ଭୁବନେଶ୍ୱର,୬।୨(ବ୍ୟୁରୋ): ୨୦୨୧-୨୨ ଆର୍ଥିକବର୍ଷ ପାଇଁ କେନ୍ଦ୍ରରେ ଭାଜପା ପରିଚାଳିତ ଏନ୍ଡିଏ ସରକାର ଆଣିଥିବା ରେଳ ବଜେଟରେ ଓଡ଼ିଶା ପ୍ରତି ହୋଇଥିବା ଅଣଦେଖାକୁ ନେଇ ବିଜେଡି ଭାଜପାକୁ ଜୋରଦାର ସମାଲୋଚନା କରିଛି। ଏ ନେଇ ଭାଜପାର ରାଜ୍ୟ ନେତ୍ୱତ୍ୱଙ୍କୁ ଜବାବ ତଲବ କରିଛି। ଶୁକ୍ରବାର ୩ ପୃଷ୍ଠା ସମ୍ବଳିତ ପ୍ରେସ୍ ଇସ୍ତାହାର ଜାରି କରି ବିଜେଡି ଓଡ଼ିଶାକୁ ରେଳବାଇ କ୍ଷେତ୍ରରେ ହୋଇଥିବା ଅଣଦେଖାକୁ ଜୋରଦାର ଉଠାଇଛି।
ବିଜେଡି ଅଭିଯୋଗ କରିଛି ଯେ ୨୦୨୧-୨୨ ରେଳ ବଜେଟ ଓଡ଼ିଶାକୁ ନ୍ୟାୟ ଦେଇପାରିନାହିଁ। ରାଜ୍ୟ ସରକାରଙ୍କ ସମସ୍ତ ପ୍ରକାର ସହଯୋଗ ସତ୍ତ୍ୱେ ରେଳ ବଜେଟରେ କେନ୍ଦ୍ର ସରକାର ବୈମାତୃକ ମନୋଭାବ ପ୍ରଦର୍ଶନ କରିଛନ୍ତି। ସ୍ବାଧୀନତା ପରେ ଓଡ଼ିଶା ଲାଗି କେବଳ ୬ଟି ନୂଆ ରେଳ ଲାଇନ ପାଇଁ ବ୍ୟବସ୍ଥା କରାଯାଇଛି। କଟକ-ପାରାଦୀପ ୮୩ କି.ମି., ତାଳଚେର-ସମ୍ବଲପୁର ୧୭୪ କି.ମି., କୋରାପୁଟ-ରାୟଗଡା ୧୬୪ କି.ମି., ଦୈତାରୀ-ବାଂଶପାଣି ୧୫୫କି.ମି., ଲିଙ୍ଗରାଜ-ଜୁନାଗଡ ୫୬ କି.ମି. ଏବଂ ଖୋର୍ଦ୍ଧା-ବଲାଙ୍ଗୀର ରେଳ ଲାଇନ ଯାହା ଆଂଶିକ ଭାବେ (୩୦%) କାର୍ଯ୍ୟ ସମ୍ପନ୍ନ ହୋଇଛି। ବ୍ରିଟିଶ ଅମଳରେ ଖଣିଜାତ ଦ୍ରବ୍ୟକୁ ଚୋରି କରିବା ପାଇଁ ରେଳ ଲାଇନର ବ୍ୟବହାର କରାଯାଉଥିଲା। ଦୁଃଖର କଥା ସ୍ବାଧୀନତାର ୭୫ ବର୍ଷ ପରେ ମଧ୍ୟ ଏବେକାର କେନ୍ଦ୍ର ସରକାର ସେଇଆ ହିଁ କରୁଛନ୍ତି। ଇସ୍ପାତ ଓ ଶକ୍ତି କ୍ଷେତ୍ର ପାଇଁ ଯଦି ଓଡ଼ିଶାଠାରୁ କୋଇଲା ନ ଯାଆନ୍ତା, ତାହାହେଲେ ବାହାରୁ ଆମଦାନୀ କରିବା ପାଇଁ କୋଟି କୋଟି ଟଙ୍କା ଖର୍ଚ୍ଚ ହୁଅନ୍ତା। ରୟାଲ୍ଟି ଦୂରର କଥା ଓଡ଼ିଶାର ନ୍ୟାଯ୍ୟ ପ୍ରାପ୍ୟ ଦିଆଯାଉନାହିଁ। ଓଡ଼ିଶାବାସୀଙ୍କ କୋଇଲା ବାହାର ରାଜ୍ୟକୁ ପଠାଯିବ। ଓଡ଼ିଶାବାସୀ ଧୂଳିଧୂଅଁାର ଶିକାର ହେବେ। କୋଇଲା, ଆଇରନ, ବକ୍ସାଇଟ, ଆଲୁମିନିୟମ କ୍ଷେତ୍ରରେ ବ୍ରିଟିଶ ସରକାରର ଲୁଣ୍ଠନ ମାନସିକତା ଥିଲା। ସ୍ବାଧୀନତା ପରେ ମଧ୍ୟ ସେଇ ମାନସିକତାର ଝଲକ ଦେଖିବାକୁ ମିଳୁଛି ବୋଲି ବିଜେଡି ଅଭିଯୋଗ କରିଛି।
