ଢେଙ୍କାନାଳ ଅଫିସ୍, ୨୨।୬ – ଢେଙ୍କାନାଳ ଜିଲା ଓଡ଼ାପଡ଼ା ବ୍ଲକ କୁରଣ୍ଟିସ୍ଥିତ ରିମ୍ଝିମ୍ ଇସ୍ପାତ କାରଖାନାରେ ପୁନଃନିଯୁକ୍ତି ଦାବିରେ ଚାଲିଥିବା କ୍ଷତିଗ୍ରସ୍ତ ପ୍ରଜାଙ୍କ ଆନ୍ଦୋଳନ ମଙ୍ଗଳବାର ପ୍ରତ୍ୟାହୃତ ହୋଇଛି। ୩ମାସ ମଧ୍ୟରେ ଦକ୍ଷତା ଭିତ୍ତିରେ ୧୫୦ କ୍ଷତିଗ୍ରସ୍ତ ପ୍ରଜାଙ୍କୁ ନିଯୁକ୍ତି, ଅବସର ସମୟରେ ଉପନୀତ ୨୫ କର୍ମଚାରୀଙ୍କୁ ଥଇଥାନ କରାଯିବ ବୋଲି ପ୍ରତିଶ୍ରୁତି ମିଳିବା ପରେ ଆନ୍ଦୋଳନ ସ୍ଥଗିତ ରହିଛି। ନିର୍ଦ୍ଧାରିତ ସମୟ ମଧ୍ୟରେ ଦାବି ପୂରଣ ନ ହେଲେ ପୁନର୍ବାର ଗଣଅନଶନ ଆରମ୍ଭ ହେବ ବୋଲି ଚେତାବନୀ ଦେଇଛନ୍ତି କ୍ଷତିଗ୍ରସ୍ତ ପ୍ରଜା।
ପୂର୍ବ ନିର୍ଦ୍ଧାରିତ ଅନୁଯାୟୀ ଜିଲା କାର୍ଯ୍ୟାଳୟ ସଦଭାବନା ଗୃହରେ ପ୍ରଶାସନ, କମ୍ପାନୀ କର୍ତ୍ତୃପକ୍ଷ, କ୍ଷତିଗ୍ରସ୍ତପ୍ରଜାଙ୍କୁ ନେଇ ତ୍ରିପାକ୍ଷିକ ବୈଠକ ଜିଲାପାଳ ସରୋଜ କୁମାର ସେଠୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିଲା। ବିଧାୟକ ସୁଧୀର କୁମାର ସାମଲ ଯୋଗଦେଇ କହିଲେ, କ୍ଷତିଗ୍ରସ୍ତ ପ୍ରଜାଙ୍କ ଜମିରେ ବିଆର୍ଜି କମ୍ପାନୀ ଗଢ଼ି ଉଠିଥିଲା। ଏହାକୁ ରିମ୍ଝିମ୍ କମ୍ପାନୀ କିଣିନେବା ପରେ ଯୋଗ୍ୟତା ଏବଂ ଦକ୍ଷତା ଭିତ୍ତିରେ ସମ୍ପୃକ୍ତ କ୍ଷତିଗ୍ରସ୍ତ ପ୍ରଜାଙ୍କୁ ଥଇଥାନ କରାଯିବା ଜରୁରୀ। ଆପୋସ ଆଲୋଚନା ଏବଂ ସରକାରୀ ନିୟମ ଆଧାରରେ ଏହାର ସମାଧାନ ହେଉ। ୧୭୫ଜଣ କ୍ଷତିଗ୍ରସ୍ତ ପ୍ରଜାଙ୍କ ମଧ୍ୟରୁ ଅବସର ଗ୍ରହଣ ସମୟ ହୋଇଯାଇଥିବା ୨୫ଜଣଙ୍କୁ ନିୟମ ଅନୁଯାୟୀ ଥଇଥାନ କରିବା, ଅବଶିଷ୍ଟ ୧୫୦ଜଣଙ୍କୁ ପାତରଅନ୍ତର ନ କରି ନିଯୁକ୍ତି ପ୍ରଦାନ କରିବା ପାଇଁ ବିଧାୟକ ପରାମର୍ଶ ଦେଇଛନ୍ତି। ଜିଲାପାଳ ସେଠୀ କହିଲେ, ଢେଙ୍କାନାଳ ଉପଜିଲାପାଳଙ୍କ ନେତୃତ୍ୱରେ ଏକ କୋର୍ କମିଟି ଗଠନ କରାଯିବ। ଏହି କମିଟିରେ କମ୍ପାନୀ କର୍ତ୍ତୃପକ୍ଷ, ଆଞ୍ଚଳିକ କ୍ଷତିଗ୍ରସ୍ତ ପ୍ରଜାସଂଘ କର୍ମକର୍ତ୍ତା, ସେମାନଙ୍କ ପ୍ରତିନିଧି ରହିବେ। ଆଲୋଚନା