ନୂଆପଡ଼ା ଅଫିସ,୧୬।୩:ନୂଆପଡ଼ା ଜିଲା ସୁନାବେଡ଼ା ଅଭୟାରଣ୍ୟ ପାଦଦେଶରେ ଥିବା ପ୍ରାୟ ୧୦ଟି ଗାଁରେ କଲରାପତରିଆ ବାଘ ଆତଙ୍କରେ ସ୍ଥାନୀୟ ଲୋକ ଭୟଭୀତ ଅବସ୍ଥାରେ ରହିଛନ୍ତି। ୧୦ ଦିନ ହେବ ଅଞ୍ଚଳରେ ବାଘ ବୁଲୁଥିବା ବେଳେ ୨ ଗାଈ ଓ ୨ ବାଛୁରୀ ଆକ୍ରମଣ କରି ମାରିଦେଇଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ବୁଧବାର ଭୋରୁ ତରିଆମହୁଆଭଟା ଗାଁର ଏକ ଗୁହାଳରେ ବାଘ ପଶିଥିଲା। ଗାଈ ଶବ୍ଦ ଶୁଣି ଗ୍ରାମବାସୀ ଠେଙ୍ଗାବାଡି ଧରି ପାଟି କରିବାରୁ ବାଘ ପାଖ ଜଙ୍ଗଲକୁ ପଳାଇ ଯାଇଥିଲା।
ସୂଚନାରୁ ପ୍ରକାଶ ଯେ, ନୂଆପଡା ବନାଞ୍ଚଳ ଅଧୀନ ସୁନାବେଡା ଅଭୟାରଣ୍ୟ ପାଦଦେଶରେ ଥିବା ମୁସରଙ୍ଗୀ ସଂରକ୍ଷିତ ଜଙ୍ଗଲରେ ବାଘ ରହିଥିବା ସ୍ଥାନୀୟ ଲୋକେ ପ୍ରକାଶ କରିଛନ୍ତି। କେବଳ ବାଘ ନୁହେଁ, ତା ସହିତ ଛୋଟ ଛୁଆ ମଧ୍ୟ ରହିଥିବା ପ୍ରତ୍ୟକ୍ଷଦର୍ଶୀମାନେ କହିଛନ୍ତି। ସୁନାବେଡା ଅଭୟାରଣ୍ୟରୁ ଆସି ମୁସରଙ୍ଗୀ ସଂରକ୍ଷିତ ଜଙ୍ଗଲରେ ବାଘୁଣୀ ଛୁଆ ସହ ରହିଥିବା ଲୋକେ ଅନୁମାନ କରୁଛନ୍ତି। ଛୁଆ ଛୋଟ ଥିବାରୁ ଅନ୍ୟ ସ୍ଥାନକୁ ବାଘୁଣୀ ଯାଇପାରୁନାହିଁ। ପାଖ ଗାଁରେ ବୁଲୁଛି ବୋଲି ଲୋକେ କହୁଛନ୍ତି। ଦିନରେ ମୁଷରଙ୍ଗୀ ଜଙ୍ଗଲକୁ ଚାଲି ଯାଉଛି ଓ ରାତ୍ରି ହେଲେ ଜଙ୍ଗଲ ପାଖ ଗାଁକୁ ଆସି ଗୃହପାଳିତ ପଶୁ ଉପରେ ଆକ୍ରମଣ କରୁଛି। ବାଘ ଭୟରେ ମୁସରଙ୍ଗୀ ସଂରକ୍ଷିତ ଜଙ୍ଗଲ ପାଖ ଗାଁଗୁଡିକ ପାସାମାରା, ଡାଳିପଖନା, କୋଟେନ, ଦଳଦଳି, ତରିଆ ମହୁଆଭଟା, ଆମାନାରା, ପାତାଲଘୁଟକୁରି, ମୋହରାଡିହି, ଜରିଡିହି, ପାୱାରତୋଳା ଆଦି ଗାଁରେ ବାଘ ଭୟରେ ତାଟିକବାଟ ବନ୍ଦ ରହୁଛି ଓ ଛୋଟ ଛୁଆଙ୍କୁ ବାହାରକୁ ଛାଡୁନାହାନ୍ତି। ଭୟରେ ଅଞ୍ଚଳର ଚାଷୀମାନେ କ୍ଷେତକୁ ମଧ୍ୟ କାମ କରି ଯାଉନାହାନ୍ତି। ଶିକାର କରିଥିବା ସ୍ଥାନରେ ପଡିଥିବା ପାଦ ଚିହ୍ନରୁ ଏହା ଏକ କଲରାପତରିଆ ବାଘ ବୋଲି ଆମାନାରା ବିଟ୍ ବନପାଳ ଚୂଡାମଣି ସରାଫ କହିଛନ୍ତି। ବଡ ପାଦଚିହ୍ନ ସହ ଛୋଟ ପାଦଚିହ୍ନ ରହିଥିବାରୁ ବାଘୁଣୀ ସହିତ ଛୁଆ ମଧ୍ୟ ରହିଥିବା ଅନୁମାନ କରାଯାଉଛି। ବର୍ତ୍ତମାନ ସମୟରେ ଉକ୍ତ ଅଞ୍ଚଳରେ ବନ ବିଭାଗ ପକ୍ଷରୁ ରାତ୍ରିକାଳିନ ପାଟ୍ରୋଲିଂ ଜାରି ରଖିବା ସହ ଡାକବାଜି ଯନ୍ତ୍ର ସାହାଯ୍ୟରେ ଲୋକଙ୍କୁ ସଚେତନ କରାଯାଇଛି। ରାତିରେ କିମ୍ବା ଜରୁରୀ କାମ ନ ଥିଲେ ଘରୁ ବାହାରନ୍ତୁ ନାହିଁ। ଯଦି ବାହାରକୁ ଯାଉଛନ୍ତି ହାତରେ ଟର୍ଚ୍ଚଲାଇଟ ଓ ଗୋଷ୍ଠୀ ହୋଇ ଯାଆନ୍ତୁ ବୋଲି କୁହାଯାଉଛି।
