କଟକ ଅଫିସ,୨୬।୫: ସମଗ୍ର ବିଶ୍ୱରେ ମେ ୨୬ ତାରିଖ ବିଶ୍ୱ ହକର ଦିବସ ରୂପେ ପାଳିତ ହେଉଛି। ଖବରକାଗଜ ସଂସ୍ଥାଠାରୁ ଆରମ୍ଭ କରି ବିଭିନ୍ନ କ୍ଷେତ୍ରରେ ହକରମାନେ ନିଜର ସ୍ଥିତି ବଜାୟ ରଖି ଚାଲିଛନ୍ତି। କରୋନା ସମୟରେ ଖବରକାଗଜ ବିତରକମାନେ ଜୀବନକୁ ବାଜି ଲଗାଇ ଆଗଧାଡ଼ିର ଯୋଦ୍ଧା ଭାବେ ନିଜର କାମ କରିଛନ୍ତି। ସରକାର ସେମାନଙ୍କ ସ୍ବାର୍ଥ ତଥା ପରିବାର ପ୍ରତିପୋଷଣକୁ ଧ୍ୟାନ ଦେଇ ସୁବିଧା ସୁଯୋଗ ପ୍ରଦାନ ନିମନ୍ତେ ପଦକ୍ଷେପ ନେବାକୁ ମତପ୍ରକାଶ ପାଇଛି।
ଏମାନେ ଯାହା କୁହନ୍ତି…
କରୋନା ହକରମାନଙ୍କ ଅଣ୍ଟା ଭାଙ୍ଗି ଦେଇଛି। ହକରମାନଙ୍କୁ ସରକାର ଦୃଷ୍ଟି ଦେଇ ୬ ହଜ଼ାର ଟଙ୍କା ଲେଖାଏ ଆର୍ଥିକ ସହାୟତା ଦେଇଛନ୍ତି। ତେବେ ସରକାରଙ୍କ ଘୋଷଣା ଅନୁସାରେ, ବର୍ଷା ଦିନେ ରେନ୍କୋଟ୍, ଶୀତ ଦିନେ ଶୀତବସ୍ତ୍ର, ଘର ନଥିବା ହକରଙ୍କୁ ଜାଗା ଦେବା, ସ୍ବାସ୍ଥ୍ୟ ବୀମା ଆଦି କାର୍ଯ୍ୟକାରୀ ହେଲେ ହକରମାନେ ଖୁସି ହେବେ। କରୋନା ପରେ ପେପର ୩୦% କମିଯାଇଛି। ଇ ପେପର ରାତି ୩ଟାରୁ ଅପଲୋଡ୍ ହେବା ଦ୍ୱାରା ପେପର ବିକ୍ରି ପରିମାଣ କମିଯାଇଛି। ଏଥିପ୍ରତି ଦୃଷ୍ଟି ଦେବା ଉଚିତ।
-ପ୍ରଭାସ ପ୍ରଧାନ,
ବିତରକ, ବକ୍ସିବଜାର
ମୁଁ ଜଣେ ଖବରକାଗଜ ବିତରକ ବା ହକର୍ ଭାବେ ସରକାର ତାଙ୍କ ପ୍ରତିଶ୍ରୁତି ରଖନ୍ତୁ ବୋଲି କହିବାକୁ ଚାହେଁ। କରୋନା ସମୟରେ ସରକାର ଆମକୁ ଦେଇଥିବା ପ୍ରତିଶ୍ରୁତିଗୁଡ଼ିକୁ ନ ଭୁଲି କାର୍ଯ୍ୟକାରୀ କରିଲେ ଆମ୍ଭେମାନେ ଉପକୃତ ହେବୁ।
-ଶିବପ୍ରସାଦ ନାୟକ,
ସମ୍ପାଦକ, ନୂଆବଜାର ବିତରକ ସଂଘ
ଖବରକାଗଜ ବିତରକମାନଙ୍କୁ ସାମାଜିକ ସୁରକ୍ଷା ମିଳିବା ଆବଶ୍ୟକ। ତାଙ୍କ ପରିବାରକୁ ସରକାରୀ ସୁବିଧା ସୁଯୋଗ ପ୍ରଦାନ ଉପରେ ଧ୍ୟାନ ଦିଆଯିବା ଦରକାର। ବିତରକମାନଙ୍କୁ ଆର୍ଥିକ ସୁବିଧା ଦିଆଯିବା ଜରୁରୀ।
-ପ୍ରଦୀପ ଜେନା, କାର୍ଯ୍ୟକାରୀ ସଭାପତି, ବାଦାମବାଡ଼ି ବିତରକ ସଂଘ
ଖରା, ବର୍ଷାକୁ ଖାତିର ନ କରି ହକରମାନେ ପ୍ରତିଦିନ ଖବରକାଗଜ ବଣ୍ଟନ କରୁଛନ୍ତି। ସେଥିପାଇଁ ସେ ବହୁ ସମସ୍ୟାର ସମ୍ମୁଖୀନ ହୋଇଥାଏ। ମହଙ୍ଗା କାଳରେ ପରିବାର ପ୍ରତିପୋଷଣ ମଧ୍ୟ କଷ୍ଟକର ହେଲାଣି। ସରକାର ହକରମାନଙ୍କ ସମସ୍ୟାକୁ ଗୁରୁତ୍ୱ ଦେଇ ବିଭିନ୍ନ ସହାୟତା ଘୋଷଣା କଲେ। କିନ୍ତୁ ଏଯାଏ କୌଣସି ଗୋଟିଏ କାର୍ଯ୍ୟକାରୀ କରାଯାଇ ନାହିଁ। ସରକାର ତୁରନ୍ତ ହକରମାନଙ୍କୁ ସ୍ବାସ୍ଥ୍ୟବୀମା ଯୋଗାଇ ଦେବା ସହ ସେମାନଙ୍କ ପିଲାଙ୍କୁ ପାଠପଢ଼ା ପାଇଁ ସହାୟତା କରିବାକୁ ନିବେଦନ କରୁଛି।
-ଦୁର୍ଗାପ୍ରସାଦ ଛାଟୋଇ,
ବିତରକ, ବକ୍ସିବଜାର
