ଆଜିକାଲିର ବ୍ୟସ୍ତମୟ ଜୀବନରେ ନିଜକୁ କିପରି ସୁସ୍ଥ ରଖିବା ସେଥିପ୍ରତି ଆମେ ସଚେତନ ରହିବା ନିହାତି ଜରୁରୀ। ଅସନ୍ତୁଳିତ ଜୀବନଶୈଳୀ ପରୋକ୍ଷରେ କେତେକ ରୋଗକୁ ଡାକି ଆଣିଥାଏ। ଆମକୁ ରୋଗରୁ ପ୍ରତିରୋଧ କରିବା ପାଇଁ ଆମ ଶରୀରରେ ରୋଗ ପ୍ରତିରୋଧକ ଶକ୍ତି ରହିଛି। ଏହା ମଧ୍ୟ ସକ୍ରିୟ ରହିବା ନିହାତି ଜରୁରୀ। ତେଣୁ ଆମକୁ ଖାଦ୍ୟପେୟ ପ୍ରତି ନଜର ଦେବାକୁ ପଡିଥାଏ। ସୁଷମ ଖାଦ୍ୟ, ନିୟମିତ ବ୍ୟାୟାମ, ସକାରାତ୍ମକ ମନୋଭାବ ତଥା ଅନ୍ୟାନ୍ୟ ଅନୁକୂଳ ଜୀବନଶୈଳୀ ଶରୀରରେ ରୋଗ ପ୍ରତିରୋଧକ ଶକ୍ତି ବୃଦ୍ଧି କରେ। ନିୟମିତ ପେଟପୂରା ଖାଦ୍ୟ ତଥା ସୁଷମ ଖାଦ୍ୟ ଖାଇଲେ ରୋଗ ପ୍ରତିରୋଧକ ଶକ୍ତି ହ୍ରାସର ଆଶଙ୍କା ରହି ନ ଥାଏ। ବିଶେଷଭାବରେ ଭିଟାମିନ ଏ, ଭିଟାମିନ ଡି, ଭିଟାମିନ ସି, ଲୌହ, କ୍ୟାଲସିୟମ, ଜିଙ୍କ୍, ସେଲେନିୟମ ଆଦି ଅଧିକ ମାତ୍ରାରେ ଥିବା ଖାଦ୍ୟକୁ ଖାଦ୍ୟ ତାଲିକାରେ ସାମିଲ କରନ୍ତୁ। ତା’ସହ ପୁଷ୍ଟିସାର ଜାତୀୟ ଖାଦ୍ୟ ମଧ୍ୟ ଖାଆନ୍ତୁ। ଭାତ, ଡାଲି, କ୍ଷୀର, ଦହି, ଛେନା, ଚିନାବାଦାମ, ସୋୟାବିନ, ଶାଗ, ପନିପରିବା, ଫଳ, ମାଛ, ମାଂସ ଓ ଅଣ୍ଡା ରୋଗ ପ୍ରତିରୋଧକ ଶକ୍ତି ବୃଦ୍ଧି କରିବାରେ ସହାୟକ ହୋଇଥାଏ। କମଳା, ସବୁଜ ରଙ୍ଗର ଫଳ ଓ ପନିପରିବା, ଗାଜର, ବନ୍ଧାକୋବି, ବ୍ରୋକୋଲି, ଲେମ୍ବୁ, ଅଁଳା, ଅଦା, ରସୁଣ, ହଳଦୀ, ଆଲମଣ୍ଡ ମଧ୍ୟ ଏଥିପାଇଁ ବେଶ୍ ଉପକାରୀ ସାବ୍ୟସ୍ତ ହୋଇଥାଏ।