ମାଧ୍ୟମରେ ଏହାର ସମାଧାନ ପାଇଁ ଉଦ୍ୟମ କରାଯିବ। କ୍ଷତିଗ୍ରସ୍ତ ପ୍ରଜାସଂଘ ସଭାପତି ଗଙ୍ଗାଧର ସାମଲ କହିଲେ, କ୍ଷତିଗ୍ରସ୍ତ ପ୍ରଜାଙ୍କୁ ଥଇଥାନ କରିବା କ୍ଷେତ୍ରରେ ରହିଥିବା ନିୟମକୁ କମ୍ପାନୀ ଉଲ୍ଲଂଘନ କରୁଛି। ଆସନ୍ତା ୩ମାସ ମଧ୍ୟରେ ଏହାର ସମାଧାନ ନ ହେଲେ ଆନ୍ଦୋଳନ ତୀବ୍ରତର ହେବ ବୋଲି ସେ ଚେତାବନୀ ଦେଇଛନ୍ତି।
କ୍ଷତିଗ୍ରସ୍ତ ପ୍ରଜାଙ୍କ ପକ୍ଷରୁ ରାଜୀବ ଗୋପାଳ ସ୍ବାଇଁ, ଚିତ୍ତରଞ୍ଜନ ନାଥ ଆଲୋଚନାରେ ଭାଗନେଇ କହିଲେ, ବିଆର୍ଜି କମ୍ପାନୀରେ କାର୍ଯ୍ୟରତ ଜମିହରା ପ୍ରଜାଙ୍କୁ ହଟାଇ ରିମ୍ଝିମ୍ କମ୍ପାନୀ ବାହାର ରାଜ୍ୟର ଲୋକଙ୍କୁ ନିଯୁକ୍ତି ଦେଉଛି। ଫଳରେ କମ୍ପାନୀ ପାଇଁ ଭିଟାମାଟି ହରାଇଥିବା କ୍ଷତିଗ୍ରସ୍ତଙ୍କ ଭବିଷ୍ୟତ ଅନ୍ଧକାରମୟ ହୋଇପଡ଼ିଛି। ଏ ନେଇ ଜିଲା ପ୍ରଶାସନ ଏବଂ କାରଖାନା କର୍ତ୍ତୃପକ୍ଷଙ୍କୁ ଅବଗତ କରାଯିବା ସତ୍ତ୍ୱେ ସୁଫଳ ମିଳିଲା ନାହିଁ। ତେଣୁ କମ୍ପାନୀ ଫାଟକ ସମ୍ମୁଖରେ ଆନ୍ଦୋଳନ କରାଯାଇଥିଲା। ଜିଲା ଶ୍ରମ ଅଧିକାରୀ ସତ୍ୟନାରାୟଣ ଆଚାର୍ଯ୍ୟ କହିଲେ, ରିମ୍ଝିମ୍ କମ୍ପାନୀକୁ କାର୍ଯ୍ୟରତ କର୍ମଚାରୀ ଏବଂ ଶ୍ରମିକଙ୍କ ତାଲିକା ମଗାଯାଇଥିଲା। ତେବେ କର୍ତ୍ତୃପକ୍ଷ ବହୁ ବିଳମ୍ବରେ ମଙ୍ଗଳବାର ସକାଳେ ତାଲିକା ଦେଇଛନ୍ତି। ଜିଲା ନିୟୋଜନ ଅଧିକାରୀ ଆଶିଷ କୁମାର ବସନ୍ତିଆ ମଧ୍ୟ ଅନୁରୂପ ଅଭିଯୋଗ ଆଣିଥିଲେ। କମ୍ପାନୀରେ ସ୍ଥାନୀୟ ଅଞ୍ଚଳର କେତେଜଣଙ୍କୁ ନିଯୁକ୍ତି ଦିଆଯାଇଛି, ସେ ସମ୍ପର୍କରେ କର୍ତ୍ତୃପକ୍ଷ ସୂଚନା ଦେଉ ନ ଥିବା ନେଇ ସେ ବୈଠକରେ ଦୃଷ୍ଟି ଆକର୍ଷଣ କରିଥିଲେ।
ବୈଠକରେ ଉପଜିଲାପାଳ ସ୍ନିଗ୍ଧାରାଣୀ ଧଳ, ଏସ୍ପି ଲୋଗାନୟାଗୀ ଦିବ୍ୟା ଭି., ଅତିରିକ୍ତ ଜିଲାପାଳ (ସାଧାରଣ) ରମେଶ ଚନ୍ଦ୍ର ସେଠୀ, ଅତିରିକ୍ତ ଜିଲାପାଳ (ରାଜସ୍ବ) ଉଦୟ କୁମାର ମହାପାତ୍ର, କମ୍ପାନୀ ନିର୍ବାହୀ ନିର୍ଦ୍ଦେଶକ ରୋହିତ ଅଗ୍ରୱାଲ, ନିର୍ଦ୍ଦେଶକ ବିଜୟ ଗର୍ଗ ପ୍ରମୁଖ ଉପସ୍ଥିତ ଥିଲେ।
