ଦାରିଙ୍ଗବାଡି, ୭।୨ (ଅରୁଣ ସାହୁ): ଜୀବନରେ ସମସ୍ତଙ୍କ ସ୍ବପ୍ନ ଥାଏ ଭଲ ଘର ଟିଏ କରି ପରିବାର ସହ ସୌଖିନ ଜୀବନଯାପନ କରିବାକୁ। ଏହି ସ୍ବପ୍ନ କାହାର ପୂରଣ ହୁଏତ ଆଉ କାହାକୁ ଏଥିପାଇଁ ସଂଘର୍ଷ କରିବାକୁ ପଡିଥାଏ। ଆଉ କିଛି ଲୋକ ସେ ସ୍ବପ୍ନ ପୂରଣ କରିବାକୁ ସାରା ଜୀବନ ବିତାଇଥିଲେ ମଧ୍ୟ ସ୍ବପ୍ନ କେବଳ ସ୍ବପ୍ନରେ ଅଟକି ଯାଇଥାଏ। ହେଲେ ଏମିତି ଏବେ ମଧ୍ୟ ଦେଖିବାକୁ ମିଳୁଛି, ସେଇ ପୁରୁଣା ମାଟି କାନ୍ଥରେ ତିଆରି ହୋଇଥିବା ଘର କେବଳ ବଦଳିଯାଇଛି। ଚାଳ ଛପର ବଦଳରେ ଆଜିବେଷ୍ଟସ। ଏହାର ମଧ୍ୟ ଅନେକ କାରଣ। ସେଥିମଧ୍ୟରୁ ଗୋଟିଏ ହେଉଛି ଆଉ ଛଣ ମିଳୁନାହିଁ। ତେଣୁ ଲୋକେ ବାଧ୍ୟ ହୋଇ ପକାଉଛନ୍ତି।
କନ୍ଧମାଳ ଜିଲା ଦାରିଙ୍ଗବାଡି ବ୍ଲକ ଅଞ୍ଚଳରେ ଏବେ ମଧ୍ୟ ଗାଁ ଗାଁରେ ମାଟି କାନ୍ଥ ଓ କାଠ ପଟାରେ ଗୃହ ରହିଛି। ତାକୁ କିଛି ଦିନ ବ୍ୟବଧାନରେ ମାଟି ଦେଇ ମରାମତି କରାଯିବା ସହ ଲାଲ ରଙ୍ଗର ମାଟିକୁ ବତୁରାଇ ସେଥିରେ ଗୋବର କାଠ ଅଙ୍ଗାର ଦେଇ ରଙ୍ଗ ବେରଙ୍ଗ କରି ଲିପାଯାଇଥାଏ। ବିଶ୍ୱାସ ରହିଛି, ଗୋବର ଓ ଏହି ଲାଲ ମାଟିରେ ଲିପାଯିବା ଦ୍ୱାରା କୌଣସି ଜୀବାଣୁ, ଭୁତାଣୁ ଘରକୁ ଆକ୍ରମଣ କରିବ ନାହିଁ। ଘର ସୁନ୍ଦର ଓ ସ୍ବଛ ଦେଖାଯିବା ସହ ଏହାର ପରିବେଶ ଅତି ସୁନ୍ଦର ଦିଶିବ। ତେଣୁ ଏଭଳି ଘରେ ଜୀବନ ବିତାଇବା ଦ୍ୱାରା ଅନେକ ନିରୋଗ ରହିବା ସହ ଶୀତ ତାପ ନିୟନ୍ତ୍ରଣ ମଧ୍ୟ ରହୁଥିବା କୁହାଯାଉଛି।
