ନୂଆଦିଲ୍ଲୀ,୫।୨: ଭାରତୀୟ ରାଜନୀତିରେ ପ୍ରାୟ ସବୁ ରାଜ୍ୟର କିଛି ନା କିଛି ଗରୁତ୍ୱପୂର୍ଣ୍ଣ ଭୂମିକା ରହିଆସିଛି । ଅନେକ ରାଜ୍ୟରେ ବଡ଼ ବଡ଼ ଚେହେରାଙ୍କ ଉତ୍ଥାନ ଓ ପତ୍ତନ ଦେଖିବାକୁ ମିଳିଛି । କୁହାଯାଏ କେନ୍ଦ୍ରରେ ସରକାରର ରାସ୍ତା ଉତ୍ତର ପ୍ରଦେଶ ଦେଇ ଆସିଥାଏ । କାରଣ ଭାରତୀୟ ରାଜନୀତିରେ ଉତ୍ତର ପ୍ରଦେଶ ବେଶ ଗରୁତ୍ୱ ରଖିଆସିଛି । କାରଣ ୟୁପିରେ ଲୋକ ସଭା ସିଟ ସଂଖ୍ୟା ଅଧିକ । ଯାହା କେନ୍ଦ୍ରରେ ସରକାର ଗଠନ କରିବାରେ ବେଶ ଗରୁତ୍ୱ ବହନ କରୁଛି ଏହି ରାଜ୍ୟ । ଆଉ ସବୁଠୁ ବଡ଼ କଥା ହେଉଛି ବର୍ତ୍ତମାନ ପର୍ଯ୍ୟନ୍ତ ଉତ୍ତର ପ୍ରଦେଶରୁ ହିଁ ସର୍ବାଧିକ ପ୍ରଧାନମନ୍ତ୍ରୀ ହୋଇଛନ୍ତି । ଦେଶକୁ ୯ ଜଣ ପ୍ରଧାନମନ୍ତ୍ରୀ ଦେଇଛି ଉତ୍ତର ପ୍ରଦେଶ ଯାହାକି ସର୍ବାଧିକ ।
ଏବେର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ହୋମ ଷ୍ଟେଟ ଅବଶ୍ୟ ଗୁଜରାଟ । କିନ୍ତୁ ସେ ୩ଟି ଯାକ ଟର୍ମରେ ବାରାଣସୀ ଲୋକସଭା ଆସନରୁ ହିଁ ର୍ନିବାଚିତ ହୋଇଛନ୍ତି । ପିଏମ ମୋଦିଙ୍କୁ ବାରାଣସୀରୁ ପ୍ରଧାନମନ୍ତ୍ରୀ ସିଟ ଯାଏ ଚୟନ କରିବାରେ ଉତ୍ତର ପ୍ରଦେଶ ହିଁ ରହିଛି । ତେବେ ଆପଣ ଜାଣିଛନ୍ତି କି, କେଉଁ ରାଜ୍ୟରୁ ବର୍ତ୍ତମାନ ସୁଦ୍ଧା କେହି ଜଣେ ବି ପ୍ରଧାନମନ୍ତ୍ରୀ ହୋଇନାହାନ୍ତି?
ସର୍ବାଧିକ ପ୍ରଧାନମନ୍ତ୍ରୀ ୟୁପିରୁ ରହିଛନ୍ତି । ସେମାନେ ହେଉଛନ୍ତି ଜବାହାର ଲାଲ ନେହରୁ, ଲାଲ ବାହାଦୂର ଶାସ୍ତ୍ରୀ, ଇନ୍ଦିରା ଗାନ୍ଧୀ, ଚୌଧୁରୀ ଚରଣ ସିଂହ, ରାଜୀବ ଗାନ୍ଧି, ଚନ୍ଦ୍ରଶେଖର, ବିଶ୍ବନାଥ ପ୍ରତାପ ସିଂହ, ଅଟଳ ବିହାରୀ ବାଜପେୟୀ। ତେବେ ବର୍ତ୍ତମାନ ସୁଦ୍ଧା ଓଡ଼ିଶା, ରାଜସ୍ଥାନ, ଉତ୍ତରାଖଣ୍ଡ, ସିକ୍କିମ, ମେଘାଳୟ, ଅରୁଣାଚଳ ପ୍ରଦେଶ, ତ୍ରିପୁରା, ମିଜୋରାମ, ହିମାଚଳ ପ୍ରଦେଶ, ବିହାର, ଝାଡଖଣ୍ଡ, ଗୋଆ, ତାମିଲନାଡୁ, କେରଳ ଭଳି ରାଜ୍ୟରୁ କେହି ଜଣେ ବି ପ୍ରଧାନମନ୍ତ୍ରୀ ହୋଇନାହାନ୍ତି ।
ଅନ୍ୟ ରାଜ୍ୟଙ୍କ ମଧ୍ୟରୁ ଆନ୍ଧ୍ର ପ୍ରଦେଶ, କର୍ନାଟକ, ପଞ୍ଜାବ ଓ ଗୁଜରାଟ ଭଳି ରାଜ୍ୟରୁ ପ୍ରଧାନମନ୍ତ୍ରୀ ହୋଇ ସାରିଛନ୍ତି । ପଞ୍ଜାବରୁ ଡକ୍ଟର ମନମୋହନ ସିଂହ, ଇନ୍ଦ୍ର କୁମାର ଗୁଜରାଲ, ଆନ୍ଧ୍ରରୁ ନରସିହ୍ମା ରାଓ, କର୍ନାଟକରୁ ଏଚଡି ଦେବଗେଡା ପିଏମ ସିଟରେ ବସିସାରିଛନ୍ତି। ବର୍ତ୍ତମାନ ସୁଦ୍ଧା ଜବାହାର ଲାଲ ନେହରୁ ସର୍ବାଧିକ ୪ ଥର ପ୍ରଧାନମନ୍ତ୍ରୀ ହୋଇଥିବା ବେଳେ ନରେନ୍ଦ୍ର ମୋଦି ୩ ଥର ପ୍ରଧାନମନ୍ତ୍ରୀ ହୋଇଛନ୍ତି ।
