ଆଜିକାଲିର ଯୁବପିଢ଼ୀ ଶିଘ୍ର ବିବାହ କରିବାକୁ ଇଚ୍ଛା ପ୍ରକାଶ କରୁନାହାନ୍ତି। ହେଲେ ପାକିସ୍ତାନର ଜଣେ ଯୁବକଙ୍କ କାହାଣୀ ଯଦି ଆପଣ ଶୁଣିବେ ଆଶ୍ଚର୍ଯ୍ୟ ହୋଇଯିବେ। କାରଣ ପାକିସ୍ତାନର ଅଦନାନ ୨୨ ବର୍ଷର ହୋଇଥିବା ବେଳେ ତିନିଟି ବିବାହ କରିଛନ୍ତି। ଏବେ ସେ ଚତୁର୍ଥ ବିବାହ ପାଇଁ ପ୍ରସ୍ତୁତି ଚଳାଇଛନ୍ତି। ଏହି ବିବାହ ପାଇଁ ମନୋନିତ ପ୍ରାର୍ଥୀ ଖୋଜିବାରେ ତାଙ୍କ ସ୍ତ୍ରୀମାନେ ତାଙ୍କୁ ସାହାଯ୍ୟ ମଧ୍ୟ କରୁଛନ୍ତି।
ଅଦନାନ ପାକିସ୍ତାନ ସିୟାଲକୋଟର ବାସିନ୍ଦା। ସେ ୧୬ ବର୍ଷ ବୟସରେ ପ୍ରଥମ ବିବାହ କରିଥିଲେ। ସେତେବେଳେ ସେ ପାଠ ପଢ଼ୁଥିଲେ। ପରେ ୨୦ ବର୍ଷ ବୟସରେ ସେ ଦ୍ୱିତୀୟ ବିବାହ ଏବଂ ଗତବର୍ଷ ସେ ତୃତୀୟ ବିବାହ କରିଥିଲେ। ଅଦନାନ୍ କେବଳ ଇଂରାଜୀ ଅକ୍ଷର ‘ଏସ୍’ ନାମ ଥିବା ଝିଅମାନଙ୍କୁ ବିବାହ କରିଛନ୍ତି। ତାଙ୍କ ସ୍ତ୍ରୀମାନଙ୍କ ନାମ ଶୁମ୍ବଲ, ଶୁବାନା ଏବଂ ଶାହିଦା। ଏବେ ସେ ଏସ୍ ଅକ୍ଷରରେ ନାମ ଥିବା ଝିଅଟିଏ ଚତୁର୍ଥ ବିବାହ ପାଇଁ ଖୋଜୁଛନ୍ତି।
ଆଜିର ସମୟରେ ଯେଉଁଠି ଗୋଟିଏ ପାର୍ଟନରଙ୍କୁ ସମୟ ଦେବା ସମ୍ଭବ ହେଉନାହିଁ। ସେଠାରେ ଅଦନାନ ନିଜର ତିନିଜଣ ସ୍ତ୍ରୀଙ୍କୁ ଖୁସିରେ ରଖିଛନ୍ତି। ସେ ସମସ୍ତଙ୍କୁ ସମାନ ଭାବେ ଭଲ ପାଆନ୍ତି। ଯେଉଁଠିକୁ ଯାଆନ୍ତି, ସାଙ୍ଗ ହୋଇ ଯାଆନ୍ତି। ସ୍ତ୍ରୀମାନେ ମଧ୍ୟ ମିଳିମିଶି ଅଦନାନଙ୍କ କାମ କରନ୍ତି। ତେବେ କିଭଳି ଭାବେ ତିନିଜଣ ସ୍ତ୍ରୀଙ୍କୁ ସେ ସମ୍ଭାଳିଛନ୍ତି ପ୍ରଶ୍ନରେ ଅଦନାନ୍ କୁହନ୍ତି, ତିନିଜଣଙ୍କ ପାଇଁ ସେ ଏକାସହିତ ଡ୍ରେସ୍ କିଣନ୍ତି। ସମସ୍ତଙ୍କ ସହ ମିଶି ଖାଆନ୍ତି। ସବୁଜିନିଷ ସେ ଏକାଠି କରନ୍ତି। ଗୋଟିଏ ମାସରେ ତାଙ୍କର ଦେଢ଼ ଲକ୍ଷ ପର୍ଯ୍ୟନ୍ତ ଖର୍ଚ୍ଚ ହୁଏ। ସେ ସ୍ପୋଟ୍ସ କାର ବିକ୍ରି ବ୍ୟବସାୟ କରନ୍ତି। ବିବାହ ପରେ ତାଙ୍କର ଭଲ ଲାଭ ହେଉଛି। ଏବେ ତାଙ୍କର ଚାରି ସନ୍ତାନ ଅଛନ୍ତି। ସେ ନିଜ ପରିବାରକୁ ବେଶ ଭଲପାଆନ୍ତି ବୋଲି କହିଛନ୍ତି।
ସ୍ବାମୀ ସ୍ତ୍ରୀ ମଧ୍ୟରେ ଝଗଡ଼ା ହେବା ସ୍ବାଭାବିକ କଥା ହୋଇଥିବା ବେଳେ ଅଦନାନଙ୍କ ତିନିଜଣ ସ୍ତ୍ରୀ କେବେହେଲେ ଝଗଡ଼ା କରନ୍ତି ନାହିଁ। ନା ସ୍ବାମୀଙ୍କ ସହ ନା ପରସ୍ପର ମଧ୍ୟରେ। ଏଣୁ ସେ ନିଜକୁ ଭାଗ୍ୟଶାଳୀ ବୋଲି କୁହନ୍ତି। ଅଦନାନଙ୍କ ପ୍ରଥମ ସ୍ତ୍ରୀ ତାଙ୍କୁ ଦ୍ୱିତୀୟ ବିବାହ କରିବାକୁ କହିଥିଲେ। ଦ୍ୱିତୀୟ ସ୍ତ୍ରୀ ତୃତୀୟ ବିବାହ କରିବାକୁ କହିଥିଲେ। ଏବେ ସମସ୍ତେ ମିଶି ଚତୁର୍ଥ ସ୍ତ୍ରୀଙ୍କୁ ଆଣିବାକୁ ପ୍ରୟାସ ଚଳାଇଛନ୍ତି ବୋଲି କହିଛନ୍ତି।
