ଓ୍ବାଶିଂଟନ,୨୩।୯: ରୋହିଙ୍ଗ୍ୟାଙ୍କ ବିରୋଧରେ ହିଂସା ସହ ଜଡିତ ତଥ୍ୟ ପ୍ରକାଶ କରିବାକୁ ଆମେରିକା କୋର୍ଟ ଫେସବୁକକୁ ନିର୍ଦ୍ଦେଶ ଦେଇଛନ୍ତି। ଆମେରିକାର ନିୟମକୁ ଦର୍ଶାଇ ଫେସବୁକ ରୋହିଙ୍ଗ୍ୟାଙ୍କ ବିରୋଧରେ ହିଂସା ସମ୍ପର୍କରେ ତଥ୍ୟ ପ୍ରକାଶ କରିବାକୁ ମନା କରିଦେଇଥିଲା। ତେବେ ଏବେ କୋର୍ଟ ତଥ୍ୟ ହସ୍ତାନ୍ତର ପାଇଁ ନିର୍ଦ୍ଦେଶ ଜାରି କରିଛନ୍ତି।
ମିଆଁମାର ସୈନ୍ୟବାହିନୀ ଦ୍ୱାରା ହୋଇଥିବା କଟକଣା ଏବଂ ନରସଂହାର ଯୋଗୁ ୭୩୦,୦୦୦ରୁ ଅଧିକ ରୋହିଙ୍ଗ୍ୟା ମୁସଲମାନ ବାଂଲାଦେଶ ସମେତ ଅନ୍ୟ ପଡୋଶୀ ଦେଶକୁ ପଳାୟନ କରିଥିଲେ।
ଆମେରିକାର ଫେଡେରାଲ ଜଜ ସୋସିଆଲ ମିଡିଆ ପ୍ଲାଟଫର୍ମ ଫେସବୁକକୁ ୨୦୧୮ରେ ବନ୍ଦ ହୋଇଥିବା ଆକାଉଣ୍ଟ ସହ ଜଡିତ ରେକର୍ଡ ହସ୍ତାନ୍ତର କରିବାକୁ ନିର୍ଦ୍ଦେଶ ଦେଇଛନ୍ତି। ମ୍ୟାନ୍ମାରରେ ରୋହିଙ୍ଗ୍ୟା ବିରୋଧୀ ହିଂସା ସହ ଜଡିତ ଥିବା ସମସ୍ତ ତଥ୍ୟ ଦେବାକୁ ଫେସବୁକ୍କୁ କୁହାଯାଇଛି। ଏନେଇ ଗୁରୁବାର ଗଣମାଧ୍ୟମ ସଂସ୍ଥା ରଏଟର୍ସରେ ରିପୋର୍ଟ ପ୍ରକାଶ ପାଇଛି।
ୱାଶିଂଟନ ଡିସିର ବିଚାରପତି ଫେସବୁକକୁ ସମାଲୋଚନା କରିଛନ୍ତି ଯେ, ମୁସଲିମ ଅଳ୍ପସଂଖ୍ୟକ ରୋହିଙ୍ଗ୍ୟାଙ୍କ ବିରୋଧରେ ଆନ୍ତର୍ଜାତିକ ଅପରାଧ ପାଇଁ ମ୍ୟାନ୍ମାରକୁ ଦୋଷୀ ସାବ୍ୟସ୍ତ କରିବାକୁ ଚାହୁଁଥିବା ଅନୁସନ୍ଧାନକାରୀଙ୍କୁ ଗୁରୁତ୍ୱପୂର୍ଣ୍ଣ ତଥ୍ୟ ହସ୍ତାନ୍ତର କରିବାରେ ବିଫଳ ହୋଇଛି।
ବିଚାରପତି କହିଛନ୍ତି, ଫେସବୁକ ଗୋପନୀୟତା ଅଧିକାର କଥା କହି ରୋହିଙ୍ଗ୍ୟାଙ୍କ ବିରୋଧରେ ହୋଇଥିବା ହିଂସା ସମ୍ପର୍କରେ ତଥ୍ୟ ପ୍ରକାଶ କରିବାକୁ ମନା କରିଦେଇଛି। ଆମେରିକାର ଆଇନକୁ ଦର୍ଶାଇ ଫେସ୍ବୁକ କହିଛି ଯେ,ଇଲେକ୍ଟ୍ରୋନିକ ଯୋଗାଯୋଗ କମ୍ପାନୀଗୁଡିକ ପକ୍ଷରୁ ୟୁଜରଙ୍କ ସୂଚନା ପ୍ରକାଶ କରିବାକୁ ବାରଣ କରାଯାଇଛି। କିନ୍ତୁ ଆକାଉଣ୍ଟଗୁଡିକ ଡିଲିଟ ହେବା ପରଠାରୁ ସେଗୁଡିକ ଆଇନ ଅଧୀନରେ ରହିବ ନାହିଁ ଏବଂ ବିଷୟବସ୍ତୁ ହାସଲ କରାଯାଇପାରେ ବୋଲି ବିଚାରପତି କହିଛନ୍ତି।
ଜାତିସଂଘର ସେକ୍ରେଟେରୀ ଜେନେରାଲ ଆଣ୍ଟୋନିଓ ଗ୍ୟୁଟେରସ ରୋହିଙ୍ଗ୍ୟାଙ୍କ ଦୟନୀୟ ଅବସ୍ଥାନେଇ ଦୁଃଖ ପ୍ରକାଶ କରିଛନ୍ତି। ରୋହିଙ୍ଗ୍ୟା ମୁସଲମାନମାନଙ୍କ ମଧ୍ୟରୁ ଅଧିକାଂଶ ଅଗଷ୍ଟ ୨୦୧୭ରେ ସେମାନଙ୍କ ଦେଶ ଛାଡିବା ପୂର୍ବରୁ ରାଖିନି ରାଜ୍ୟରେ ରହୁଥିଲେ। ମିଆଁମାର ସୈନ୍ୟବାହିନୀର ତତମାଦାଓ୍ବ ନାମକ କଟକଣା ପରେ ନୋବେଲ ବିଜେତା ଅଙ୍ଗ ସାନ ସୁ କିଙ୍କ ନାଗରିକ ସରକାରଙ୍କ ଜାଣତରେ ୭୩୦,୦୦୦ ରୁ ଅଧିକ ରୋହିଙ୍ଗ୍ୟା ମୁସଲମାନ ଭିଟାମାଟି ଛାଡ଼ିଥିଲେ। ମ୍ୟାନ୍ମାର ସୈନ୍ୟବାହିନୀ ରୋହିଙ୍ଗ୍ୟା ମୁସଲମାନଙ୍କ ଗଣ ହତ୍ୟା କରିବା ସହିତ ବଳାତ୍କାର କରିଥିବା ଜଣାପଡିଛି। ଜାତିସଂଘ ଅନୁସନ୍ଧାନକାରୀ ଦ୍ୱାରା ଅଗଷ୍ଟ ୨୦୧୮ ରେ ପ୍ରକାଶିତ ଏକ ରିପୋର୍ଟରେ ସୈନ୍ୟବାହିନୀ ହତ୍ୟାକାଣ୍ଡ ଏବଂ ବଳାତ୍କାର ଘଟଣାରେ ଦୋଷୀ ସାବ୍ୟସ୍ତ ହୋଇଥିଲେ।
