ନୂଆଦିଲ୍ଲୀ,୨୬ା୫: ୨୦୦୮ରୁ ୨୦୧୫ ମଧ୍ୟରେ ୩୦ ପିଲାଙ୍କୁ ଅପହରଣ କରି ବଳାତ୍କାର ପରେ ହତ୍ୟା କରିଥିବା ରବୀନ୍ଦ୍ର କୁମାରଙ୍କୁ ଦିଲ୍ଲୀର ଏକ କୋର୍ଟ ୮ ବର୍ଷର ଶୁଣାଣି ପରେ ଆଜୀବନ କାରାଦଣ୍ଡାଦେଶ ଦେଇଛନ୍ତି। ୨୦୧୫ରେ ସେ ଜଣେ ନାବାଳିକାଙ୍କୁ ବଳାତ୍କାର ଓ ହତ୍ୟା କରିବା ପରେ ପୋଲିସ ନଜରକୁ ଆସିଥିଲେ। କୋର୍ଟରେ ସେ ନିଜ ଦୋଷ ସ୍ବୀକାର କରିଛନ୍ତି। ତାଙ୍କ ଅପରାଧର ଶିକାର ହୋଇଥିବା ଅଧିକାଂଶ ପୀଡ଼ିତା ଦିଲ୍ଲୀ, ହରିୟାଣା ଓ ଉତ୍ତର ପ୍ରଦେଶ ବାସିନ୍ଦା।
୨୦୦୮ରେ ରବୀନ୍ଦ୍ରଙ୍କୁ ମାତ୍ର ୧୮ ବର୍ଷ ହୋଇଥିବାବେଳେ ସେ ୟୁପି କସେଗଞ୍ଜରୁ ଦିଲ୍ଲୀକୁ କାର୍ଯ୍ୟ ସନ୍ଧାନରେ ଆସିଥିଲେ। ସେ ଦିନରେ ଶ୍ରମିକ ଭାବେ କାମ କରୁଥିବାବେଳେ ରାତିରେ ଅତ୍ୟଧିକ ନିଶା ସେବନ କରି ଅଶ୍ଳୀଳ ଫିଲ୍ମ ଦେଖୁଥିଲେ। ରାତି ୮ଟାରେ ଶୋଇବାକୁ ଯାଉଥିଲେ। ଭୋରରୁ ଉଠି ଉତ୍ତେଜିତ ହୋଇ ପିଲାଙ୍କୁ ଖୋଜୁଥିଲେ। ଏପରି କି ଅନେକ ସମୟରେ ସେ ୪୦ କି.ମି. ପର୍ଯ୍ୟନ୍ତ ଚାଲି ଚାଲି ନିଜ ଶିକାର ଖୋଜୁଥିଲେ। ନିଛାଟିଆ ସ୍ଥାନରେ ୬ରୁ ୧୨ ବର୍ଷର ପିଲାଙ୍କୁ ୧୦ ଟଙ୍କା ଓ ଚକଲେଟ ଦେଇ ବଳାତ୍କାର କରୁଥିଲେ।
