ଚେନ୍ନାଇ,୧୭ା୬: ଏଆଇଏଡିଏମକେ’ରୁ ତଡ଼ା ଖାଇଥିବା ମହିଳା ନେତ୍ରୀ ଭି.କେ ଶଶିକଳା ତାଙ୍କର ଆଗାମୀ ରାଜନୈତିକ ଭବିଷ୍ୟତ ସମ୍ପର୍କରେ ବଡ଼ ଘୋଷଣା କରିଛନ୍ତି। ଏକଦା ତାମିଲନାଡୁ ରାଜନୀତିରେ ଆଧିପତ୍ୟ ଚଳାଇଥିବା ଶଶିକଳା ପୁଣିଥରେ ରାଜନୀତିରେ ନିଜର ଗୋଟି ଚଳାଇବାକୁ ପ୍ରସ୍ତୁତ ହେଉଛନ୍ତି। ଏହି ଅବସରରେ ସେ କହିଛନ୍ତ ଯେ, ”ପାର୍ଟିରେ ତାଙ୍କର ପୁନଃ ‘ପ୍ରବେଶ’ ଆରମ୍ଭ ହୋଇଥିବାରୁ ଏଆଇଏଡିଏମକେ’କୁ କେହି ଅଟକାଇ ପାରିବେ ନାହିଁ।”
ରବିବାର ଚେନ୍ନାଇସ୍ଥିତ ବାସଭବନରେ ଶଶିକଳା କହିଛନ୍ତି ଯେ, ”ଏଆଇଏଡିଏମକେ ଏକଦା ଦେଶର ତୃତୀୟ ବୃହତ୍ତମ ଦଳ ଥିଲା, କିନ୍ତୁ ଦଳ ଗତ ଲୋକ ସଭା ନିର୍ବାଚନରେ କେତେକ ନିର୍ବାଚନମଣ୍ଡଳୀରେ ତୃତୀୟ ତଥା ଚତୁର୍ଥ ସ୍ଥାନକୁ ଖସି ଆସିଛି। “କିନ୍ତୁ ଏଆଇଏଡିଏମକେ ଏହାର ଏହାର ସମାପ୍ତି ଆଡ଼କୁ ଗତି କରୁଛି ବୋଲି କେହି କହିପାରିବେ ନାହିଁ, କାରଣ ମୋର ପ୍ରବେଶ ବର୍ତ୍ତମାନ ଆରମ୍ଭ ହୋଇଛି।”
ଶଶିକଳାଙ୍କ ଏହି ବୟାନ ଏଆଇଏଡିଏମକେ ବିଦ୍ରୋହୀ ବା ତଡ଼ା ଖାଇଥିବା ଗୋଷ୍ଠୀକୁ ଏକଜୁଟ କରିବାର ପ୍ରୟାସର ପୃଷ୍ଠଭୂମିରେ ଆସିଛି।
ଶଶିକଳା ଅଭିଯୋଗ କରିଛନ୍ତି ଯେ ଜାତି ରାଜନୀତି ଏଆଇଏଡିଏମକେ’ରେ ପ୍ରବେଶ କରିଛି। ସେ କହିଛନ୍ତି, “ଆମ୍ମା (ଜୟଲଳିତା) ଜଣେ ଉଚ୍ଚ ଜାତିର ଥିଲେ। କିନ୍ତୁ ସେ ମୋତେ ତାଙ୍କ ନିକଟତର କରିଥିଲେ। ସେହିଭଳି ମୁଁ ଯଦି ଜାତି ପ୍ରତି ଗୁରୁତ୍ୱ ଦେଇଥାନ୍ତି ତେବେ ମୁଁ ତାଙ୍କୁ (ପଲାନିସ୍ୱାମୀ) ମୁଖ୍ୟମନ୍ତ୍ରୀ କରି ନ ଥା’ନ୍ତି।” ତେବେ ଦଳ ଭିତରେ ଏକ ନିର୍ଦ୍ଦିଷ୍ଟ ବିଭାଗକୁ ଗୁରୁତ୍ୱ ଦିଆଯାଉଥିବା ମୁଁ ଜାଣିଛି ବୋଲି ଶଶିକଳା କହିଛନ୍ତି। ଏଆଇଏଡିଏମକେ ସାଧାରଣ ସମ୍ପାଦକ ଏଡାପାଡି କେ ପାଲାନିସ୍ୱାମୀଙ୍କୁ ପରୋକ୍ଷ ଟାର୍ଗେଟ କରି ସେ କହିଛନ୍ତି ଯେ, ସେମାନେ ଦଳ ସହିତ ନିଜର ମଧ୍ୟ କ୍ଷତି କରିଛନ୍ତି।”
”ଏଆଇଏଡିଏମକେ ପୁଣି ଦୃଢ ଭାବେରେ ଉଭା ହେବା ଏବଂ ତାମିଲନାଡୁର ଲୋକଙ୍କୁ ଡିଏମକେ କବଳରୁ ରକ୍ଷା କରିବାକୁ ପଡିବ” ବୋଲି ସେ କହିଛନ୍ତି। ତେବେ ତାଙ୍କ ପାଇଁ ଅନେକ ଅସମାପ୍ତ କାର୍ଯ୍ୟ ଅଛି ଏବଂ ଦଳକୁ ମଜବୁତ କରିବାକୁ ସେ ଶପଥ ନେଇଥିବା କହିଛନ୍ତି।”