ପ୍ରତ୍ୟେକ ବର୍ଷ ଭାରତୀୟ ରେଳ ଓଡ଼ିଶାରୁ ୨୦,୦୦୦ କୋଟିର ରାଜସ୍ବ ଆଦାୟ କରିଥାଏ ା ଯଦି ୭ ବର୍ଷର ହିସାବ କରାଯାଏ ତେବେ ରେଳବାଇ ୧୪୦,୦୦୦ କୋଟି ରାଜସ୍ବ ନେଇ ସାରିଛି। ଏହି ସମୟରେ ଓଡ଼ିଶାକୁ ମିଳିଛି ମାତ୍ର ୧୪,୦୦୦ କୋଟି। ଭାଜପାର ରାଜ୍ୟ ଏବଂ କେନ୍ଦ୍ରୀୟ ନେତୃତ୍ୱମାନେ ଏହାର ଜବାବ ଦିଅନ୍ତୁ ବୋଲି ବିଜେଡି ପ୍ରଶ୍ନ କରିଛି। ସେହିପରି ରେଲଓ୍ବେ ସାନ୍ଧ୍ରତାରେ ପଶ୍ଚିମବଙ୍ଗରେ ୧୦୦୦ ବର୍ଗ କି.ମି.ରେ ୪୨ କି.ମି.ର ରେଲଓ୍ବେ ଲାଇନ ବ୍ୟବସ୍ଥା ହୋଇଥିବା ବେଳେ ବିହାରରେ ୩୫କି.ମି. ହୋଇଛି। ପରିତାପର ବିଷୟ ଯେ, ସ୍ବାଧୀନତାର ୭୫ ବର୍ଷ ପରେ ମଧ୍ୟ ଓଡ଼ିଶାର ରେଳ ସାନ୍ଧ୍ରତା ୧୫ କି.ମିରେ ସୀମିତ ରହିଛି। ଗତ ୭ ବର୍ଷ ଭିତରେ ମାତ୍ର ଗୋଟିଏ ଜିଲାକୁ ନୂଆ ରେଳ ଲାଇନ ଛୁଇଁପାରିଛି। ଯଦି ଏହି ହିସାବରେ ରେଳ ଲାଇନ ବିଛା ଯାଏ ତେବେ ରେଳ ଲାଇନ ନ ଥିବା ୬ଟି ଜିଲାକୁ ପାଖାପାଖି ୪୨ ବର୍ଷ ଲାଗିବ ବୋଲି ଅନୁମାନ କରାଯାଇପାରେ। ଜୟପୁର-ମାଲକାନଗିରି ଓ ଜୟପୁର-ନବରଙ୍ଗପୁର ରେଳ ଲାଇନ ଘୋଷଣା ହୋଇଥିଲା। ରାଜ୍ୟ ସରକାର ସମସ୍ତ ପ୍ରକାର ଆର୍ଥିକ ସହାୟତା ଓ ଜମି ଯୋଗାଇ ଦେବେ ବୋଲି ପ୍ରତିଶ୍ରୁତି ଦେଇଥିଲେ, ହେଲେ ଆଜି ପର୍ଯ୍ୟନ୍ତ ଏହି ପ୍ରକଳ୍ପରେ କୌଣସି ଅଗ୍ରଗତି ଦେଖାଯାଇ ନାହିଁ। କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏହା ଉପରେ ଉତ୍ତର ଦେବେ କି ବୋଲି ବିଜେଡି ପ୍ରଶ୍ନ କରିଛି।
୫୯୦ କୋଟି ଟଙ୍କାରୁ ୭୦୦ କୋଟି ଟଙ୍କାର ରେଳବାଇ ବଜେଟ୍ ଓଡିଶାର ଆବଶ୍ୟକତା ନାହିଁ। ଓଡ଼ିଶାର ଅବଦାନକୁ ନ ଭୁଲି ଯାଇ କେନ୍ଦ୍ର ସରକାର ଓଡ଼ିଶାବାସୀଙ୍କ ହକ୍କୁ ଦିଅନ୍ତୁ ବୋଲି ବିଜେଡି ଦାବି କରିଛି।
