ଟୋକିଓ, ୯ା୬ (ଏପି)-ଟୋକିଓ ଅଲିମ୍ପିକ୍ସ ଭେନ୍ୟୁଗୁଡ଼ିକୁ ଯୋଗାଯୋଗ କରୁଥିବା ସମସ୍ତ ସଡ଼କ ପଥକୁ ସିଲ୍ କରାଯାଇଛି। ତନ୍ମଧ୍ୟରେ ୧.୪ ବିଲିୟନ ଆମେରିକୀୟ ଡଲାର ମୂଲ୍ୟରେ ନିର୍ମିତ ନ୍ୟାଶନାଲ ଷ୍ଟାଡିୟମ ଅନ୍ୟତମ, ଯେଉଁଠାରେ ଜୁଲାଇ ୨୩ରେ ଉଦ୍ଘାଟନୀ ଉତ୍ସବ ଆୟୋଜନ କାର୍ଯ୍ୟକ୍ରମ ରହିଛି। କୋଭିଡ୍ ସମୟରେ ଗେମ୍ସ ଆୟୋଜନ ଏକପ୍ରକାର ରିସ୍କ। କାରଣ ଏହାଦ୍ୱାରା କରୋନା ସଂକ୍ରମଣର ଆଶଙ୍କା ରହିଛି ବୋଲି ଦେଶର ଅଧିକାଂଶ ନାଗରିକ ମତବ୍ୟକ୍ତ କରିଛନ୍ତି। ପୁନଶ୍ଚ ସ୍ଥାନୀୟ ସରକାର ଟୋକିଓ ସମେତ ଜାପାନର ଅନ୍ୟ କେତେକ ଅଞ୍ଚଳରେ ଜୁନ୍ ୨୦ ପର୍ଯ୍ୟନ୍ତ ଜରୁରିକାଳୀନ ପରିସ୍ଥିତି ଜାରି କରିଛନ୍ତି। ଏହା ସତ୍ତ୍ୱେ ଅନ୍ତର୍ଜାତୀୟ ଅଲିମ୍ପିକ କମିଟି (ଆଇଓସି) ଓ ଟୋକିଓ ଅଲିମ୍ପିକ୍ସର ଆୟୋଜକଗଣ ଗେମ୍ସ ଆୟୋଜନ ନେଇ ଦୃଢ଼ପରିକର। ଉଦ୍ଘାଟନୀ ଉତ୍ସବ ଆଜିଠୁ ମାତ୍ର ୪୫ ଦିନ ରହିଛି। ଜରୁରିକାଳୀନ ପରିସ୍ଥିତି ଜାରି କରିବା ଦ୍ୱାରା ଟୋକିଓରେ କୋଭିଡ୍ ସଂକ୍ରମିତଙ୍କ ସଂଖ୍ୟା ଧୀରେ ଧୀରେ ହ୍ରାସ ପାଇବାରେ ଲାଗିଛି। ଯଥାସମ୍ଭବ ଖୁବ୍ଶୀଘ୍ର ପରିସ୍ଥିତିରେ ଉନ୍ନତି ଘଟିବ ବୋଲି ଆୟୋଜକ କମିଟି ସଭାପତି ସିକୋ ହାସିମୋତୋ ମଙ୍ଗଳବାର ଏକ କାର୍ଯ୍ୟନିର୍ବାହୀ ବୋର୍ଡ ବୈଠକରେ ଆଶାପ୍ରକାଶ କରି କହିିଛନ୍ତି। ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ତରଫରୁ ଦିଆଯାଇଥିବା ସୂଚନା ଅନୁସାରେ ସୋମବାର ସୁଦ୍ଧା ଦେଶର ୩.୬୬ ପ୍ରତିଶତ ଲୋକ କରୋନା ଟିକା ନେଇ ସାରିଛନ୍ତି। ୧୦.୭ ପ୍ରତିଶତ ପ୍ରଥମ ଡୋଜ୍ ଟିକା ନେଇଛନ୍ତି। କୋଭିଡ୍ରେ ଜାପାନରେ ପ୍ରାୟ ୧୩,୫୦୦ ଲୋକ ପ୍ରାଣ ହରାଇ ସାରିଲେଣି। ସରକାରଙ୍କ ଜଣେ ଉପଦେଷ୍ଟା ତଥା ତୋହୋକୁ ୟୁନିଭର୍ସିଟିର ଭିରୋଲୋଜିଷ୍ଟ ଡକ୍ଟର ହିରୋଶି ଓସିତାନି ଇତିମଧ୍ୟରେ ଚେତାଇ ଦେଇଛନ୍ତି ଯେ ଅଲିମ୍ପିକ୍ସ ପରେ ପରେ ଜାପାନ ଏବଂ ଅନ୍ୟ ଦେଶରେ ସଂକ୍ରମଣର ଆଶଙ୍କା ରହିଛି। ଅଲିମ୍ପିକ୍ସ ସୁରକ୍ଷିତ ଭାବେ ଆୟୋଜନ ହୋଇପାରିବ ବୋଲି ଉଭୟ ସରକାର ଓ ଆଇଓସି ପକ୍ଷରୁ ଯଦିଓ ଦୃଢତାର ସହ କହୁଛନ୍ତି, କିନ୍ତୁ ପ୍ରତ୍ୟେକେ ଭଲରୂପେ ଜାଣନ୍ତି ଗେମ୍ସ ଆୟୋଜନ କରିବା ଏକପ୍ରକାର ରିସ୍କ। ବିନା ରିସ୍କରେ ଅଲିମ୍ପିକ୍ସ ଶତ ପ୍ରତିଶତ ଅସମ୍ଭବ ବୋଲି ଓସିତାନି କହିଛନ୍ତି। ଆୟୋଜକ କମିଟି ସିଇଓ ତୋସିରୋ ମୁତୋ କହିଛନ୍ତି, ବିଦେଶରୁ ଆସିବାକୁ ଥିବା ଗଣମାଧ୍ୟମ କର୍ମଚାରୀମାନେ କୋଭିଡ୍ ପ୍ରୋଟୋକଲକୁ ଠିକଣାରୂପେ ମାନୁଛନ୍ତି କି ନା ତାହା ଜିପିଏସ୍ ଦ୍ୱାରା ମନିଟର କରାଯିବ।
