଷ୍ଟିତ ରୋହିଣୀଦୁମା ଗ୍ରାମରେ ଅନନ୍ତ ମାଝି ନାମକ ଜଣେ ବ୍ୟକ୍ତିଙ୍କ ମୃତ୍ୟୁ ବାଘ ଆକ୍ରମଣରେ ହୋଇଥିବା ସ୍ଥାନୀୟ ଲୋକେ କହିଛନ୍ତି। ଏହି ସମୟରେ ବନ ବିଭାଗ ବାଘକୁ ଠାବ କରିବାକୁ ପଦକ୍ଷେପ ନେଇଛି। ଏହା ବାଘ ଆକ୍ରମଣରେ ମୃତ୍ୟୁ ନା ହତ୍ୟା ତାହା ସଠିକ୍ ଜଣାପଡ଼ି ନ ଥିଲେ ହେଁ ବନ ବିଭାଗ ଓ ପୋଲିସ ବିଭାଗର ଭିନ୍ନ ମତ ମଧ୍ୟରେ ଗ୍ରାମବାସୀ ଆଶଙ୍କାରେ ରହିଛନ୍ତି। ଏହି ଘଟଣାରେ ବନ ବିଭାଗ ଜଙ୍ଗଲ ବିଲେଇ (ବାଘ)ର ପାଦଚିହ୍ନ ଠାବ କରିଥିଲେ ହେଁ ପ୍ରକୃତ ପକ୍ଷେ କି ପ୍ରକାରର ବାଘ ଓ ଏହାର ସ୍ଥିତି ଅନୁଧ୍ୟାନ କରିବା ପାଇଁ ବିଭିନ୍ନ ସ୍ଥାନରେ ସିସିଟିଭି ଲଗାଇବା ଆରମ୍ଭ କରିଛି। ଏନେଇ ଡିଏଫ୍ଓ କେନ୍ଦୁଝର ଏଚ୍.ଡି.ଧନରାଜ କହିଛନ୍ତି, ନ୍ୟାଶନାଲ ଟାଇଗର କଞ୍ଜରଭେସନ ଅଥରିଟିଙ୍କ ଗାଇଡ୍ଲାଇନ୍ ଅନୁଯାୟୀ, ବାଘର ସ୍ଥିତି ଅନୁଧ୍ୟାନ କରାଯାଉଛି। ଏଥିପାଇଁ ୩ ଦିନ ମଧ୍ୟରେ ୪୮ଟି ସ୍ଥାନରେ ସିସିଟିଭି ଲଗାଯାଇ ନିୟମିତ ଅନୁଧ୍ୟାନ କରାଯିବ। ୧.୪ ବର୍ଗ କିମିରେ ଗୋଟିଏ ଲେଖାଏ ସିସିଟିଭି କ୍ୟାମେରା ଲଗାଯିବ। ଏଭଳି ୨୫ ଦିନ ଧରି ବୈଜ୍ଞାନିକ ପଦ୍ଧତିରେ ଅନୁଧ୍ୟାନ ପରେ ସଠିକ୍ ତଥ୍ୟ ମିଳିପାରିବ। ତେବେ ଏହି ବାଘ ଆକ୍ରମଣ ଘଟଣାକୁ ବନ ବିଭାଗ ଅସ୍ବୀକାର କରୁଛି।
ଅନ୍ୟପକ୍ଷରେ ପାରିପାର୍ଶ୍ୱିକ ଅବସ୍ଥା ତଥା ପ୍ରାଥମିକ ତଦନ୍ତରୁ ବାଘ କାମୁଡ଼ା ମୃତ୍ୟୁ ହୋଇଥିବା ଘଟଗାଁ ଏସ୍ଡିପିଓ କହିଛନ୍ତି। ତେବେ ପରିବାର ଲୋକଙ୍କ ଏତଲାକୁ ଭିତ୍ତିକରି ଏକ ଅପମୃତ୍ୟୁ ମାମଲା ରୁଜୁ କରିବା ସହ ମୃତଦେହ ବ୍ୟବଚ୍ଛେଦ କରାଯାଇଥିବା କହିଛନ୍ତି। ଅନ୍ୟପକ୍ଷରେ ବ୍ୟବଚ୍ଛେଦ ରିପୋର୍ଟ ଆସିବା ପରେ ସବୁ ଜଣାପଡ଼ିବ। ଏହି ଘଟଣା ପରେ ସ୍ଥାନୀୟ ଲୋକ ଭୟଭୀତ ହୋଇ ବନ ବିଭାଗକୁ ସୁରକ୍ଷା ମାଗିବା ସହ ମୃତ ପରିବାରକୁ କ୍ଷତିପୂରଣ ଦେବା ଦାବିରେ ଶୁକ୍ରବାର ଘେରାଉ କରିଥିଲେ। ବାଘ ଦ୍ୱାରା ମୃତ୍ୟୁ ହୋଇଥିବ ପ୍ରମାଣ ମିଳିଲେ ସରକାରୀ ନିୟମାନୁଯାୟୀ କ୍ଷତିପୂରଣ ଦିଆଯିବ ବୋଲି ପାଟଣା ରେଞ୍ଜ ଅଧିକାରୀ ଗ୍ରାମବାସୀଙ୍କୁ ଜଣାଇଛନ୍ତି।
