ସାରା ବିଶ୍ୱରେ ମାନବ ସଭ୍ୟତା ବହୁ ଘାତପ୍ରତିଘାତ ସହ ମୁକାବିଲା କରି ପୃଥିବୀପୃଷ୍ଠରେ ବଞ୍ଚତ୍ ରହିବା ନିମନ୍ତେ ପ୍ରୟାସ ଜାରି ରଖିଆସିଛି। ସମାଜରେ ୧୮ ବର୍ଷରୁ ଊଦ୍ଧର୍ବ ଏବଂ ବୟସ୍କ ବ୍ୟକ୍ତି ମଧ୍ୟ ଦୈନନ୍ଦିନ ବିଡ଼ି, ସିଗାରେଟ୍, ପିକା, ହୁକା, ଖଇନି, ପୁଡ଼ିଆ ଆଦି ଧୂଅଁାପତ୍ରରୁ ପ୍ରସ୍ତୁତ ବିଭିନ୍ନ ନିଶାଦ୍ରବ୍ୟ କଞ୍ଚା ତଥା ଧୂଅଁା ଆକାରରେ ସିଧାସଳଖ ସେବନ କରିଥାଆନ୍ତି, ଯାହାକି ପରବର୍ତ୍ତୀ ସମୟରେ ଏହା ମୁଖ କର୍କଟ, ଗଳା କର୍କଟ, ରାଜଯକ୍ଷ୍ମା ତଥା ଫୁସ୍ଫୁସ୍ଜନିତ ବିଭିନ୍ନ ମାରାତ୍ମକ ରୋଗ ଶରୀରରେ ସୃଷ୍ଟି ହୋଇଥାଏ। ଫଳରେ ସୁସ୍ଥ ମଣିଷ ବିପୁଳ ଅର୍ଥ ଖର୍ଚ୍ଚ କରି ଶାରୀରିକ ଓ ମାନସିକ କଷ୍ଟ ଭୋଗ କରି ଶେଷରେ ମୃତ୍ୟୁମୁଖରେ ପଡ଼ିଥାଏ। ଏହି ଅକାଳ ମୃତ୍ୟୁକୁ ରୋକ ଲଗାଇବ ନିମନ୍ତେ ତମାଖୁ (Tobacco) ସେବନରୁ ଦୂରେଇ ରହିବା ଉଚିତ।
ତମାଖୁ ସେବନକୁ ପ୍ରତିରୋଧ କରିବା ପାଇଁ ଜନସଚେତନତା ସୃଷ୍ଟି ନିମନ୍ତେ ବିଶ୍ୱ ସ୍ବାସ୍ଥ୍ୟ ସଂଗଠନ (WHO) ଦ୍ୱାରା ୧୯୮୭ ମେ ୩୧ ତାରିଖକୁ ‘ଅନ୍ତର୍ଜାତୀୟ ତମାଖୁ ନିରୋଧୀ ଦିବସ’ (World No Tobacco Day)ଭାବେ ପାଳନ କରାଯାଇ ଆସୁଅଛି। ଚଳିତବର୍ଷ ଏ ନେଇ ସ୍ଲୋଗାନ୍ ରହିଛି ‘ତମାଖୁ ବର୍ଜନ ପାଇଁ ପ୍ରତିଜ୍ଞାବଦ୍ଧ ହେବା’। ସାମ୍ପ୍ରତିକ ପରିସ୍ଥିତରେ ବିଶ୍ୱ କରୋନା ଭଳି ଏକ ମାରାତ୍ମକ ପ୍ରଭାବକୁ ପ୍ରତିରୋଧ ନିମନ୍ତେ ଚେଷ୍ଟା ଜାରି ରଖିଥିବା ବେଳେ ତମାଖୁ ସେବନ ଦ୍ୱାରା ସୃଷ୍ଟି ହେଉଥିବା ବିଭିନ୍ନ ରୋଗକୁ ପ୍ରତିରୋଧ ନିମନ୍ତେ ସବୁବର୍ଗର ବ୍ୟକ୍ତି ବିଶେଷଙ୍କ ସହଯୋଗର ଆବଶ୍ୟକତା ରହିଛି। ଏହାଦ୍ୱାରା ବର୍ତ୍ତମାନ ଓ ଭବିଷ୍ୟତ ପିଢ଼ି ପାଇଁ ଜୀବନ ସୁରକ୍ଷା ନିମନ୍ତେ ସହାୟକ ହୋଇପାରିବ। ସର୍ବସାଧାରଣ ସ୍ଥାନରେ କିମ୍ବା ବସ୍, ଟ୍ରେନରେ ତମାଖୁ ସେବନ କରିବା ତଥା ଦୋକାନଗୁଡ଼ିକରେ ‘ତମାଖୁ’ ଦ୍ୱାରା ପ୍ରସ୍ତୁତ ବିଭିନ୍ନ ସାମଗ୍ରୀ ବିକ୍ରୟ ନିମନ୍ତେ ସରକାର ଆଇନ ଦୃଷ୍ଟିରୁ ଦଣ୍ଡନୀୟ ଅପରାଧ ଭାବେ ଘୋଷଣା କରିଛନ୍ତି। ତେଣୁ ତମାଖୁ ସେବନ ପ୍ରତିରୋଧ ନିମନ୍ତେ ଆମେ ସମସ୍ତେ ମାନସିକ ସ୍ତରରେ ଏକାଠି ହୋଇ ସହଯୋଗ କରିବାର ଆବଶ୍ୟକତା ରହିଛି। ଆମ ରାଜ୍ୟରେ ଓ ଦେଶରେ ମଧ୍ୟ ପ୍ରତିବର୍ଷ ”ମେ ମାସ“ ୩୧ ତାରିଖକୁ ବିଶ୍ୱ ତମାଖୁ ନିବାରଣ ଦିବସ ଭାବେ ସମସ୍ତ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର, ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର, ଜିଲା ଓ ରାଜ୍ୟସ୍ତରରେ ପାଳନ କରାଯାଇଥାଏ। ଏ ନେଇ ଆମେ ସତର୍କ ରହିଲେ ତମାଖୁ କବଳରୁ ନିଜକୁ ରକ୍ଷା କରିପାରିବା। ଏଥିପାଇଁ ଜନସଚେତନତାର ଆବଶ୍ୟକତା ରହିଛି।
– ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର, ଚନ୍ଦାହାଣ୍ଡି, ନବରଙ୍ଗପୁର
ମୋ: ୭୮୯୪୧୧୨୪୮୭
